Omicron Scare: 'ఒమిక్రాన్‌'పై రాష్ట్రాలకు కేంద్రం కీలక సూచనలు.. ఇవి తప్పనిసరి!

ఒమిక్రాన్ భయాల వేళ రాష్ట్రాలు, కేంద్రపాలిత ప్రాంతాలకు కేంద్రం కీలక సూచనలు చేసింది. కరోనా నిబంధనలను తప్పక అమలు చేయాలని తెలిపింది.

ఒమిక్రాన్ వేరియంట్‌పై అత్యంత అప్రమత్తంగా ఉండాలని రాష్ట్రాలు, కేంద్రపాలిత ప్రాంతాలకు కేంద్ర ప్రభుత్వం సూచించింది. కేంద్ర ఆరోగ్య కార్యదర్శి రాజేశ్​ భూషణ్.. ఈ రోజు రాష్ట్రాలు, కేంద్రపాలిత ప్రాంతాలతో సమావేశమయ్యారు​. ఒమిక్రాన్ వేరియంట్ కట్టడిపై పలు సూచనలు చేశారు.

కేంద్రం సూచనలు..

• కరోనా నిర్ధరణ పరీక్షలు వేగవంతం చేయాలి. 


• కరోనా నిర్ధరణ అయితే ఆ శాంపిల్స్​ను జీనోమ్ సీక్వెన్సింగ్​ పరీక్షలకు పంపించాలి.


• ఆస్పత్రుల్లో మౌలిక సదుపాయాలు, హోం ఐసోలేషన్​ వసతులు ఉండేలా చర్యలు తీసుకోవాలి.


• కరోనా టెస్టింగ్​, వ్యాక్సినేషన్ కార్యక్రమం, మౌలిక వైద్యవసతులు తదితర అంశాలపై క్షేత్రస్థాయిలో పర్యవేక్షించాలి. 

నిబంధనలు కఠినతరం..

ఒమిక్రాన్ వ్యాప్తి నేపథ్యంలో కొత్త వేరియంట్ ప్రభావం ఉన్న దేశాల నుంచి వచ్చే ప్రయాణికులకు కఠిన నిబంధనలు విధించింది కేంద్రం. ఆయా దేశాలకు అంతర్జాతీయ విమాన సర్వీసులు నిలిపివేయాలన్న అంశంపై ప్రస్తుతం సమీక్ష జరుపుతోంది. దక్షిణాఫ్రికాలో వెలుగుచూసిన బీ.1.1.529 వేరియంట్​ను ఇప్పటికే ఆందోళనకర రకంగా ప్రకటించింది డబ్ల్యూహెచ్​ఓ. 

వ్యాప్తిని అధికం చేసే మ్యూటేషన్లతో పాటు రోగనిరోధకతను తప్పించుకునే మ్యూటేషన్లు రెండూ ఒమిక్రాన్ వేరియంట్‌లో ఉన్నట్లు డబ్ల్యూహెచ్ఓ తెలిపింది. కనుక ఒమిక్రాన్ వేగంగా వ్యాప్తి చెందే ప్రమాదం ఎక్కువగా ఉందని పేర్కొంది.

ఇప్పటివరకు ఒమిక్రాన్ వేరియంట్ దక్షిణాఫ్రికాలో వ్యాప్తి చెందుతున్నట్లు స్పష్టమైన సమాచారం ఉన్నట్లు డబ్ల్యూహెచ్ఓ తెలిపింది. సౌతాఫ్రికాతో పాటు పశ్చిమ పసిఫిక్, ఐరోపా, తూర్పు మెడిటెరెనియన్, ఆఫ్రికాలోని కొన్ని ప్రాంతాల్లో ఈ వేరియంట్‌ను  గుర్తించారు. అంతర్జాతీయ ప్రయాణికుల వల్ల ఈ వేరియంట్ ఇతర దేశాలకు కూడా వ్యాప్తి చెందుతున్నట్లు డబ్ల్యూహెచ్ఓ వెల్లడించింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి