భారత్‌కు విద్రోహ డ్రోన్లు భద్రతాపరమైన చిక్కులు తెచ్చిపెడుతున్నాయి. దేశ సరిహద్దుల్లో రక్షణ సిబ్బందికి సవాళ్లు విసురుతున్నాయి. వీటి ద్వారా ఆయుధాలు చేరవేసి మనదేశంలో విధ్వంసం సృష్టించాలని పాకిస్థాన్‌ కుట్రలు పన్నుతోంది. వీటిని ధ్వంసం చేసేందుకు భారత్ రక్షణశాఖ దృష్టి పెట్టింది. ఈ నేపథ్యంలోనే నావల్ యాంటీ డ్రోన్ సిస్టమ్ కోసం బీఈఎల్ తో భారత నౌకాదళం కాంట్రాక్ట్ సంతకం చేసింది.
హైలెట్స్ ఇవే..
- ఇది తొలి స్వదేశీ యాంటీ డ్రోన్ వ్యవస్థ. తొలుత భారత నౌకాదళంలో ఇది చేరనుంది.
- డ్రోన్లను వెను వెంటనే గుర్తించి, మైక్రో డ్రోన్లను ఈ రక్షణ వ్యవస్థ జామ్ చేయగలదు.
- డ్రోన్లను గుర్తించి సాఫ్ట్‌కిల్‌, హార్డ్‌కిల్‌ విధానాల ద్వారా వాటిని నిర్వీర్యం చేస్తుంది.
- ఇదే తరహాలో భారత ఆర్మీ, వాయుసేనతో కూడా బీఈఎల్ కాంట్రాక్ట్ సంతకం చేయనుంది.
జీపీఎస్‌ జామింగ్‌
విద్రోహ డ్రోన్ తన మార్గనిర్దేశం కోసం జీపీఎస్‌ను వాడుతుంటుంది. ఆ జీపీఎస్‌ సంకేతాలను ఈ వ్యవస్థ ఏమారుస్తుంది. ఈ విధానం ద్వారా లోహవిహంగాన్ని తన గమ్యస్థానానికి వెళ్లకుండా చేయవచ్చు. కొన్ని అధునాతన పద్ధతుల్లో స్పూఫింగ్‌ విధానం ద్వారా తాను వేరే చోట ఉన్నట్లుగా ఆ డ్రోన్‌ను భ్రమింపచేస్తుంది.
Also Read: Al Qaeda on Taliban: తాలిబన్లకు అల్ ఖైదా అభినందనలు.. 'కశ్మీర్'పై కీలక వ్యాఖ్యలు
పాక్ కు చెక్..
ఏటా 100-150 సార్లు విద్రోహ డ్రోన్లు భారత్‌లోకి చొరబడుతున్నట్లు అంచనా. జమ్మూలోని వైమానిక దళ స్థావరంలో జూన్ 27న జరిగిన డ్రోన్ దాడి, జులై 14న సరిహద్దుల్లో ఒక క్వాడ్‌ కాప్టర్‌ చొరబాటు యత్నం ఈ కోవలోనివే. ఈ సవాళ్లను ఎలా ఎదుర్కొనాలనేది.. ఇప్పుడు మనముందున్న ప్రధాన సమస్య. దీనికి పరిష్కారంగా యాంటీ డ్రోన్ సాంకేతికతపై మనదేశం దృష్టి సారించింది.