Nellore Corporation:అరగుండు.. అరమీసం.. ఎన్నికల ఫలితాలపై టీడీపీ నేత వింత నిరసన...

నెల్లూరు కార్పొరేషన్‌ను వైసీపీ అక్రమంగా గెలుచుకుందని... ఓటర్లను, నాయకులను ప్రలోభ పెట్టిందని ఆరోపిస్తోంది టీడీపీ. ఇవే ఆరోపణలతో ఆ పార్టీ నేత ఒకరు వినూత్నంగా నిరసన తెలిపారు.

నెల్లూరు కార్పొరేషన్ ఎన్నికల్లో వైసీపీ క్లీన్ స్వీప్ చేసిన సంగతి తెలిసిందే. ఏక మొత్తంగా 54 డివిజన్లకు 54 డివిజన్లను వైసీపీ కైవసం చేసుకుంది. టీడీపీకి అస్సలు ఛాన్సే లేకుండా చేసింది. అయితే వైసీపీ అక్రమాలతో ఈ ఎన్నికల్లో గెలిచిందని టీడీపీ నేతలు ఆరోపిస్తున్నారు. 49, 50వ డివిజన్లలో టీడీపీని ఓడించేందుకు వైసీపీ ఏకంగా 3 కోట్ల రూపాయలు ఖర్చు చేసిందని టీడీపీ నేత కప్పిర శ్రీనివాసులు వింత నిరసనకు దిగారు. 

అరగుండు.. మెడలో పలక.. ఎన్నికల ఫలితాలు వెలువడిన వెంటనే టీడీపీ నేత కప్పిర శ్రీనివాసులు అరగుండు గీయించుకున్నారు, అరమీసం తీయించుకున్నారు. ఈ వింతైన వేషంతోపాటు.. మెడలో పలక తగిలించుకున్నారు. జగన్ పోవాలి, బాబు రావాలి అంటూ దానిమీద రాసుకున్నారు. మంత్రి, ఆయన అనుచరులు, ఇతర నాయకులు టీడీపీ ఓటమికోసం కోట్లు ఖర్చు పెట్టారని ఆరోపించారాయన. 

ఎంతకాలం ఈ దీక్ష.. వచ్చే ఎన్నికల్లో చంద్రబాబు గెలిచి, ముఖ్యమంత్రి అయ్యే వరకు ఈ దీక్షలో ఉంటానని ప్రకటించారు టీడీపీ నేత కప్పిర శ్రీనివాసులు. మొత్తమ్మీద నెల్లూరు కార్పొరేషన్ ఎన్నికల్లో వైసీపీ విజయం తర్వాత టీడీపీ చేపట్టిన ఈ నిరసన సంచలనంగా మారింది. అరగుండు, అరమీసంతో టీడీపీ నాయకుడి వీడియో సోషల్ మీడియాలో వైరల్ గా మారింది. వైసీపీ నాయకుల తీరు మారాలని, ఏకపక్షంగా ఎన్నికలు జరిపారని అన్నారాయన.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి