IND vs NZ, 1st Test: ద్రవిడ్‌ చెప్పిన 'సీక్రెట్‌' బయటపెట్టిన శ్రేయస్‌ అయ్యర్‌!

నాలుగో రోజు ఎక్కువ పరుగులు రాబట్టేందుకు ఏం చేయాలో రాహుల్‌ ద్రవిడ్‌ తనకు సూచించారని శ్రేయస్‌ అయ్యర్‌ తెలిపాడు. ఆ సూచన పాటించడం వల్లే అర్ధశతకం చేశానని పేర్కొన్నాడు.

కాన్పూర్‌ టెస్టు నాలుగో రోజు ఏం చేయాలో కోచ్‌ రాహుల్‌ ద్రవిడ్‌ తనకు చెప్పారని యువ ఆటగాడు శ్రేయస్‌ అయ్యర్‌ తెలిపాడు. ఎక్కువ పరుగులు చేసేందుకు, జట్టును ఆదుకొనేందుకు ఏం చేయాలో వివరించారని పేర్కొన్నాడు. తనకు వ్యక్తిగత రికార్డులు ముఖ్యం కాదని జట్టు గెలుపునకే ప్రాధాన్యం ఇస్తానని వెల్లడించాడు. ఆదివారం ఆట ముగిసిన తర్వాత అతడు మాట్లాడాడు.

న్యూజిలాండ్‌తో జరుగుతున్న తొలి టెస్టులో శ్రేయస్‌ అయ్యర్‌ అదరగొట్టాడు. తొలి ఇన్నింగ్స్‌లో కీలక శతకంతో జట్టును ఆదుకున్నాడు. ఇక రెండో ఇన్నింగ్స్‌లోనూ 51 పరుగులకే 5 వికెట్లు పడ్డ తరుణంలో కీలక ఇన్నింగ్స్ ఆడాడు. రవిచంద్రన్‌ అశ్విన్‌, వృద్ధిమాన్‌ సాహాతో కలిసి విలువైన భాగస్వామ్యాలు నమోదు చేశాడు. అరంగేట్రంలోనే శతకం, అర్ధశతకం బాదిన భారత తొలి క్రికెటర్‌గా అవతరించాడు. మ్యాచులో బాగా ఆడేందుకు తాను కోచ్‌ ద్రవిడ్‌ సలహాలు పాటించానని వెల్లడించాడు.

'ఏదేమైనా మేమీ మ్యాచ్‌ తప్పక గెలవాలి. నాకు అదే ముఖ్యం. సాధ్యమైనంత ఎక్కువ సేపు ఆడాలని ద్రవిడ్‌ సర్‌ చెప్పారు. వీలైనని పరుగులు చేయాలని సూచించారు. నేను పరుగులు చేయాలంటే ఎక్కువ సేపు క్రీజులో ఉండాలని తెలుసుకున్నా. సెషన్‌ మొత్తం ఆడాలన్న మానసిక ధోరణితో ఎక్కువ బంతులు ఆడాను. అంతకు మించి ఇంకేమీ ఆలోచించలేదు. వర్తమానంపై దృష్టి సారించాను' అని శ్రేయస్‌ తెలిపాడు.

'నిజాయతీగా చెప్పాలంటే పిచ్‌ అంత కఠినంగా ఏమీ లేదు. మేమీ పోటినిచ్చే స్కోరు చేయాలి. బహుశా 275-280 అనుకున్నాను. మేం మా స్పిన్నర్లపై విశ్వాసం ఉంచాం. ఆఖరి రోజు వారు ప్రత్యర్థిని కచ్చితంగా ఒత్తిడిలోకి నెట్టగలరు. ఆధిక్యంతో కలిసి 250 పైచిలుకు పరుగులు సరిపోతాయనే అనుకున్నా. అదృష్టవశాత్తు ఆ స్కోరు లభించింది' అని శ్రేయస్‌ వివరించాడు. ఇలాంటి ఒత్తిడిలో ఆడటం తనకు అలవాటేనని పేర్కొన్నాడు. రంజీల్లో ఎన్నోసార్లు  ఇలాంటి పరిస్థితుల్లో ఆడానని గుర్తుచేశాడు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి