భారత ఓపెనర్‌ కేఎల్‌ రాహుల్‌ తన ప్రేమ గురించి చెప్పేశాడు! బాలీవుడ్ నటి, మోడల్‌ అతియా శెట్టిని ప్రేమిస్తున్నట్టు బహిరంగంగా వ్యక్తపరిచాడు. దాంతో టీమ్‌ఇండియాలో మరో ప్రేమ జంట కహానీ మొదలైంది!
నవంబర్‌ 5 అతియాశెట్టి పుట్టినరోజు. ఈ సందర్భంగా ఆమెకు రాహుల్‌ శుభాకాంక్షలు తెలియజేశాడు. 'హ్యాపీ బర్త్‌డే మై లవ్‌ (ఎమోజీ) అతియా శెట్టి' అని సోషల్‌ మీడియాలో కామెంట్‌ పెట్టాడు. గతంలో ఎన్నడూ అతడు ఇలా బహిరంగంగా తన ప్రేమను వ్యక్తం చేయలేదు. అప్పుడప్పుడు ఆమెతో కలిసి దిగిన చిత్రాలు మాత్రం పంచుకొనేవాడు.
కేఎల్‌ రాహుల్‌ తన ప్రేమ గురించి చెప్పడంతో క్రికెటర్లు, బాలీవుడ్ తారలు అభినందనల వర్షం కురిపించారు. రాహుల్‌ పోస్టుకు లైకులు కురిపించారు. ముఖ్యంగా అతియా తండ్రి సునీల్‌ శెట్టి, సోదరుడు అహన్‌ శెట్టి హార్ట్‌ ఎమోజీలతో స్పందించారు. అనుష్క శర్మ, సయామీ ఖేర్, సానియా మీర్జా, సికందర్‌ ఖేర్ లైకులు కొట్టారు. రోహిత్‌ శర్మ సతీమణి రితికా 'అక్కడొక బనానా చిప్‌ ఎమోజీ ఉంటే బాగుండేది అనుకున్నా' అని కామెంట్‌ పెట్టింది. పంజాబ్‌ కింగ్స్‌ క్రికెటర్‌ మన్‌దీప్‌ సింగ్‌ 'హ్యాపీబర్త్‌డే బాబీజీ అతియాశెట్టి' అని వ్యాఖ్యానించాడు.
ప్రస్తుతం అతియాశెట్టి దుబాయ్‌లోనే ఉంది. టీమ్‌ఇండియా క్రికెటర్ల కుటుంబ సభ్యులతో పాటే ఉంటోంది. తన భాగస్వామిగా అతియా పేరును రాహుల్‌ బీసీసీఐ వద్ద నమోదు చేయించాడని ఆలస్యంగా తెలిసింది. స్కాట్లాండ్‌పై బౌండరీలు, సిక్సర్ల వరద పారించేటప్పుడు స్టాండ్స్‌లో అతియా ఎగిరి గంతులేసింది.
అతియా, రాహుల్‌ చాలాకాలంగా ప్రేమించుకుంటున్నారు! కలిసి చాలా చోట్లకు వెళ్లారు. ఎన్నో పార్టీలకు అటెండ్‌ అయ్యారు. కానీ అధికారికంగా మాత్రం చెప్పేవాళ్లు కాదు. కొన్ని ఇంటర్వ్యూల్లో రాహుల్‌ను ఎవరినైనా ప్రేమించారా అని అడగ్గా తెలివిగా తప్పించుకొనేవాడు. ఇప్పటికైతే క్రికెట్‌తోనే ప్రేమలో పడ్డా అనేవాడు. చాలా సందర్భాల్లో అతియా శెట్టి.. రాహుల్‌తో కలిసిన చిత్రాలను ఇన్‌స్టాలో పెట్టేది. అందులో వారిద్దరూ ఎంతో చనువుగా కనిపించేవారు. ఈ మధ్యే నుమీ పారిస్‌ కళ్లద్దాల యాడ్‌లో కలిసి నటించారు. తాజాగా తెలిసిన విషయం ఏంటంటే వారిద్దరూ ఐసీసీ ప్రపంచ టెస్టు ఛాంపియన్‌షిప్‌ కోసం మాంచెస్టర్లోనే ఉన్నారట.
Also Read: T20 WC Standings: ఆఫ్ఘన్ పైనే భారం వేశాం.. సెమీస్‌కు ఆ దారి మాత్రమే!
Also Read: IND vs SCO, Match Highlights: 6.3 ఓవర్లలో టార్గెట్ ఫినిష్.. అదరగొట్టిన టీమిండియా!
Also Read: NZ vs NAM, Match Highlights: సెమీస్ వైపు న్యూజిలాండ్.. నమీబియాపై భారీ విజయం