Holi Date 2024: హోళీ రోజు రంగులెందుకు చల్లుకుంటారు, కొత్తగా పెళ్లైనవారికి ఈ విషయం తెలుసా!

Holi 2024: హోళీ ఎప్పుడొచ్చింది...మార్చి 24 or 25?...హోళీ అంటే ఏంటీ? హోళీ రోజు రంగులెందుకు చల్లుకుంటారు? పురాణాల్లో ఈ పండుగ గురించి ఏముంది?

Holi Date 2024

హోళీ ఎప్పుడొచ్చింది?

• మార్చి 23 చతుర్థశి - కామదహనం


• మార్చి 24 ఆదివారం ఉదయం 9 గంటల 30 నిముషాల వరకూ చతుర్థశి ఉంది ఆ తర్వాత పౌర్ణమి మొదలైంది. అంటే మార్చి 24 ఆదివారం రాత్రికి పౌర్ణమి ఘడియలున్నాయి..అందుకే మార్చి 24 ఆదివారం హళిగా పూర్ణిమ


• మార్చి 25 సోమవారం ఉదయం 11 గంటల 30 నిముషాల వరకే పౌర్ణమి ఉంది..అంటే రాత్రికి పౌర్ణమి ఘడియలు లేవు...అన్ని తిథులు సూర్యోదయానికి ఉండడం ప్రధానం  అయితే పౌర్ణమి, అమావాస్య ఘడియలు మాత్రం రాత్రికి ఉండడమే ముఖ్యం...అందుకే హోలీ మార్చి 24నే కానీ మార్చి 25 ఉదయం కూడా హోళీ జరుపుకోవచ్చు...

సత్యయుగం నుంచి హోళీ

దివాలీ తర్వాత దేశవ్యాప్తంగా సంబరంగా జరుపుకునే పండుగ 'హోళీ. ఈ పండుగను సత్యయుగం నుంచి జరుపుకుంటున్నట్టు హిందూ పురాణాలు చెబుతున్నాయ్. తొలియుగం అయిన సత్యయుగంలో హోళీ గురించి ఏం చెప్పారంటే 'హోలీ' అంటే అగ్ని లేదా అగ్నితో పునీతమైనది అని అర్థం.   ఏటా ఫాల్గుణ మాసంలో పౌర్ణమి రోజున వచ్చే ఈ పండుగను..హోలీ, కాముని పున్నమి, డోలికోత్సవం అని కూడా అంటారు. ఈ పండుగ గురించి పురాణాల్లో ప్రచారంలో చాలా కథలున్నాయి...

హోళిక  దహనమైన రోజు

హిరణ్యకశపుడి కుమారుడైన ప్రహ్లాదుడు నిత్యం శ్రీ మహా విష్ణువు  ధ్యానంలో ఉంటాడు. అది భరించలేకపోయిన హిరణ్యకశపుడు ప్రహ్లాదుడిని చంపాలని నిర్ణయించుకుని సోదరి హోళికను పిలుస్తాడు. ఆమెకు ఉన్న శక్తిని వినియోగించి ప్రహ్లాదుడిని మంటల్లో ఆహుతి చేయాలని కోరుతాడు. దీంతో ఆమె ప్రహ్లాదుడిని ఒడిలో కూర్చోబెట్టుకుని మంటల్లో దూకుతుంది. అయితే విష్ణుమాయతో ప్రహ్లాదుడు మంటల్లోంచి బయటపడగా...హోళిక మాడి మసైపోతుంది. హోలిక దహనమైన రోజునే ‘హోలీ’ అని పిలుస్తారనే ప్రచారం ఉంది. అందుకే కొన్ని ప్రాంతాల్లో రాత్రి వేళ ‘హోలిక’ దహనం నిర్వహిస్తారు. 

పెళ్లైన వాళ్లు హోళికా దహనం చూడరాదు

హోలికా దహనం చూడడం మంచిదని భావిస్తారు. అయితే  కొత్తగా పెళ్లైన మహిళలు మాత్రం చూడకూడదంటారు. ఎందుకంటే హోళికా దహనం అంటే రీరం అగ్నిలో కాలుతుంది కదా..ఇంకా అర్థమయ్యేలా చెప్పాలంటే శవదహనం కదా..అందుకే కొత్తగా పెళ్లైన వాళ్లు చూస్తే వారి జీవితంలో బాధలు వెంటాడతాయంటారు. 

రాత్రివేళ రాక్షసికి పూజలు

కృతయుగంలో రఘునాథుడనే సూర్యవంశపు మహారాజు వుండేవాడు. ఓ రోజు ప్రజలంతా వచ్చి ‘హోళిక’ అనే రాక్షసి తమ పిల్లలను బాధిస్తోందని మొరపెట్టుకుంటారు. ఆ సమయంలో అక్కడే ఉన్న నారద మహర్షి.. ఏటా ఫాల్గుణ పూర్ణిమ రోజు హోళికను పూజిస్తే బాధలు తొలగిపోతాయని తెలుపుతాడు. ఆ పూజలు పగటి వేళ చేస్తే కష్టాలు వస్తాయని, అంతా రాత్రివేళ నిర్వహించాలని వివరిస్తాడు. దీంతో అప్పటి నుంచి ‘హోలీ’ పూజలు నిర్వహిస్తున్నట్లు చెబుతారు.

హోళీ రోజు కామదహనం 

ఫాల్గుణ పౌర్ణమి రోజు కాముని పున్నమి పేరుతో సంబరాలు జరుపుకుంటారు. సతీవియోగంతో విరాగిగా మారిన పరమేశ్వరుడికి హిమవంతుని కుమార్తెగా జన్మించిన పార్వతితో వివాహం జరిపించాలని దేవతలు నిర్ణయిస్తారు. దీంతో పార్వతీదేవిపై పరమశివుడి దృష్టి నిలిచేలా చేయమని మన్మథుని సాయం తీసుకుంటారు. మన్మథుడు శివుడిపైకి పూల బాణాన్ని ప్రయోగించి, తపోభంగం కలిగిస్తాడు. అప్పుడు శివుడు మూడో కన్ను తెరిచి మన్మథున్ని భస్మం చేస్తాడు. అలా కోరికలు దహింపజేసిన రోజు కావడం వల్ల  హోలీ రోజు కామదహనం పేరుతో మన్మథుడి బొమ్మను గడ్డితో చేసి తగులబెడతారు.

డోలోత్సవం

శ్రీకృష్ణుడు గోపికలతో కలిసి బృందావనంలోని పువ్వులతో, రంగులతో ఈ ఉత్సవాన్ని జరుపుకున్నట్లుగా భావిస్తారు. ఇలా రంగులు, పూలు చల్లుకోవడం ద్వారా ప్రేమ, సౌభాగ్యాలు వెల్లివిరిస్తాయని నమ్ముతారు.

డోలిక అంటే

డోలిక అంటే ఉయ్యాల అని అర్థం. బాలకృష్ణుడిని ఫాల్గుణ మాసం, పూర్ణిమ తిథిలో ఉయ్యాల్లో వేసినట్లు పురాణాలు చెబుతున్నాయి. ఈ సందర్భంగా పశ్చిమ బెంగాల్‌లో హోలీ రోజున శ్రీకృష్ణుడి ప్రతిమను ఊయలలో వేసి ‘డోలికోత్సవం’ జరుపుతారు.  

శాస్త్రీయ కారణం ఇదే

వసంత కాలంలో వాతావరణం చలి నుంచి వేడిగా మారుతుంది. దీనివల్ల వైరల్ ఫీవర్స్, జలుబు లాంటి వ్యాధులు ప్రబలుతాయి. కాబట్టి కొన్ని ఔషధ మొక్కల నుంచి తయారు చేసిన సహజమైన రంగులు కలిపిన నీటిని చల్లుకోవడం వల్ల ఈ వ్యాధుల వ్యాప్తి తగ్గుతుందనేది ఒక వాదన. కుంకుమ, పసుపు, బిల్వాలను ఉపయోగించి ఆయుర్వేద వైద్యులు ఔషధ వనమూలికలను తయారు చేస్తారు. తడి రంగుల కోసం, మోదుగ పువ్వుల్ని రాత్రంతా మరిగించి అవి పసుపు రంగులోకి మారేంత వరకు ఉంచుతారు, అది ఔషధ లక్షణాలు కలిగి ఉంటాయి. వాస్తవానికి ఇవి చల్లుకోవాలి కానీ ఇప్పుడు కృత్రిమ రంగులు చల్లుకుంటున్నారు..వీటివల్ల మంచి జరగకపోగా ఆరోగ్యానికి హానికరం  

చతుర్దశి నాడు కాముని దహనం అనంతరం పాల్గుణ పౌర్ణమి నాడు వచ్చే హోలీ పండుగను భారత్‌లోనే కాదు నేపాల్‌, బంగ్లాదేశ్‌ దేశాల్లో కూడా వైభవంగా జరుపుకుంటారు. 

గమనిక:  కొన్ని పుస్తకాల్లో ఉన్న సమాచారం ఆధారంగా రాసిన కథనం ఇది...దీనిని ఎంతవరకూ పరిగణలోకి తీసుకోవాలన్నది పూర్తిగా మీ వ్యక్తిగతం..