AP Movies : టాలీవుడ్‌కు ఏపీ సర్కార్ గుడ్ న్యూస్.. ధియేటర్లలో వంద శాతం ఆక్యుపెన్సీకి అనుమతి !

ఏపీ ప్రభుత్వం సినిమా ధియేటర్లలో వంద శాతం ఆక్యుపెన్సీకి పర్మిషన్ ఇచ్చింది. ఇప్పటి వరకూ యాభై శాతానికే అనుమతి ఉంది. అమల్లో ఉన్న కర్ఫ్యూ నిబంధనలను సడలించింది.

ఆంధ్రప్రదేశ్ సినిమా ధియేటర్ల వంద శాతం ఆక్యుపెన్సీకి పర్మిషన్ ఇస్తూ ఆంధ్రప్రదేశ్ ప్రభుత్వం కీలక నిర్ణయం తీసుకుంది. ఇప్పటి వరకూ రోజుకు మూడు షోలు.. యాభై శాతం ఆక్యుపెన్సీకే పర్మిషన్ ఉండేది. అయితే కొత్తగా కర్ఫ్యూ నిబంధనలు సడలిస్తూ నిర్ణయం తీసుకున్నారు. ఇక నుంచి రాత్రి పన్నెండు గంటల నుండి తెల్లవారు జాము ఐదు గంటల వరకే కర్ఫ్యూ ఉంటుంది. ఈ సమయంలో  అన్ని రకాల వ్యాపార కార్యకలాపాలు యథావిధిగా నిర్వహించుకోవచ్చు. ఫంక్షన్లు, సభలు, సమావేశాలు మాత్రం 250మందితో మాత్రమే నిర్వహించాల్సి ఉంటుంది. 

ఈ రకమైన సడలింపులు ఇస్తూ జీవో జారీ చేయడంతో  సినిమాల ప్రదర్శనకు ఉన్న సమస్యలు కూడా తొలగిపోయినట్లయింది. నాలుగు షోలు.. వంద శాతం ఆక్యుపెన్సీతో  సినిమాలు ప్రదర్శించుకోవచ్చు. దసరా పండుగ సందర్భంగా విడుదలవుతున్న సినిమాలకు ప్రభుత్వ నిర్ణయం రిలీఫ్ ఇవ్వనుంది. కొంత కాలంగా సినీ పరిశ్రమ పెద్దలు నాలుగు షోలు, వంద శాతం ఆక్యుపెన్సీకి చాన్సివ్వాలని కోరుతూ వస్తున్నారు. అయితే కర్ప్యూ నిబంధనలు అమలు చేస్తూండటం వల్ల ప్రత్యేకంగా సినిమాలకు పర్మిషన్ ఇవ్వలేదు. ఇప్పుడు కరోనా పరిస్థితులను సమీక్షించి కర్ఫ్యూ సడలింపు నిర్ణయం తీసుకున్నారు. తెలంగాణలో ఇప్పటికే అన్ని రకాల  కరోనా నిబంధనలను ఎత్తి వేశారు. 

టిక్కెట్ రేట్ల విషయంలో మాత్రం స్పష్టత లేదు. వకీల్ సాబ్ సినిమా విడుదలయినప్పుడు జారీ చేసిన జీవో ప్రకారమే టిక్కెట్ రేట్లను నిర్ణయించాల్సి ఉంటుంది. ఆ రేట్లు గిట్టుబాటు కావని పెంచాలని నిర్మాతలు చాలా సార్లు ప్రభుత్వాన్ని కోరారు. కానీ ప్రభుత్వం ప్రజలను దోచుకునేందుకు పర్మిషన్ ఇవ్వబోమని చెబుతోంది. ఈ కారణంగానేపెద్ద పెద్ద సినిమాలు విడుదల కావడం లేదు. 

దసరా సీజన్ టాలీవుడ్ పరిశ్రమకు కీలకం. ఈ సీజన్‌లోనూ పెద్ద సినిమాలేవీ విడుదల కావడం లేదు. విడదలయ్యే మీడియా బడ్జెట్ సినిమాలకూ ఏపీ ప్రభుత్వ నిర్ణయం కాస్త ఊరటగా భావింవచ్చు. సినిమా ధియేటర్లకు ఇచ్చిన రిలీఫ్‌కు సంబంధించి పూర్తి స్థాయి ఆదేశాలు ఇంకా బయటకు రావాల్సి ఉంది. జీవోలన్నీ పబ్లిక్ డొమైన్‌లో పెట్టడం మానేశారు.. కొన్నింటినీ మాత్రమే విడుదల చేస్తున్నారు. కర్ఫ్యూ రిలీఫ్‌కు సంబంధించి విడుదల చేసిన జీవోల్లో సినిమాల ప్రస్తావన లేదు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి