Greatest Indian Test Batsman: 50 ఏళ్లలో భారత బెస్ట్‌ టెస్టు బ్యాటర్‌ సచిన్ కాదట! విజ్డెన్‌ పోల్‌లో ఫలితం ఏంటంటే?

గత 50 ఏళ్లలో భారత అత్యుత్తమ టెస్టు బ్యాటర్‌ ఎవరని విజ్డెన్‌ ఇండియా అభిమానులను ప్రశ్నించింది. దిగ్గజాలతో పోటీ పెట్టగా సచిన్ తెందూల్కర్, రాహుల్ ద్రవిడ్ విపరీతంగా పోటీపడ్డారు.

Greatest Indian Test Batsman, Sachin Tendulkar vs Rahul Dravid: గత 50 ఏళ్లలో భారత అత్యుత్తమ టెస్టు బ్యాట్స్‌మన్‌ ఎవరు? అంటే సచిన్ తెందూల్కర్‌, రాహుల్‌ ద్రవిడ్‌, వీవీఎస్‌ లక్ష్మణ్‌, సునిల్‌ గావస్కర్‌, వీరేంద్ర సెహ్వాగ్‌, గుండప్ప విశ్వనాథ్‌, విరాట్‌ కోహ్లీ వంటి పేర్లు వినిపిస్తాయి. ఎందుకంటే వీరంతా గొప్ప ఆటగాళ్లే. సుదీర్ఘ ఫార్మాట్లో దేశానికి అద్భుతమైన సేవలు అందించారు. అయితే వీరిలో ఎవరో ఒకరినే ఎంచుకోవాలంటే మాత్రం అంత సులభం కాదు.

విజ్డెన్‌ ఇండియా అభిమానులకు ఈ తరహాలో పోల్‌నే నిర్వహించింది. గత 50 ఏళ్లలో భారత అత్యుత్తమ టెస్టు బ్యాటర్‌ ఎవరని అభిమానులను ప్రశ్నించింది. సచిన్‌, విశ్వనాథ్‌, వీవీఎస్ లక్ష్మణ్‌, విరాట్‌ కోహ్లీ, రాహుల్‌ ద్రవిడ్‌, వీరేంద్ర సెహ్వాగ్‌, సునిల్‌ గావస్కర్‌, చెతేశ్వర్‌ పుజారాను ఇందుకు ఎంపిక చేసింది. అభిమానుల ఓట్లు వేయగా... ఆఖరికి సచిన్‌, ద్రవిడ్‌ విపరీతంగా పోటీపడ్డారు. చాలా రోజుల వరకు ఈ ఇద్దరు దిగ్గజాల ఓటింగ్‌ శాతం 49, 51 మధ్యే సాగింది. ఫలితం వెల్లడించేందుకు ఈ రోజు సాయంత్రమే చివరి గడువు.

ఈ పోటీలో సచిన్‌ త్రుటిలో స్వల్ప తేడాతో వెనకబడ్డారు. దాంతో ఈ అర్ధశతాబ్దపు భారత అత్యుత్తమ టెస్టు బ్యాటర్‌గా ద్రవిడ్‌ను విజ్డెన్‌ ప్రకటించింది. పోటీలో మిస్టర్‌ డిపెండబుల్‌ గెలిచినప్పటికీ సచిన్‌ తక్కువ కాదని వెల్లడించింది. వీరిద్దరూ దిగ్గజాలేనని పేర్కొంది. 

'మీరంతా ఓటింగ్‌ చేసినందుకు ధన్యవాదాలు. మిమ్మల్ని చాలా కష్టమైన పోటీలోకి ఆహ్వానించామని తెలుసు. ఇంత మందిలో అత్యుత్తమ బ్యాటర్‌ను ఎంపిక చేయడం సవాలే. ఆటలోని హీరోలను మేమెంతో ఇష్టపడతాం. గౌరవిస్తాం. పోల్‌ ఎలా ముగిసినప్పటికీ సచిన్‌, ద్రవిడ్‌ ఇద్దరూ ఆల్‌టైం గ్రేటే. వారిద్దరి బ్యాటింగ్‌ను చూసే అదృష్టం మనకు దక్కింది' అని విజ్డెన్‌ ఫేస్‌బుక్‌లో పేర్కొంది.