Stop Overthinking in 3 Simple Steps : ఈ రోజుల్లో వేగవంతమైన జీవనశైలి కారణంగా చాలామంది ఓవర్థింకింగ్(Overthinking) సమస్యతో బాధపడుతున్నారు. చిన్న విషయాన్ని కూడా పదేపదే ఆలోచించడం, భవిష్యత్తు గురించి ఎక్కువగా ఆందోళన చెందడం, జరిగిన సంఘటనలనే మళ్లీ మళ్లీ గుర్తు చేసుకోవడం వంటి అలవాట్లు మానసిక ఆరోగ్యంపై ప్రతికూల ప్రభావం చూపుతాయి. దీనివల్ల నిద్ర సమస్యలు, ఒత్తిడి, ఆందోళన, పనిపై ఏకాగ్రత తగ్గడం వంటి సమస్యలు తలెత్తుతాయి.
అయితే ఆలోచించడం పూర్తిగా ఆపేయడం లక్ష్యం కాదని.. అవసరం లేని, ఉపయోగం లేని ఆలోచనలు మనసుపై ఆధిపత్యం చెలాయించకుండా నియంత్రించడం ముఖ్యమని యశోద హాస్పిటల్స్, హైదరాబాద్కు చెందిన సీనియర్ కన్సల్టెంట్ సైక్రియాట్రిస్ట్ డాక్టర్ కె. నవీన్ కుమార్ సూచిస్తున్నారు. దీనిలో భాగంగా మూడు చిట్కాలతో ఓవర్థింకింగ్ సమస్యను ఓవర్కామ్ చేయవచ్చని చెప్తున్నారు. అవేంటంటే..
Also Read : రోజూ యోగా చేస్తే శారీరక, మానసిక ఆరోగ్యానికి కలిగే లాభాలు ఇవే.. మగవారికి, ఆడవారికి ఈ ప్రయోజనాలు అందుతాయి
ఆలోచనలు గుర్తించడం..
ఓవర్థింకింగ్ను తగ్గించడంలో మొదటి అడుగు.. మీరు అతిగా ఆలోచిస్తున్నారని గుర్తించడమే. మీరు ఎక్కువగా ఆలోచిస్తున్నారో లేదో తెలుసుకునేందుకు కొన్ని ప్రశ్నలను మీకు మీరు వేసుకోవాలని సూచించారు.
- నేను ఆలోచిస్తున్నది నిజంగా సమస్యకు పరిష్కారం చూపుతోందా?
- అదే విషయాన్ని మళ్లీ మళ్లీ ఆలోచిస్తూ సమయం వృథా చేస్తున్నానా?
- ఈ ఆలోచనలకు కారణం భయమా, ఒత్తిడా, అపరాధ భావనా, చేతకానీ తనమా?
అని ఆలోచించుకోవాలి. ఈ ప్రశ్నలకు సమాధానం తెలుసుకోవడం ద్వారా సమస్యను ప్రశాంతంగా ఎదుర్కొనే అవకాశం ఉంటుందని డాక్టర్ నవీన్ కుమార్ తెలిపారు.
ప్రజెంట్పై ఫోకస్ చేయండి
ఓవర్థింకింగ్ ఎక్కువగా మన చేతుల్లో లేని విషయాల గురించే ఉంటుంది. అలాంటి సమయంలో మనసును ప్రస్తుత క్షణంపైకి తీసుకురావాలి. దీనికోసం.. కొన్ని నిమిషాలు నెమ్మదిగా, గాఢంగా శ్వాస తీసుకోండి. కొద్దిసేపు నడవండి. సంగీతం వినండి. పుస్తకం చదవండి. వంట చేయండి. వ్యాయామం చేయండి. లేదా మీకు ఇష్టమైన హాబీలతో సమయం గడపండి.
Also Read : మంచి నిద్రతో పాటు మానసిక ఆరోగ్యం కూడా కావాలా? అయితే రాత్రుళ్లు చేయాల్సిన పనులు ఇవే
ప్రతిరోజూ కేవలం 5 నుంచి 10 నిమిషాల పాటు ధ్యానం (Meditation) లేదా మైండ్ఫుల్నెస్ సాధన చేయడం వల్ల మనసులో వచ్చే అనవసర ఆలోచనలు చాలావరకు తగ్గుతాయని డాక్టర్ నవీన్ తెలిపారు. అలాగే మీ చుట్టూ కనిపిస్తున్నవి, వినిపిస్తున్నవి, అనుభూతి చెందుతున్న వాటిపై దృష్టి పెట్టడం కూడా ఆందోళనను తగ్గించడంలో సహాయపడుతుందట.
మీ ఆలోచనలకు తగ్గట్లు పనిచేయండి
మీరు ఎదుర్కొంటున్న సమస్యకు పరిష్కారం ఉంటే.. ఈ రోజే మీరు దానికోసం చేయగలిగే ఒక చిన్న పనిని కాగితంపై రాసుకుని దానిని పూర్తి చేయడానికి ప్రయత్నించండి. ఇలా చేయడం వల్ల ఒకే విషయాన్ని పదేపదే ఆలోచించడం, ఆందోళన తగ్గుతుంది. ఒకవేళ ఆ సమస్య మీ నియంత్రణలో లేకపోతే.. ప్రతి ఫలితాన్ని ముందే ఊహించే ప్రయత్నం చేయకుండా పరిస్థితిని అంగీకరించడం నేర్చుకోవాలి.
వైద్యుడిని ఎప్పుడు సంప్రదించాలంటే..
ఓవర్థింకింగ్ ఎక్కువ వారాలు కొనసాగినా.. నిద్రపై ప్రభావం చూపినా, ఉద్యోగం లేదా చదువులో ఇబ్బందులు కలిగించినా, కుటుంబ, వ్యక్తిగత సంబంధాలపై ప్రభావం చూపించినా, తీవ్రమైన ఆందోళన, పానిక్ అటాక్స్ లేదా నిరంతరం నిరాశగా అనిపించినా.. వెంటనే సైకియాట్రిస్ట్ లేదా మానసిక ఆరోగ్య నిపుణులను సంప్రదించడం మంచిది. ప్రారంభ దశలోనే కౌన్సెలింగ్ లేదా థెరపీ తీసుకోవడం వల్ల సమస్య తీవ్రం కాకుండా నివారించవచ్చు.
Also Read : ఉదయాన్నే 30 సెకన్లు వెనక్కి నడిస్తే చాలు.. శారీరక, మానసిక ప్రయోజనాలు పొందడం ఖాయం
మానసిక ఆరోగ్యాన్ని మెరుగుపరిచే రోజువారీ అలవాట్లు
ఓవర్థింకింగ్ అనేది మార్చుకోగలిగే అలవాటే. ఈ చిన్న అలవాట్లు పాటిస్తే మానసిక ఆరోగ్యం మెరుగుపడుతుంది. ప్రతిరోజూ డీప్ బ్రీతింగ్ ప్రాక్టీస్ట్ చేయండి. అలాగే శారీరక వ్యాయామం ఉండేలా చూసుకోండి. తగినంత నిద్రపోండి. పడుకునే ముందు మొబైల్, ల్యాప్టాప్ వంటి స్క్రీన్ల వినియోగాన్ని తగ్గించండి. కుటుంబ సభ్యులు, స్నేహితులతో మాట్లాడేందుకు సమయం కేటాయించాలని సూచిస్తున్నారు నిపుణులు.
ఓవర్థింకింగ్ అనేది చాలా మందిలో కనిపించే సాధారణ సమస్యే. కానీ అది రోజువారీ జీవితాన్ని ప్రభావితం చేసే స్థాయికి చేరుకుంటే నిర్లక్ష్యం చేయకూడదు. మీ ఆలోచనలను గుర్తించడం, ప్రస్తుత క్షణంపై దృష్టి పెట్టడం, సమస్యకు చిన్నచిన్న చర్యలతో పరిష్కారం వెతకడం వంటి అలవాట్లు ఓవర్థింకింగ్ను నియంత్రించడంలో సహాయపడతాయి. ఒకవేళ సమస్య ఎక్కువ కాలం కొనసాగితే మానసిక ఆరోగ్య నిపుణుల సహాయం తీసుకోవడం మంచిది.
Also Read : గట్ హెల్త్, మానసిక ఆరోగ్యాన్ని మెరుగుపరిచే ఫుడ్స్.. మొక్కల ఆధారిత ఫుడ్స్తో ఎన్ని లాభాలో