యంగ్ హీరో నాగశౌర్య డిఫరెంట్ జోనర్స్ లో కథలను ఎన్నుకుంటూ నటుడిగా తన టాలెంట్ నిరూపించుకోవాలనుకుంటున్నాడు. కానీ ఈ మధ్యకాలంలో అతడు సరైన సక్సెస్ ను అందుకోలేకపోయాడు. రీసెంట్ గా విడుదలైన 'లక్ష్య' సినిమాకి ఫ్లాప్ టాక్ వచ్చింది. దీంతో తన తదుపరి సినిమాలపై దృష్టి పెట్టాడు. ప్రస్తుతం ఈ హీరో చేతిలో నాలుగు సినిమాలు ఉన్నాయి. 


అందులో ఒకటి తన సొంత బ్యానర్ లో చేస్తున్నాడు. అనీష్ ఆర్ కృష్ణ ఈ సినిమాను డైరెక్ట్ చేస్తున్నారు. ఈరోజు శౌర్య పుట్టినరోజు కానుకగా ఈ సినిమా ఫస్ట్ లుక్ పోస్టర్ ను విడుదల చేసింది చిత్రబృందం. ఈ సినిమాకి 'కృష్ణ వ్రింద విహారి' అనే టైటిల్ ను ఫిక్స్ చేశారు. ఇక ఫస్ట్ లుక్ పోస్టర్ లో శౌర్య ట్రెడిషనల్ లుక్ లో కనిపించారు. 







నిలువు బొట్టు, గంధం, చేతిలో ఇత్తడి చెంబు, మావిడాకులు చూస్తుంటే ఇందులో శౌర్య బ్రాహ్మణుడిగా కనిపించబోతున్నాడని తెలుస్తోంది. టైటిల్ ప్రకారం.. ఇందులో కృష్ణ అనే క్యారెక్టర్ పోషించబోతున్నారు శౌర్య. ఈ సినిమాలో షిర్లీ సేతియా హీరోయిన్ గా కనిపించనుంది. నటి రాధిక కీలకపాత్ర పోషిస్తుంది. ఈ సినిమాలో వెన్నెల కిషోర్, రాహుల్ రామకృష్ణ, సత్య, బ్రహ్మాజీ లాంటి నటులు కనిపించనున్నారు. ఉష ముల్పూరి ఈ సినిమాను నిర్మిస్తుండగా.. మహతి స్వాగర్ సంగీతం అందిస్తున్నారు.