Gaya Naxal Attack: భయంభయం.. ఒకే కుటుంబానికి చెందిన నలుగురిని ఉరి తీసిన నక్సల్స్!

బిహార్‌లో ఒకే కుటుంబానికి చెందిన నలుగురిని నక్సలైట్లు ఉరితీశారు. పోలీసులకు ఇన్ఫార్మర్లుగా వ్యవహరించినందుకే ఇలా చేసినట్లు తెలిపారు.

బిహార్ గయాలో నక్సలైట్లు దారుణానికి తెగబడ్డారు. మున్‌వార్ గ్రామంలో ఒకే కుటుంబానికి చెందిన నలుగురిని ఉరి తీశారు. అంతేకాకుండా రెండు ఇళ్లలను డైనమైట్లతో పేల్చేశారు. ఈ దాడిని ప్రతీకార చర్యగా పోలీసులు భావిస్తున్నారు.

సీపీఐ-మావోయిస్టులు అనే నిషేధిత నక్సలైట్ సంస్థ ఈ దారుణానికి పాల్పడినట్లు తెలుస్తోంది. 2021 మార్చి 16న నలుగురు నక్సలైట్లు పోలీసుల ఎన్‌కౌంటర్‌లో మృతి చెందారు. దానికి ప్రతీకారంగానే ఈ దాడికి పాల్పడ్డారు మావోయిస్టులు. ఆ ఎన్‌కౌంటర్‌లో ఈ కుటుంబం ఇన్ఫార్మర్లుగా వ్యహరించినందుకే ఇలా జరిగిందని మావోయిస్టులు పోస్టర్ అంటించారు. గ్రామంలో ఎవరైనా తమకు నమ్మక ద్రోహం చేస్తే వారికీ ఇదే గతి పడుతుందని హెచ్చరించారు.

పోస్టర్‌లో..

ఈ ఎన్‌కౌంటర్‌కు ప్రతీకారంగానే తాము సర్జు సింగ్ భోక్తా ఇంటిపై దాడి చేశామని కరపత్రంలో మావోయిస్టులు పేర్కొన్నారు. మరణించిన నలుగురిని సర్జు సింగ్ ఇద్దరు​ కుమారులు సాతిందర్ సింగ్ భోక్తా, మహేంద్ర సింగ్ భోక్తా, వారి భార్యలుగా గుర్తించారు. 

భయంభయం..

ఆదివారం తెల్లవారుజామున 4 గంటలకు ఈ ఘటన జరిగినట్లు తెలుస్తోంది. సమాచారం అందగానే పోలీసులు, సీఆర్​పీఎఫ్ సిబ్బంది హూటాహుటిన ఘటనా స్థలానికి చేరుకున్నారు. ఎస్​ఎస్​పీ ఆదిత్య కుమార్​, ఎస్పీ రాకేశ్​ కుమార్​ పరిస్థితిని పర్యవేక్షించారు. పదుల సంఖ్యలో సిబ్బందితో గ్రామంలో పహారా కాస్తున్నారు.

దాదాపు 25 మంది నక్సలైట్లు సమూహంగా వచ్చి ఈ నలుగురిని ఉరి తీసినట్లు గ్రామంలోని ప్రత్యక్ష సాక్షి తెలిపారు.

గతంలోనూ మార్చ్​గా వచ్చి బెదిరించినట్లు వెల్లడించారు. నక్సలైట్ల చర్యతో గ్రామంలో భయానక వాతావరణం నెలకొంది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి