Chandini Chowdary: చాందిని... మందు, సిగరెట్ ఆరోగ్యానికి హానికరం

‘సమ్మతమే’‌లో హీరోయిన్ చాందినీ చౌదరి క్యారెక్టర్ కోసం మందు కొట్టారు. సిగరెట్ కాల్చారు. ఆడియన్స్‌‌ ఆ సంగతి గమనించడంతో పాటు ఆమెకు మధ్యపానం, ధూమపానం ఆరోగ్యానికి హానికరమని జాగ్రత్తలు చెబుతున్నారు.

తెలుగు సినిమా ఇండస్ట్రీలో కథానాయికలుగా ఉన్న తెలుగమ్మాయిలు చాలా తక్కువ. వేళ్ల మీద లెక్క పెట్టవచ్చు. వారిలో చాందినీ చౌదరి ఒకరు. ఇప్పటికే చాలా చిత్రాల్లో నటించారు. గత ఏడాది ‘కలర్ ఫొటో’ సినిమాతో మంచి సక్సెస్ అందుకున్నారు. ఇప్పుడామె చేతిలో నాలుగైదు చిత్రాలు ఉన్నాయి. అందులో ‘సమ్మతమే’ ఒకటి. ఈ సినిమా టీజర్‌‌ను గురువారం విడుదల చేశారు. అందులో చాందినీ చౌదరి సిగరెట్ తాగుతూ కనిపించారు. మందు కొడుతూ కనిపించారు.

సిల్వర్ స్క్రీన్స్ మీద సిగరెట్ తాగుతూ, మందు కొడుతూ కనిపించిన వాళ్లందరూ రియల్ లైఫ్‌లో అదే విధంగా చేస్తారని కాదు. మోడ్రన్ అమ్మాయిలు చాలామంది మందు, దమ్ము కొడుతున్నారు. క్యారెక్టర్ డిమాండ్ చేసినప్పుడు లేదా అటువంటి క్యారెక్టర్లు వచ్చినప్పుడు కొంతమంది హీరోయిన్లు మందు, సిగరెట్ పట్టుకుంటున్నారు. ‘సమ్మతమే’ కోసం చాందినీ చౌదరి కూడా అదే పని చేశారు. అయితే, ఆడియన్స్ ఆ సంగతి గమనించారు. ‘చాందిని... మధ్యపానం, ధూమపానం ఆరోగ్యానికి హానికరం’ అని సరదాగా జాగ్రత్తలు చెప్పారు. వాటిని చూసి ఆమె కూడా సరదాగా స్పందించారు.

‘సమ్మతమే’ టీజర్‌‌లో హీరో కిరణ్ అబ్బవరం, చాందినీ చౌదరి సాఫ్ట్‌‌వేర్ ఉద్యోగుల్లా కనిపించారు. ఇద్దరి మధ్య సన్నివేశాలు బావున్నాయి. పాటను పాటగా కాకుండా మాటగా మాట్లాడాలని గేమ్ పెట్టుకోవడం, సందర్భాలకు అనుగుణంగా చక్కటి పాటలను ఎంచుకోవడం బావుంది. అలాగే, శేఖర్ చంద్ర అందించిన నేపథ్య సంగీతమూ ప్రేక్షకులను ఆకట్టుకుంటోంది. ‘జగమంత సగమైనా... క్షణమే ఓ యుగమైనా... ఈ వలపు మలుపుల్లో సతమతము సమ్మతమే’ అంటూ సాగే టైటిల్ సాంగ్‌‌లో కొన్ని లైన్లను టీజర్‌‌లో వినిపించారు. టీజర్‌‌కు ప్రేక్షకుల నుంచి మంచి స్పందన లభిస్తోంది. ‘కలర్ ఫొటో’తో చాందినీ చౌదరి... ‘ఎస్‌‌ఆర్ కళ్యాణ మండపం’తో కిరణ్ అబ్బవరం... ఇద్దరూ సక్సెస్‌‌లలో ఉన్నారు. ఈ సినిమాతోనూ సక్సెస్ అందుకోవాలని ఆశిద్దాం.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి