Goa Election 2022: గోవా ఎన్నికలపై కేజ్రీవాల్ గురి.. ప్రతి మహిళకు నెలకు రూ.1000

గోవా అసెంబ్లీ ఎన్నికల ప్రచారంలో కేజ్రీవాల్ మరో హామీ ఇచ్చారు. 18 ఏళ్లు నిండిన మహిళలకు నెలకు రూ.1000 ఇస్తామని ప్రకటించారు.

దిల్లీ సీఎం అరవింద్ కేజ్రీవాల్.. ఇతర రాష్ట్రాల్లో ఆమ్‌ఆద్మీని విస్తరించే పనిలో ఉన్నారు. ఇప్పటికే పంజాబ్‌లో ఆప్ ప్రతిపక్షంగా ఉంది. ఇక ఉత్తర్‌ప్రదేశ్‌, గోవా, ఉత్తరఖండ్‌.. ఇలా త్వరలో అసెంబ్లీ ఎన్నికలు జరగనున్న అన్ని రాష్ట్రాల్లోనూ పార్టీని బలోపేతం చేస్తున్నారు. ముఖ్యంగా కీలక హామీలు ప్రకటిస్తున్నారు. ఇందులో భాగంగా గోవా అసెంబ్లీ ఎన్నికల కోసం మరో వాగ్దానం చేశారు.

గోవాలో ఆప్ అధికారంలోకి వస్తే 18 ఏళ్లు నిండిన ప్రతి మహిళకు నెలకు రూ.1000 అందజేస్తామని హామీ ఇచ్చారు. ఆదివారం గోవాలోని నవేలింలో జరిగిన ఎన్నికల ప్రచారంలో కేజ్రివాల్ పాల్గొన్నారు.

ఆమ్ ఆద్మీ పార్టీ అధికారంలోకి వస్తే గృహ ఆధార్ ఆదాయాన్ని నెలకు 1,500 రూపాయల నుంచి 2,500 రూపాయలకు పెంచుతాం. అలాగే ప్రతి మహిళకు నెలకు 1,000 రూపాయలు అందిస్తాం. ప్రపంచంలోనే ఇది అతిపెద్ద మహిళా సాధికారత కార్యక్రమం.                    -     అరవింద్ కేజ్రీవాల్, దిల్లీ సీఎం

ఇప్పటికే ఈ హామీని పంజాబ్‌ అసెంబ్లీ ఎన్నికల ప్రచారంలోను ఇచ్చారు కేజ్రీ. పంజాబ్‌లో తాము అధికారంలోకి వస్తే 18 ఏళ్లు నిండిన మహిళలకు నెలకు వెయ్యి రూపాయల చొప్పున అందజేస్తామని ఇటీవల కేజ్రీవాల్ ప్రకటించారు. గోవా అసెంబ్లీకి 2022 ఫిబ్రవరి-మార్చిలో ఎన్నికలు జరగనున్నాయి.

 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి