Priyanka Gandhi Update: 'రైతులకు ఇవ్వడానికి డబ్బుల్లేవ్.. మోదీకి మాత్రం రూ.8 వేల కోట్ల ఖరీదైన విమానం'

ప్రధాని నరేంద్ర మోదీపై కాంగ్రెస్ ప్రధాన కార్యదర్శి ప్రియాంక గాంధీ విమర్శలు గుప్పించారు.

ఉత్తర్‌ప్రదేశ్ అసెంబ్లీ ఎన్నికలు దగ్గర పడుతోన్న వేళ కాంగ్రెస్ ప్రధాన కార్యదర్శి ప్రియాంక గాంధీ.. భాజపాపై విమర్శల దాడి పెంచారు. చెరుకు రైతులకు చెల్లించాల్సిన బకాయిలు కూడా ఉత్తర్‌ప్రదేశ్ ప్రభుత్వం ఇవ్వలేకపోతుందని ఎద్దేవా చేశారు. మోరాదాబాద్‌లో జరిగిన ప్రతిజ్ఞ రాలిలో యూపీ సర్కార్‌పై విమర్శలు కురిపించారు.

చెరుకు రైతుల బకాయిలు చెల్లించడానికి రూ.4 వేల కోట్లు మాత్రమే అవుతుంది. కానీ ప్రభుత్వం అది చెల్లించలేదు. కానీ ప్రధాని నరేంద్ర మోదీ మాత్రం గత ఏడాది కరోనా సమయంలో రూ.8 వేల కోట్లు పెట్టి ఓ ప్రైవేట్ విమానాన్ని కొనుగోలు చేశారు. రూ. 20 వేల కోట్లు పెట్టి పార్లమెంటు సుందరీకరణ పనులు చేపట్టడానికి డబ్బులు ఉన్నాయి.. కానీ మీ బకాయిలు చెల్లించేందుకు మాత్రం లేవు. -                                                      ప్రియాంక గాంధీ, కాంగ్రెస్ ప్రధాన కార్యదర్శి

సాగు చట్టాల రద్దు ఉద్యమంలో చనిపోయిన రైతులకు ప్రధాని మోదీ కనీసం నివాళులు అర్పించలేదని ప్రియాంక గాంధీ విమర్శించారు.

700 మంది రైతులు చనిపోతే కనీసం రెండు నిమిషాలు కూడా వారి గురించి మోదీ మాట్లాడలేదు. లఖింపుర్ ఖేరీ ఘటనలో రైతులను వాహనం ఎక్కించి తొక్కి చంపేశారు. దాని గురించి కూడా భాజపా స్పందించలేదు.                                                       - ప్రియాంక గాంధీ, కాంగ్రెస్ ప్రధాన కార్యదర్శి

రానున్న ఉత్తర్‌ప్రదేశ్ అసెంబ్లీ ఎన్నికల్లో కాంగ్రెస్ ఒంటరిగా పోటీ చేయనుంది. ఇప్పటికే ఓటర్లను ఆకర్షించేందుకు ప్రియాంక గాంధీ పలు వాగ్దానాలు చేశారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి