Madras HC Update: 'జయలలిత నివాసం ఆమె మేనకోడలిదే.. ప్రభుత్వానికి ఎలాంటి హక్కులేదు'

తమిళనాడు మాజీ ముఖ్యమంత్రి జయలలిత నివాసం ఆమె మేనకోడలు దీపకే చెందుతుందని మద్రాస్ హైకోర్టు తీర్పు వెలువరించింది.

తమిళనాడు దివంగత ముఖ్యమంత్రి జయలలిత నివాసం వేద నిలయంపై మద్రాస్ హైకోర్టు కీలక తీర్పు ఇచ్చింది. వేద నిలయాన్ని స్మారక మందిరంగా మార్చడానికి వీలులేదని కోర్టు తేల్చిచెప్పింది. మూడు వారాల్లో వేద నిలయాన్ని జయలలిత మేన కోడలు దీపకు అప్పగించాలని ఆదేశాలు జారీ చేసింది. 

జయలలిత నివాసాన్ని స్మారక మందిరంగా మార్చాలని అన్నాడీఎంకే ప్రభుత్వం జారీ చేసిన ఉత్తర్వులను కూడా న్యాయస్థానం కొట్టేసింది. జయలిలిత ఆస్తులను స్వాధీనం చేసుకోవడానికి ప్రభుత్వానికి ఏమాత్రం హక్కులేదని స్పష్టం చేసింది.

ఆమె మరణానంతరం..

2016లో అన్నాడీఎంకే అధినేత్రి జయలలిత అనారోగ్యంతో కన్నుమూశారు. ఆ మరుసటి ఏడాదే ఆమె నివాసమైన పోయెస్‌ గార్డెన్‌ను స్మారక మందిరంగా మార్చాలని పళనిస్వామి నేతృత్వంలోని అప్పటి అన్నాడీఎంకే ప్రభుత్వం ఉత్తర్వులు జారీ చేసింది.

కోర్టులో..

ప్రభుత్వ నిర్ణయాన్ని సవాలు చేస్తూ జయలలిత మేనకోడలు దీప, మేనల్లుడు దీపక్‌ న్యాయస్థానాన్ని ఆశ్రయించారు. తమను జయలలిత వారసులుగా కోర్టు గుర్తించిందని.. మరి ఇలాంటి సమయంలో ఆమె నివాసాన్ని ఎలా ప్రభుత్వం స్వాధీనం చేసుకుంటుందంటూ కోర్టులో పిటిషన్‌ దాఖలు చేశారు.

ఈ విషయంపై చాలా రోజుల నుంచి కోర్టులో విచారణ సాగుతోంది. అయితే తాజాగా వేద నిలయం ఆమె మేనకోడలు దీపకే చెందుతుందని హైకోర్టు తీర్పు వెలువరించింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి