SIP Strategies: మ్యూచువల్‌ ఫండ్స్‌ నుంచి ఎక్కువ డబ్బు సంపాదించేందుకు ఆరు సూత్రాలు

Investing In Mutual Funds Through SIPs: సిస్టమాటిక్ ఇన్వెస్ట్‌మెంట్ ప్లాన్ (SIP) ద్వారా మ్యూచువల్ ఫండ్స్‌లో పెట్టుబడి పెట్టడం అనేది దీర్ఘకాలంలో బాగా డబ్బు సంపాదించే తెలివైన పనిగా, పాపులర్‌ స్ట్రాటెజీగా మారింది. కాలక్రమేణా సంపద సృష్టి వల్ల చాలా మంది పెట్టుబడిదార్లు SIPల ద్వారా స్టాక్ మార్కెట్‌లోకి అడుగు పెడుతున్నారు. క్రమశిక్షణతో కూడిన SIP పెట్టుబడిలో సూక్ష్మాంశాలను అర్థం చేసుకుంటే రాబడి బాగా పెరుగుతుంది. 

SIPల ద్వారా మీ రాబడి సామర్థ్యాన్ని పెంచుకునే కీలక చిట్కాలు:

చక్రవడ్డీ లాభాన్ని పొందడానికి త్వరగా స్టార్‌ చేయండి
SIPలు చక్రవడ్డీ శక్తిని (Compounding Power) ఉపయోగించుకుంటాయి, తక్కువ మొత్తంలో పెట్టుబడులు కూడా కాలం గడిచేకొద్దీ గణనీయంగా పెరిగే అవకాశం కల్పిస్తాయి. వీలైనంత త్వరగా SIPని ప్రారంభించడం చాలా కీలకం, మీ డబ్బును ఎంత ఎక్కువ కాలం పెట్టుబడిగా పెడితే, చక్రవడ్డీ ప్రయోజనాలు అంత ఎక్కువగా ఉంటాయి.

సరైన ఫండ్‌ని ఎంచుకోండి
రిస్క్, రాబడి అవకాశం, మేనేజ్‌మెంట్‌ వంటివి ప్రతి మ్యూచువల్ ఫండ్‌కు మారుతూ ఉంటాయి. SIPలను సమర్థవంతంగా ఉపయోగించుకోవడానికి దాని పనితీరు, చరిత్ర, వ్యయ నిష్పత్తులు, ఫండ్ మేనేజర్‌ల నైపుణ్యం ఆధారంగా పరిశోధన చేసి ఫండ్‌ను ఎంపిక చేయాలి. ఈక్విటీ, డెట్ లేదా హైబ్రిడ్ ఫండ్స్ అయినా మీ ఆర్థిక లక్ష్యాలు, రిస్క్ తీసుకోగల పరిస్థితులను దృష్టిలో పెట్టుకుని మీకు సరిపడే ఫండ్‌లను ఎంచుకోండి.

రెగ్యులర్ పోర్ట్‌ఫోలియో సమీక్ష
'పెట్టుబడి పెట్టి మర్చిపోయే' విధానం చాలా అరుదుగా మాత్రమే కోరుకున్న ఫలితాలను ఇస్తుంది. మీ SIP పోర్ట్‌ఫోలియోను క్రమం తప్పకుండా చూస్తుండడం వల్ల దాని పనితీరును మీరు సరిగ్గా అంచనా వేయగలరు, అవసరమైన సర్దుబాట్లు చేయగలరు. మీ ప్రస్తుత ఫండ్‌ పథకాలు తమ బెంచ్‌మార్క్‌లను బీట్ చేయడంలో తరచూ వెనుకబడుతుంటే లేదా ఆశించిన పనితీరు చూపకపోతే.. వేరొక ఫండ్‌ పథకానికి మారేందుకు ప్రయత్నించండి.

మార్కెట్ తుపానులో ధైర్యంగా నిలవాలి
మార్కెట్‌లో హెచ్చుతగ్గులు ఉన్నప్పటికీ, ఆ కలవరపాటును మీ దరి చేరనీయవద్దు. క్రమశిక్షణతో ముందడుగు వేయడం కీలకం. మార్కెట్‌ పడిపోతున్నప్పుడు కూడా SIPలను కొనసాగించడం వల్ల, మీరు తక్కువ ధరకే ఎక్కువ యూనిట్లను కొనుగోలు చేయవచ్చు. దీర్ఘకాలంలో ఇది మీ ఖర్చును తగ్గిస్తుంది.

SIP కాంట్రిబ్యూషన్‌ను క్రమంగా పెంచాలి
మీ ఆదాయం పెరిగేకొద్దీ మీ SIP మొత్తాన్ని పెంచడం కీలకం. ద్రవ్యోల్బణం ప్రభావం మీపై పడకుండా చూసేందుకు, కాలంతో పాటు మారుతున్న ఆర్థిక లక్ష్యాలను చేరుకోవడానికి ఇది మార్గం సుగమం చేస్తుంది. SIP కాంట్రిబ్యూషన్‌ను పెంచడాన్ని 'స్టెప్ అప్' (step-up) విధానం అని పిలుస్తారు. దీని మీ పోర్ట్‌ఫోలియో వృద్ధిలో మీరు ఆశ్చర్యపోయే మార్పును తెస్తుంది.

SIP ఫ్లెక్సిబిలిటీని సద్వినియోగం చేసుకోండి
పెట్టుబడి మొత్తం, షెడ్యూల్‌ విషయంలో SIPలు సౌకర్యవంతమైన ఆప్షన్లతో ఉంటాయి. చాలా ఫండ్‌లు SIP కంట్రిబ్యూషన్‌లను సర్దుబాటు చేయడానికి లేదా ఫ్రీక్వెన్సీని మార్చడానికి అనుమతిస్తాయి. ఈ ఫ్లెక్సిబిలిటీ మీ ఆర్థిక పరిస్థితికి అనుగుణంగా పెట్టుబడులు పెట్టడంలో మీకు సాయపడుతుంది.

పైన చెప్పిన చిట్కాలను పాటిస్తే మీ SIP పెట్టుబడుల నుంచి సాధారణం కంటే గరిష్ట ప్రయోజనాలను పొందే అవకాశం ఉంటుంది. తద్వారా, ఆర్థిక భవిష్యత్తును ధృడంగా నిర్మించుకోవడానికి మీకు వీలవుతుంది. ఇక్కడ ఒక విషయాన్ని తప్పనిసరిగా గుర్తుంచుకోండి - "విజయవంతమైన SIP పెట్టుబడికి క్రమశిక్షణ, స్థిరమైన పర్యవేక్షణ చాలా కీలకం".

మరో ఆసక్తికర కథనం: నగలు కొనేవాళ్లకు కలిసొస్తున్న కాలం, తగ్గిన పసిడి రేట్లు - మీ ప్రాంతంలో ఈ రోజు బంగారం, వెండి ధరలు ఇవీ