India-Russia Summit: భారత్- రష్యా మధ్య 4 ఒప్పందాలు.. అమేఠీలో 6 లక్షల ఏకే-203 రైఫిళ్ల తయారీకి ఓకే

భారత్- రష్యా మధ్య రక్షణ రంగంలో మొత్తం నాలుగు ఒప్పందాలు కుదిరాయి. ఇందులో భాగంగా ఉత్తర్‌ప్రదేశ్‌లో 6 లక్షలకు పైగా ఏకే203 రైఫిళ్లను ఇరు దేశాలు తయారు చేయనున్నాయి.

భారత్- రష్యా మధ్య కీలక ఒప్పందం కుదిరింది. 'మేక్ ఇన్ ఇండియా'లో భాగంగా ఉత్తర్‌ప్రదేశ్ అమేఠీలో 6 లక్షలకు పైగా ఏకే203 రైఫిల్స్‌ను భారత్, రష్యా సంయుక్తంగా తయారు చేయనున్నాయి. ఈ ఒప్పందంపై భారత్, రష్యా రక్షణ మంత్రులు రాజ్‌నాథ్‌ సింగ్, జెనరల్ సెర్గే షోయిగు సంతకం చేశారు.

నాలుగు ఒప్పందాలు..

ఐఆర్​ఐజీసీఎమ్​-ఎమ్​టీసీ(ఇండియా-రష్యా ఇంటర్​ గవర్న్​మెంటల్​ కమిషన్​ ఆన్​ మిలిటరీ అండ్​ మిలిటరీ టెక్నికల్​ కోఆపరేషన్​) 20వ సమావేశంలో మొత్తం నాలుగు ఒప్పందాలు కుదిరాయి. ఏకే203 రైఫిల్స్​ తయారీతో పాటు రానున్న 10 ఏళ్లలో రక్షణ సహకారంపైనా ఇరు దేశాలు ఒప్పందాల్ని చేసుకున్నాయి.

రష్యాతో భారత్​కు సుదీర్ఘ కాలంగా వ్యూహాత్మక భాగస్వామ్యం ఉంది. భారత్​కు సహకారం అందించిన రష్యాకు అభినందనలు. అయితే ఒక దేశంతో బంధాన్ని బలోపేతం చేసుకోవడం అంటే.. మరో దేశాన్ని లక్ష్యంగా చేసుకున్నట్టు కాదన్న విషయాన్ని ఇక్కడ అర్థం చేసుకోవాలి.                                                - రాజ్‌నాథ్ సింగ్, భారత రక్షణ మంత్రి

భారత్‌కు రష్యా అందించే సహకారంపై మేం సంతృప్తిగా ఉన్నాం. 'ప్రోగ్రాం ఆఫ్ ది డెవలప్‌మెంట్ ఆఫ్ ది మిలిటరీ టెక్నికల్ కోపరేషన్' కింద 2031 వరకు ఇరు దేశాల మధ్య ఒప్పందం చేసుకున్నాం. ఇరు దేశాలకు ఇది చాలా కీలకం.                                      - ఆర్మీ జనరల్ ద్మైత్రీ షుగేవ్, డైరక్టర్ ఆఫ్ ది ఫెడరల్ సర్వీస్ ఫర్ మిలిటరీ-టెక్నికల్ కోపరేషన్, రష్యా

2+2 చర్చలు..

అంతకుముందు భారత్, రష్యా విదేశాంగ, రక్షణ మంత్రుల మధ్య 2+2 చర్చలు జరిగాయి. ఈ చర్చల్లో ప్రాంతీయ శాంతి, సుస్థిరతలు సహా ఇరు దేశాల మధ్య పరస్పర సహకారంపై మంత్రులు చర్చించారు. ముఖ్యంగా అఫ్గానిస్థాన్‌లో తాజా పరిస్థితులపై ఇరు దేశాల మంత్రులు మధ్య కీలక చర్చ జరిగింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి