Drugs On Cruise Ship Case: బెయిల్ దొరికినా ఆర్యన్‌కు తప్పని చిక్కులు.. ప్రశ్నించేందుకు ఎన్‌సీబీ సమన్లు

డ్రగ్స్ కేసులో ఆర్యన్‌ ఖాన్‌ను ప్రశ్నించేందుకు ఎన్‌సీబీ సమన్లు జారీ చేసింది.

ముంబయి డ్రగ్స్ కేసులో బాలీవుడ్ సూపర్ స్టార్ షారుక్ ఖాన్ కుమారుడు ఆర్యన్ ఖాన్‌కు సమన్లు జారీ చేసింది ఎన్‌సీబీ ప్రత్యేక దర్యాప్తు బృందం. డ్రగ్స్ కేసులో ఆర్యన్‌ను ప్రశ్నించేందుకు సమన్లు జారీ చేసింది. ముంబయి కోర్డేలియా క్రూయీజ్ ఎంప్రెస్ షిప్‌లో అక్టోబర్ 3న జరిగిన రేవ్ పార్టీపై పోలీసులు దాడి చేశారు. ఈ దాడిలో భారీ ఎత్తున డ్రగ్స్ రాకెట్ బయటపడింది. ఇందులో ఆర్యన్ ఖాన్‌ను ఎన్‌సీబీ అధికారులు అరెస్ట్ చేశారు. మొత్తం 22 రోజులు ఆర్యన్ జైలులో ఉన్నాడు.

ఆర్యన్‌తో పాటు..

ఆర్యన్ ఖాన్‌తో పాటు అర్బాజ్ సేత్ మర్చెంట్, అచిత్ కుమార్‌కు కూడా ఎన్‌సీబీ సమన్లు జారీ చేసింది. వారి వాంగ్మూలాలను అధికారులు రికార్డ్ చేశారు. ముంబయి వచ్చిన ప్రత్యేక బృందం వీరిని ప్రశ్నించింది. ఈ కేసు దర్యాప్తు నుంచి సమీర్ వాంఖడేను తొలిగించి ఆ బాధ్యతలను సంజయ్ కుమార్ సింగ్‌కు అప్పజెప్పింది ఎన్‌సీబీ. కొత్త బృందం ఈ కేసును దర్యాప్తు చేస్తోంది. దీనిలో భాగంగానే నేడు సమన్లు జారీ చేసింది.

బెయిల్ కండీషన్లు..

డ్రగ్స్ కేసులో ఆర్యన్‌ ఖాన్‌కు బెయిల్ ఇచ్చినప్పటికీ దర్యాప్తు కోసం ఎప్పడూ పిలిచినా వెళ్లాలని కోర్టు తెలిపింది.

ఇవే షరతులు.. 

• 23 ఏళ్ల ఆర్యన్ ఖాన్‌ రూ.లక్ష వ్యక్తిగత బాండ్ చెల్లించాలి.


• ఒకరు లేదా ఇద్దరు వ్యక్తుల పూచీకత్తు సమర్పించాలి.


• ఎన్‌డీపీఎస్ కోర్టు వద్ద పాస్‌పోర్టును సరెండర్ చేయాలి.


• గ్రేటర్ ముంబయి దాటి వెళ్లాలంటే దర్యాప్తు అధికారికి తెలపాలి. ఎక్కడికి వెళ్తున్నారో వివరాలను కూడా తెలియజేయాలి.


• ముంబయిలోని ఎన్‌డీపీఎస్ ప్రత్యేక కోర్టు అనుమతి లేనిదే దేశం విడిచి వెళ్లకూడదు.


• ఈ కేసులో నిందితులుగా ఉన్న ఎవరితోనూ మాట్లాడేందుకు ప్రయత్నించకూడదు.


• ఈ కేసులో సాక్షులను, ఆధారాలను ప్రభావితం చేయకూడదు.


• ఈ కేసు గురించిన వివరాలు మీడియాకు చెప్పకూడదు.


• ప్రతి శుక్రవారం ఎన్‌సీబీ కార్యాలయంలో ఉ.11 గంటల నుంచి మధ్యాహ్నం 2 గంటల మధ్య హాజరు కావాలి.


• ఎన్‌సీబీ అధికారులు పిలిచినప్పుడు విచారణకు హాజరు కావాలి.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి