Anil Ravipudi: అనిల్ రావిపూడి, వెంకటేశ్ కాంబినేషన్ మూవీపై కన్‌ఫ్యూజన్ - ఇంతకీ దీని కథ ఏంటి?

Venkatesh Upcoming Movie: ప్రస్తుతం వెంకటేశ్.. తనకు బ్యాక్ టు బ్యాక్ హిట్స్ అందించిన దర్శకుడు అనిల్ రావిపూడితో మరో సినిమా చేస్తూ బిజీగా ఉన్నారు. తాజాగా దాని గురించి ప్రేక్షకుల్లో చర్చ మొదలయ్యింది.

Anil Ravipudi: ఒక డైరెక్టర్, ఒక హీరో కలిసి హిట్ కొట్టారంటే మళ్లీ మళ్లీ వాళ్లు కలిసి పనిచేస్తే బాగుంటుందని ఫ్యాన్స్ అనుకుంటూ ఉంటారు. టాలీవుడ్‌లో అలాంటి హిట్ కాంబినేషన్స్ చాలానే ఉన్నాయి. అందులో ఒకటి అనిల్ రావిపూడి, విక్టరీ వెంకటేశ్ కాంబో. వెంకటేశ్‌కు ఫ్యామిలీ ఆడియన్స్‌లో చాలా క్రేజ్ ఉంది. అలా తన ఫ్యాన్స్ తనను ఎలా చూడాలనుకుంటున్నారో అలా చూపించి రెండుసార్లు హిట్ అందుకున్నాడు అనిల్ రావిపూడి. ఇప్పుడు వీరిద్దరూ కలిసి హ్యాట్రిక్ హిట్ కోసం సిద్ధమవుతున్నారు. కానీ ఈ మూవీ గురించి ప్రేక్షకుల్లో ఒక కన్‌ఫ్యూజన్ క్రియేట్ అయ్యింది.

ఆ సినిమా కాదా?

ఇప్పటికే అనిల్ రావిపూడి, వెంకటేశ్ కాంబినేషన్‌లో ‘ఎఫ్ 2’, ‘ఎఫ్ 3’ లాంటి రెండు సినిమాలు వచ్చి బ్లాక్‌బస్టర్ హిట్ అందుకున్నాయి. అయితే మరోసారి వెంకటేశ్, అనిల్ రావిపూడి కలిసి సినిమా చేస్తున్నారు అనగానే ఇది కూడా ఈ కామెడీ ఫ్రాంచైజ్‌కు సంబంధించిన సినిమానే అని ప్రేక్షకులు అనుకున్నారు. దీని టైటిల్ ‘ఎఫ్ 4’ అని కూడా ఫిక్స్ అయిపోయారు. అయితే ఇక్కడే ఈ ప్రాజెక్ట్ విషయంలో ఒక కన్‌ఫ్యూజన్ ఏర్పడింది. ఒకవేళ ఇది ఫ్రాంచైజ్‌లో భాగమే అయితే ఇందులో వరుణ్ తేజ్ కూడా ఉండాలి కదా, కానీ తాజాగా విడుదలయిన అనౌన్స్‌మెంట్ వీడియోలో అసలు వరుణ్ తేజ్ గురించి లేదే అన్న డౌట్ స్టార్ట్ అయ్యింది.

క్రైమ్ ఎంటర్‌టైనర్..

‘ఎఫ్ 2, ఎఫ్ 3 లాంటి బ్యాక్ టు బ్యాక్ బ్లాక్‌బస్టర్స్ తర్వాత విక్టరీ వెంకటేశ్, అనిల్ రావిపూడి కలిసి విక్టోరియస్ హ్యాట్రిక్ కోసం మరోసారి చేతులు కలపబోతున్నారు’ అంటూ కొన్నిరోజుల క్రితమే ఒక అనౌన్స్‌మెంట్ వీడియోను విడుదల చేశారు మేకర్స్. ఇందులో వెంకటేశ్.. ఒక మాజీ పోలీస్ ఆఫీసర్ అని కూడా రివీల్ చేశారు. మాజీ పోలీస్ ఆఫీసర్, మాజీ ప్రేమికురాలు, అద్భుతమైన భార్య.. ఈ ముగ్గురు మధ్య జరిగే కథ ఆధారంగా ఈ సినిమా తెరకెక్కుతుందని క్లారిటీ ఇచ్చారు. ‘ఈసారి ఒక ఎక్స్‌ట్రార్డినరీ ట్రాయాంగులర్ క్రైమ్ ఎంటర్‌టైనర్‌తో రాబోతున్నాం’ అంటూ ప్రకటించారు. ఈ అనౌన్స్‌మెంట్ వీడియో చూస్తుంటే ‘ఎఫ్ 2’ ఫ్రాంచైజ్‌తో సంబంధం లేనట్టుగా అనిపిస్తోందని వెంకీ ఫ్యాన్స్ అనుకుంటున్నారు.

త్వరలోనే అది కూడా..

ఒకవేళ ఈ మూవీ.. ‘ఎఫ్ 2’ ఫ్రాంచైజ్‌లో భాగం కాకపోయినా.. త్వరలోనే ఆ మూవీ కూడా తెరకెక్కబోతుందని అనిల్ రావిపూడి ఇప్పటికే క్లారిటీ ఇచ్చాడు. మాజీ పోలీస్, మాజీ ప్రేమికురాలు అంటూ ప్రస్తుతం వీరి కాంబినేషన్‌లో తెరకెక్కుతున్న ఈ సినిమాపై హైప్ పెంచేశాడు. సంక్రాంతికి ఈ సినిమాతో వస్తున్నామని కూడా అనౌన్స్‌మెంట్ వీడియోలో ప్రకటించేశారు మేకర్స్. ‘సంక్రాంతికి 'విక్టరీ వినోదం'తో కలుద్దాం’ అంటూ ఫ్యాన్స్‌లో జోష్ నింపారు.