సినిమా రివ్యూ: ఎ థర్స్‌డే
రేటింగ్: 3/5
నటీనటులు: యామి గౌతమ్, అతుల్ కులకర్ణి, నేహా ధూపియా, డింపుల్ కపాడియా తదితరులు
ఎడిటర్: సుమిత్ కొటియన్
సినిమాటోగ్రఫీ: అనుజ్ రాకేష్ ధావన్
సంగీతం: రూషిన్ దలాల్, కైజాద్ గెర్దా
నిర్మాత: రోనీ స్క్రువాలా, ప్రేమ్‌నాథ్ రాజగోపాలన్
దర్శకత్వం: బెహజాద్ కంబాటా
విడుదల తేదీ: ఫిబ్రవరి 17, 2022 (డిస్నీప్లస్ హాట్‌స్టార్‌లో విడుదల)
A Thursday: ‘నువ్విలా’, ‘గౌరవం’, ‘కొరియర్ బాయ్ కల్యాణ్’ సినిమాలతో తెలుగు ప్రేక్షకులకు కూడా పరిచయం అయిన నటి యామి గౌతమ్. ఆ తర్వాత బాలీవుడ్‌లో మంచి అవకాశాలు రావడంతో అక్కడే సెటిలైపోయింది. యామి ప్రధాన పాత్రలో నటించిన ‘ఎ థర్స్‌డే’ సినిమా డిస్నీప్లస్ హాట్‌స్టార్‌లో నేరుగా విడుదల అయింది. అతుల్ కులకర్ణి, నేహా ధూపియా, డింపుల్ కపాడియా వంటి నటులు ఇందులో ఉండటం, ట్రైలర్ మంచి థ్రిల్లర్ ఫీల్ కలిగించడంతో ఈ సినిమాపై మంచి అంచనాలు నెలకొన్నాయి. ఇంతకీ ఈ సినిమా ఎలా ఉందంటే?
కథ: నైనా జైస్వాల్ (యామి గౌతమ్) ఒక ప్లేస్కూల్ నడుపుతూ ఉంటుంది. రోహిత్ (కరణ్‌వీర్ శర్మ) అనే లాయర్‌తో ప్రేమలో ఉంటుంది. ఒకరోజు సడెన్‌గా తన స్కూల్‌లో ఉన్న 16 మంది పిల్లలను బందీలుగా తీసుకుని రూ.ఐదు కోట్లు డిమాండ్ చేస్తుంది. నిరాకరించినందుకు ఒక పిల్లాడిని కెమెరా ముందే చంపేస్తుంది. అసలు తన లక్ష్యం ఏంటి? ప్రధాన మంత్రి మాయ రాజగురును (డింపుల్ కపాడియా) ఎందుకు కలవాలనుకుంటుంది?ఈ విషయాలు తెలుసుకోవాలంటే సినిమా చూడాల్సిందే.
విశ్లేషణ: ముందుగా ఈ సినిమా పేరు వినగానే...2007లో నసీరుద్దీన్ షా, అనుపమ్ ఖేర్ ప్రధాన పాత్రలో నటించిన ‘ఎ వెడ్నెస్‌డే’ సినిమా గుర్తుకు వస్తుంది. కేవలం పేరు మాత్రమే కాకుండా సినిమా కూడా అదే టెంపోలో సాగుతుంది. ముందుగా కథని దర్శకుడి పాయింట్ ఆఫ్ వ్యూలో చెప్తూ ప్రధాన పాత్ర పోషించిన వారిని విలన్‌గా చూపించడం... ఆ తర్వాత కథను ప్రధాన పాత్ర కోణంలోకి మార్చి వారిపై సానుభూతి కలిగేలా చేశారు. తెలుగులో ఈ మధ్య వచ్చిన ‘వి’ సినిమా ట్రీట్‌మెంట్ కూడా ఇలానే ఉంటుంది.
‘ఎ వెడ్నేస్‌డే’ ఉగ్రవాదులపై ప్రతీకారం నేపథ్యంలో తెరకెక్కగా... ‘ఎ థర్స్‌డే’ మరో సమస్య నేపథ్యంలో రూపొందింది. సినిమాలో కీలక ట్విస్ట్‌కు, ఈ సమస్యకు ముడి పడి ఉంటుంది కాబట్టి దాన్ని ఇక్కడ రివీల్ చేయడం లేదు. సినిమా టెంపో కూడా ఒక పద్ధతిలో సాగుతుంది. కథలోకి వెళ్లడానికి కూడా దర్శకుడు ఎక్కువ సమయం తీసుకోలేదు. ప్రారంభం అయిన ఐదు నిమిషాల నుంచే తర్వాత ఏం జరుగుతుంది అనే ఆసక్తిని కలిగించడంలో దర్శకుడు సక్సెస్ అయ్యాడు.
నైనాకు ఎదురైన సమస్య ప్రస్తుతం దేశంలో ఒక బర్నింగ్ టాపిక్ కావడంతో ప్రేక్షకులు తన పాత్రకు చాలా ఈజీగా కనెక్ట్ అవుతారు. దీంతో పాటు చివర్లో రాసుకున్న ట్విస్ట్ కూడా షాకింగ్‌గా మొత్తం సినిమాను జస్టిఫై చేసేలా ఉంటుంది. అయితే సినిమాలో కొన్ని లాజిక్స్ కూడా మిస్సయినట్లు కనిపిస్తుంది. 16 మంది పిల్లలను హోస్టేజ్‌గా తీసుకున్న ఒక వ్యక్తిని ప్రధాని నేరుగా కలవడానికి ఒప్పుకోవడం అంత కన్విన్సింగ్‌గా లేదు. ఇలాంటి చిన్న చిన్న లోపాల విషయంలో కూడా కొంచెం శ్రద్ధ వహించి ఉంటే సినిమా ఎ వెడ్నెస్‌డే స్థాయిలో ఉండేది.
ఇక నటీనటుల విషయానికి వస్తే... నైనా పాత్రలో యామి గౌతమ్ జీవించింది. యామి గౌతమ్ ఎంత మంచి నటో ఇంతకు ముందు వచ్చిన ‘కాబిల్’ సినిమా ద్వారానే అందరికీ తెలిసింది. ఈ సినిమా జరుగుతున్నంత సేపు మనకు యామి గౌతమ్ కాకుండా కేవలం నైనా మాత్రమే కనిపిస్తుంది. ఇన్‌స్పెక్టర్ జావెద్ ఖాన్ పాత్రలో అతుల్ కులకర్ణి, ఏసీపీ కేథరిన్ అల్వారెజ్ పాత్రలో నేహా ధూపియా బాగా నటించారు. మనీ హెయిస్ట్‌లో గర్భంతో ఉండే పోలీస్ ఆఫీసర్ అలీసియా సియారా ఇన్‌స్పిరేషన్‌తో నేహా ధూపియా పాత్ర రాసుకున్నట్లు అనిపిస్తుంది. ప్రధాన మంత్రి మాయా రాజ్‌గురు పాత్రలో డింపుల్ కపాడియా గంభీరంగా కనిపిస్తుంది.
ఓవరాల్‌గా చూసుకుంటే... ఈ సినిమా మంచి థ్రిల్లర్. ప్రేక్షకులను కుర్చీ అంచున కూర్చోబెట్టే సస్పెన్స్‌తో పాటు ఆలోచింపచేసే పాయింట్ కూడా ఇందులో ఉంటుంది. ఈ వీకెండ్‌లో ఒక మంచి థ్రిల్లర్ సినిమా చూడాలనుకుంటే ఇది పర్ఫెక్ట్ చాయిస్.