Pfizer Covid Pill: ఒమిక్రాన్‌కు ఇక చెక్ .. టాబ్లెట్ వచ్చేసిందోచ్.. త్వరలోనే మార్కెట్లోకి!

ఒమిక్రాన్ వేరియంట్‌పై సమర్థవంతంగా పనిచేసే ఓ టాబ్లెట్‌ను ఫైజర్ కంపేనీ తయారు చేసింది. త్వరలోనే ఇది మార్కెట్లోకి రానుంది.

ఒమిక్రాన్‌ వేరియంట్ దెబ్బకు ప్రపంచం గడగడలాడుతోంది. ఇప్పటికే పలు దేశాల్లో ఒమిక్రాన్ కేసులు గణనీయంగా పెరుగుతున్నాయి. ఇలాంటి వేళ ఫైజర్ ఓ శుభవార్త చెప్పింది. తాము తయారు చేసిన యాంటివైరల్ కొవిడ్-19 టాబ్లెట్.. ఒమిక్రాన్‌పై 90 శాతం సమర్థవంతంగా పనిచేస్తుందని ప్రకటించింది.

ఒమిక్రాన్‌ వల్ల ఆసుపత్రిలో చేరడం, మరణాలు, హై రిస్క్ నుంచి ఈ పిల్ కాపాడుతుందని ఆశాభావం వ్యక్తం చేసింది ఫైజర్. 1200 మంది రోగులపై గత నెలలో ఈ టాబ్లెట్ ప్రయోగం చేశారు. ఇందులో దాదాపు 89 శాతం ఒమిక్రాన్ వేరియంట్‌పై టాబ్లెట్ సమర్థవంతంగా పనిచేసినట్లు తేలింది. అనంతరం మరో 1000 మందిపై ఈ అధ్యయనం చేసి ఫైనల్ రిపోర్ట్ ఇచ్చారు.

ఏంటీ ఫైజ‌ర్ టాబ్లెట్‌?

ఇది యాంటీ వైర‌ల్ డ్ర‌గ్‌. ఇప్పటివరకు మనం కరోనా సోకుండా మాత్రమే కొవాగ్జిన్, కొవిషీల్డ్ వంటి టీకాలు వేయించుకుంటున్నాం. కానీ ఫైజర్ టాబ్లెట్ అలా కాదు కరోనా వైరస్ ఓ వ్య‌క్తిలోకి వెళ్లిన త‌ర్వాత ఆ వ్య‌క్తికి క‌రోనా సోక‌కుండా ఈ డ్ర‌గ్ అడ్డుక‌ట్ట వేయ‌గ‌ల‌ద‌ని ఫైజ‌ర్ సంస్థ చెబుతోంది. పీఎఫ్‌-07321332 అనే ఈ డ్ర‌గ్‌ను గ‌తేడాది మార్చి నుంచి అభివృద్ధి చేస్తోంది. ప్ర‌యోగాల్లో భాగంగా దీనిని హెచ్ఐవీ రోగుల కోసం వాడే రిటోన‌విర్‌తో క‌లిపి ఇస్తున్నారు. ల్యాబ్ ప‌రీక్ష‌ల్లో ఈ యాంటీవైర‌ల్ డ్ర‌గ్ వైర‌స్‌ను నియంత్రిస్తున్న‌ట్లు తేలింది. కొవిడ్ ప్రారంభ ద‌శ‌లో ఉన్న వారిపై ఇది స‌మర్థంగా ప‌ని చేస్తుందని ఫైజ‌ర్ చెబుతోంది

ఎలా వేసుకోవాలి?

ఈ క్లినికల్ ప్రయోగాల్లో పాల్గొన్నవారికి పీఎఫ్‌-07321332తోపాటు రిటోన‌విర్‌ను ఇస్తారు. వీళ్ల‌లో మూడో వంతు మందికి పెద్ద‌గా ప్ర‌భావం చూప‌ని ఓ ఔష‌ధాన్ని ఇస్తారు. మిగ‌తా వాళ్ల‌కు ఈ పీఎఫ్‌-07321332 డ్ర‌గ్‌ను రోజూ రెండు పూట‌లా ఐదు నుంచి ప‌ది రోజుల పాటు ఇస్తారు. ఈ ప్ర‌యోగాల్లో డ్ర‌గ్ పూర్తి సుర‌క్షిత‌మ‌ని తేలింది. అన్నీ అనుకున్న‌ట్లు జ‌రిగితే త్వరలోనే ఈ డ్ర‌గ్‌ను మార్కెట్‌లోకి తీసుకురావాల‌ని ఫైజ‌ర్ భావిస్తోంది. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి