House Prices In Hyderabad: హైదరాబాద్‌లో పెరిగిన ఇళ్ల ధరలు - దేశ రాజధానితో పోలిస్తే భాగ్యనగరం చాలా బెటర్‌

Increase In Residential House Prices: డిమాండ్ పెరుగుదల & సానుకూల మార్కెట్ సెంటిమెంట్ కారణంగా భారతదేశంలో ఇళ్ల రేట్లకు రెక్కలు వచ్చాయి. దేశంలోని టాప్-8 నగరాల్లో, నివాస గృహాల సగటు ధరలు 2024 చివరి త్రైమాసికంలో (2024 అక్టోబర్‌-డిసెంబర్‌ కాలం) చుక్కలు చూపించాయి. అంతకుముందు సంవత్సరం అదే కాలంతో పోలిస్తే, సమీక్ష కాలంలో 10 శాతం వృద్ధిని నమోదు చేశాయి.

మంగళవారం విడుదలైన తాజా రిపోర్ట్‌ ప్రకారం, 2021 నుంచి ఇప్పటి వరకు వరుసగా 16వ త్రైమాసికంలోనూ ఇళ్ల సగటు రేట్లు పెరిగాయి. CREDAI-Colliers-Lyses Foras రిపోర్ట్‌ ప్రకారం, దేశంలోని 8 ప్రధాన నగరాల్లోనూ ధరలు పెరిగాయి. మన దేశంలో, సాధారణంగా, రియల్‌ ఎస్టేట్‌ రంగంలో దిల్లీ-NCR, ముంబై, బెంగళూరు, చెన్నై, హైదరాబాద్‌, పుణె, కోల్‌కతా, అహ్మదాబాద్‌ను టాప్‌-8 సిటీస్‌గా పరిగణిస్తారు. పరిస్థితులను బట్టి ఈ లిస్ట్‌ మారుతుంది. 

టాప్‌-8 నగరాల్లో ధరలు ఎంత పెరిగాయి?

2023 నాలుగో త్రైమాసికంతో పోలిస్తే, కార్పెట్ ఏరియా ప్రాతిపదికన, 2024 నాలుగో త్రైమాసికంలో దిల్లీ-ఎన్‌సీఆర్‌లో ఇళ్ల రేట్లు సంవత్సర కాలంలోనే అత్యధికంగా 31 శాతం వృద్ధి చెందాయి. ఇక్కడ చదరపు అడుగు ధర (price per sq ft) రూ. 11,993 కి చేరుకుంది.

ఐటీ రాజధానిగా పరిగణించే బెంగళూరు రెండో స్థానంలోకి వచ్చింది, ఆ నగరంలో నివాస గృహాల ధరలు 23 శాతం పెరిగాయి. ఈ నగరంలో చదరపు అడుగు సగటున రూ. 12,238 పలుకుతోంది.

2024 అక్టోబర్-డిసెంబర్ కాలంలో, అహ్మదాబాద్‌లో ఇళ్ల సగటు ధరలు ఏడాదిలో 15 శాతం పెరిగాయి, చదరపు అడుగుకు రూ.7,725 కు చేరుకున్నాయి.

పుణెలో, సమీక్షలో ఉన్న కాలంలో 9 శాతం వార్షిక ధర పెరుగుదల నమోదైంది. చదరపు అడుగు ేటు రూ. 9,982 కి చేరుకున్నట్లు డేటా చూపించింది.

చెన్నైలో ఇళ్ల ధరలు యావరేజ్‌గా 6 శాతం పెరిగి చదరపు అడుగుకు రూ. 8,141 కు చేరాయి.

ముంబై మెట్రోపాలిటన్ ప్రాంతం (MMR) ధరలు 3 శాతం వృద్ధిని నమోదు చేసి చదరపు అడుగుకు రూ.20,725 కి జంప్‌ చేశాయి.

హైదరాబాద్‌లో రేట్లు సగటున 2 శాతం పెరిగి చదరపు అడుగుకు రూ. 11,351 కి చేరుకున్నాయి.

కోల్‌కతాలో ధరలు సరాసరి 1 శాతం పెరిగి చదరపు అడుగుకు రూ.7,971 పలుకుతున్నాయి.

2025లో, 'సరసమైన గృహాల విభాగం'లో (Affordable Housing Segment) అమ్మకాలు బలంగా ఉంటాయని, లగ్జరీ & అల్ట్రా-లగ్జరీ విభాగాలలో డిమాండ్ మరింత పెరిగే అవకాశం ఉందని CREDAI-Colliers-Lyses Foras నివేదిక వెల్లడించింది. 

ఇళ్ల కొనుగోళ్లలో కనిపిస్తున్న బూమ్‌ కారణంగా, వరుసగా నాలుగో త్రైమాసికంలోనూ 'అమ్ముడుపోని ఇన్వెంటరీ' (ఇండివిడ్యువల్‌ ఇళ్లు, విల్లాలు & అపార్ట్‌మెంట్‌ ఫ్లాట్లు) తగ్గుతూనే ఉంది. ఆరోగ్యకరమైన డిమాండ్ కారణంగా 2024 నాలుగో త్రైమాసికంలో ఏడాది ప్రాతిపదికన 5 శాతం తగ్గింది.

2024 డిసెంబర్ చివరి నాటికి, భారతదేశం మొత్తంలో, అమ్ముడుపోని ఇన్వెంటరీ గత రెండేళ్లలో మొదటిసారిగా 10 లక్షల గృహాల కంటే తక్కువగా ఉంది. ముంబై మెట్రోపాలిటన్ ప్రాంతం అమ్ముడుపోని ఇన్వెంటరీ లిస్ట్‌లో 40 శాతం వాటాతో ప్రధాన పాత్ర పోషించింది. పుణెలో అమ్ముడుకాని ఇన్వెంటరీ అత్యధికంగా 14 శాతం తగ్గింది, ఆ తరువాత హైదరాబాద్‌లో 13 శాతం క్షీణించింది.

అమ్ముడుపోని ఇన్వెంటరీ తగ్గుతోందంటే.. గతంలో అమ్ముడుకాకుండా ఆగిపోయిన ఇళ్లు కూడా ఇప్పుడు అమ్ముడుపోతున్నాయని, ఓవరాల్‌గా ఇళ్ల అమ్మకాలు పెరుగుతున్నాయని అర్ధం.

ఇళ్ల ధరలు మరింత పెరగవచ్చు

వడ్డీ రేట్లలో కోత ప్రారంభమైంది కాబట్టి ప్రజల స్థోమత, డిమాండ్‌ మరింత పెరిగే ఛాన్స్‌ ఉంది. దీంతోపాటు, హౌసింగ్‌ ప్రాజెక్టులకు నిధులు సమకూర్చడానికి కేంద్ర ప్రభుత్వం తీసుకుంటున్న చర్యలు సరసమైన గృహాల విభాగానికి ఊతం ఇస్తాయని నిపుణులు చెబుతున్నారు.

మరో ఆసక్తికర కథనం: ఊపిరి పీల్చుకోండి, తగ్గిన గోల్డ్‌-సిల్వర్‌ రేట్లు - ఈ రోజు బంగారం, వెండి కొత్త ధరలు ఇవీ