Omicron Crisis: దేవుడా..! ఒమిక్రాన్‌ను జయించిన వైద్యుడికి మళ్లీ కరోనా పాజిటివ్

ఒమిక్రాన్‌ను జయించిన ఓ వైద్యుడికి మళ్లీ కొవిడ్ సోకింది. ఇప్పటికే ఈ వేరియంట్‌పై ఆందోళన నెలకొన్న వేళ ఈ విషయం మరింత షాకింగ్‌గా ఉంది.

ఒమిక్రాన్ వేరియంట్ రోజురోజుకు భయపెడుతుంది. ఇప్పటికే దేశంలో 23 ఒమిక్రాన్ కేసులు బయటపడ్డాయి. అయితే ఒమిక్రాన్ వేరియంట్‌కు వ్యాప్తి ఎక్కువగా ఉంది కానీ లక్షణాలు తక్కువేనని ఇప్పటికే పలు అధ్యయనాలు వెల్లడించాయి. కానీ తాజాగా ఓ షాకింగ్ విషయం తెలిసింది. ఒమిక్రాన్‌ను జయించిన ఓ వ్యక్తికి మళ్లీ కొవిడ్ సోకింది. 

అదేలా సాధ్యం..?

దేశంలో తొలిసారి ఒమిక్రాన్​ పాజిటివ్​గా తేలిన ఇద్దరిలో ఒకరైన బెంగళూరు వైద్యుడికి మళ్లీ కొవిడ్ సోకింది. ఈ విషయాన్ని బృహత్​ బెంగళూరు మహానగర పాలికె అధికారులు తెలిపారు. ప్రస్తుతం ఆ వైద్యుడు ఐసోలేషన్‌లో ఉన్నట్లు అధికారులు తెలిపారు. అయితే ఎటువంటి లక్షణాలు లేవని పేర్కొన్నారు.

23కు చేరిన కేసులు..

భారత్‌లో కొత్త వేరియంట్ ఒమిక్రాన్‌ చాపకింద నీరులా విస్తరిస్తోంది. మహారాష్ట్రలో ఇటీవల మరో రెండు ఒమిక్రాన్ కేసులు నమోదయ్యాయి. దీంతో మరింత కలవరం పెరిగింది. మహారాష్ట్రలో ఇప్పటికే ఎనిమిది ఒమిక్రాన్  కేసులు వెలుగుచూశాయి. తాజాగా ముంబయిలో వచ్చిన కేసులతో మొత్తం సంఖ్య 10కి చేరింది. ఇటీవల దక్షిణాఫ్రికా నుంచి వచ్చిన 37 ఏళ్ల వ్యక్తితో పాటు అమెరికా నుంచి వచ్చిన మరో వ్యక్తి(36)కి ఒమిక్రాన్‌ పాజిటివ్ వచ్చినట్లు అధికారులు గుర్తించారు. దీంతో దేశవ్యాప్తంగా మొత్తం ఒమిక్రాన్ కేసుల సంఖ్య 23కి పెరిగింది.  

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి