Budget 2022: దయ చూపాలమ్మా 'నిర్మలమ్మ'! బడ్జెట్‌కు ముందు వేతన జీవుల వేడుకోలు!!

కరోనా మహమ్మారి మళ్లీ పంజా విసురుతుండటంతో కొన్ని రిబేట్లు ఇస్తారేమోనని వేతన జీవులు ఆశగా ఎదురు చూస్తున్నారు. ఎందుకంటే ఇంటి నుంచి పని చేయడం వల్ల ఉద్యోగులకు ఖర్చులు పెరిగాయి.

Budget 2022 Telugu, Union budget 2022: ఫిబ్రవరి 1, కోసం దేశవ్యాప్తంగా ఉద్యోగులంతా ఆసక్తిగా ఎదురు చూస్తున్నారు. బడ్జెట్‌ను ప్రవేశపెడుతుండటమే ఇందుకు కారణం. ఈసారి కేంద్ర ఆర్థిక మంత్రి 'నిర్మలమ్మ' తమకు మరిన్ని మినహాయింపులు ఇవ్వాలని వేతన జీవులు కోరుకుంటున్నారు. దీనికి తోడు రిబేట్లు, అదనపు అలవెన్సులు వచ్చేలా చూడాలని అర్థిస్తున్నారు.

ఇప్పటికే ఆర్థిక వ్యవస్థకు ఊతం ఇచ్చేందుకు ప్రభుత్వం ఉద్దీపన ప్యాకేజీలు ప్రకటించిన సంగతి తెలిసిందే. ఇప్పుడు కరోనా మహమ్మారి మళ్లీ పంజా విసురుతుండటంతో కొన్ని రిబేట్లు ఇస్తారేమోనని వేతన జీవులు ఆశగా ఎదురు చూస్తున్నారు. ఎందుకంటే ఇంటి నుంచి పని చేయడం వల్ల ఉద్యోగులకు ఖర్చులు పెరిగాయి. ఇంటర్నెట్‌, టెలిఫోన్‌, ఇంట్లో కార్యాలయం కోసం ఫర్నీచర్‌, అదనంగా విద్యుత్‌ బిల్లులు వస్తున్నాయి. పైగా ద్రవ్యోల్బణం వల్ల నిత్యావసర వస్తువుల ధరలు పెరిగాయి. వైద్య, ఆరోగ్య ఖర్చులూ కొండెక్కాయి.

అందుకే ప్రభుత్వం పన్ను మినహాయింపు పరిమితి పెంచాలని ఉద్యోగ వర్గాలు కోరుకుంటున్నాయి. 2018లో ఉద్యోగుల వేతనం నుంచి రూ.50,000 వరకు పన్ను మినహాయింపుగా ఇస్తున్నారు. దీనిని మరింత పెంచాలని వారు వినతి చేస్తున్నారు. 'కరోనా వల్ల ఉద్యోగులు ఇంటి నుంచి పనిచేస్తున్నారు. దీనివల్ల వారి ఖర్చులు పెరిగాయి. కాబట్టి యజమానులు వారికి ఆ ఖర్చులను అలవెన్స్‌ రూపంలో ఇవ్వాలి' అని డెలాయిట్‌ ఇండియా ప్రిబడ్జెట్‌ అంచనాల్లో వివరించింది. ఇప్పుడిస్తున్న రూ.50,000కు అదనంగా మరో రూ.50000 వరకు మినహాయింపు ఇవ్వాలని కోరుతోంది.

మరికొన్ని సంస్థలైతే ఉద్యోగుల ఆదాయపన్ను విధానంలో మార్పులు వస్తాయని అంచనా వేస్తున్నాయి. రాబోయే ఆర్థిక ఏడాది నుంచి కొత్త వేతన విధానం అమల్లోకి వస్తుందని భావిస్తున్నాయి. ఇక ఛార్టెడ్‌ అకౌంటెంట్స్‌ ఆఫ్‌ ఇండియా (ICAI) ఇంటి నుంచి పని చేయడం వల్ల అయ్యే ఖర్చులకు మినహాయింపు ఇవ్వాలని కోరుతోంది. రూ.లక్ష వరకు స్టాండర్డ్‌ డిడక్షన్‌ ఇవ్వాలని డిమాండ్‌ చేస్తోంది. మరి 'నిర్మలమ్మ' ఏం చేస్తుందో చూడాలి!!