Tragedy Looms Over a Family Ahead of Marriage: కుమార్తె పెళ్లి చూడకుండానే తండ్రి మృతి | ABP Desam

Jagtial జిల్లాలో ఓ పెళ్లింట తీవ్ర విషాదం నెలకొంది. రేపు కుమార్తె పెళ్లి ఉందనగా... ఆ అమ్మాయి తండ్రి ప్రమాదంలో మరణించారు. గొల్లపల్లి మండలం తిరుమలాపూర్ కు చెందిన నర్సయ్యకు ఇద్దరు కుమార్తెలు. చిన్న అమ్మాయి వివాహం రేపు వారి స్వగృహం వద్దే ఏర్పాటు చేసుకున్నారు. అవసరమైన సామాన్లు తీసుకుని వచ్చేందుకు తన అన్న కొడుకు అజయ్ తో కలిసి జగిత్యాలకు బయల్దేరారు. జాబితాపూర్ కు సమీపంలో వీరు ప్రయాణిస్తున్న కారును మరో కారు ఢీకొట్టింది. తీవ్రగాయాలపాలైన నర్సయ్య అక్కడికక్కడే మరణించారు. అజయ్ స్వల్పగాయాలతో బయటపడ్డాడు. పెళ్లింట తీవ్ర విషాదం నెలకొనటంతో కుటుంబసభ్యులు కన్నీరుమున్నీరుగా విలపిస్తున్నారు.