Venkatesh Updates: సినిమాకే కాదు ఓటీటీకి కూడా సేమ్ ఫార్ములా అంటున్న విక్టరీ వెంకటేష్

రీమేక్స్ అన్ని వేళాలా అందరకీ కలిసొస్తాయనలేం కానీ వెంకటేశ్ కి మాత్రం రీమేక్ సెంటిమెంట్ సక్సెస్ ఫార్ములాగా మారిపోయింది. అందుకే త్వరలో ఓటీటీ ఎంట్రీ ఇవ్వనున్న ఈ వెంకీ సేమ్ ఫార్ములా ఫాలో అవుతున్నాడని టాక్.

మంచి కథలు వెతికిపట్టుకుని రీమేక్ చేసి హిట్టుకొట్టడంలో వెంకీమామ తర్వాతే ఎవరైనా. ఒకటి కాదు రెండు కాదు విక్టరీ వెంకటేశ్ కెరీర్లో ఎన్నో రీమేక్స్ ఉన్నాయి. వాటిలో కొన్ని డిజాస్టర్స్ గా మిగిలినా కొన్ని మాత్రం బ్లాక్ బస్టర్ హిట్టందుకున్నాయి. ఈ ఏడాదిలో ఇప్పటికే వచ్చిన ‘నారప్ప’ తమిళ మూవీ అసురన్ కి రీమేక్. త్వరలో విడుదల కాబోతున్న ‘దృశ్యం 2’ మలయాళం దృశ్యం 2 కు రీమేక్. త్వరలో ఓ కొరియన్ మూవీ రీమేక్ చేసే ఆలోచనలో ఉన్నట్టు టాక్. అయితే త్వరలోనే ఓటీటీ ఎంట్రీ ఇవ్వనున్న వెంకీ...ఇక్కడ కూడా రీమేక్ సెంటిమెంట్ కొనసాగించాలనే ఆలోచనలో ఉన్నాడట.

కరోనాకి ముందు తర్వాత చూసుకుంటే ఓటీటీ ట్రెండ్ ఇప్పుడు ఓ రేంజ్ లో ఉంది. దీంతో స్టార్ హీరోలు, హీరోయిన్ల చూపుకూడా ఓటీటీవైపు మళ్లుతోంది. టాలీవుడ్ ఈ కోవలో చాలామంది ఉన్నా సీనియర్ హీరోల్లో మొదట ఓటీటీ ఎంట్రీ ఇస్తున్నది వెంకటేశ్ కావడం విశేషం . అయితే తన కెరీర్లో ఎన్నో సక్సెస్ లు రీమేక్ సినిమాలద్వారానే వచ్చాయనే ఆలోచనలో ఉన్న వెంకీ... ఓటీటీ ఎంట్రీ కూడా రీమేక్ ద్వారానే ఉంటే బాగుంటుంది అనే అభిప్రాయంలో ఉన్నాడట. ఈ మేరకు ఓ స్పానిష్ వెబ్ సిరీస్ హక్తులను సురేశ్ బాబు కొనుగోలు చేసినట్టు తెలుస్తోంది. ఇప్పటికే నెట్ ఫ్లిక్స్ వారు ఆ వెబ్ సిరీస్ ను రీమేక్ చేసేందుకు ప్రయత్నించి డ్రాప్ అయ్యారట. ఇప్పుడా సిరీస్ ను రీమేక్ చేసి ఓటీటీకి అమ్మేసే యోచనలో ఉన్నాడట సురేశ్ బాబు. వెంకటేష్ ఇమేజ్ కు తగ్గట్లుగా మార్పులు చేర్పులు చేసినట్టు తెలుస్తోంది.

వెంకీ రీమేక్ చేసిన హిట్టుకొట్టిన సినిమాల విషయానికొస్తే ‘గురు’, ‘ఓ మై గాడ్’ రీమేక్ ‘గోపాల గోపాల’, ‘దృశ్యం’, ‘సంక్రాంతి’, ‘రాజా’, ‘సూర్యవంశం’, ‘ఇంట్లో ఇల్లాలు వంటింట్లో ప్రియురాలు’ , ‘చంటి’,’ వారసుడొచ్చాడు’,’ ధృవనక్షత్రం’, ‘బ్రహ్మపుత్రుడు’. ఇలా రీమేక్ లతో సెన్షేషనల్ సక్సెస్  దక్కించుకున్నాడని..ఇప్పుడు ఓటీటీ ఎంట్రీ కూడా రీమేక్ కావడంతో సక్సెస్ పక్కా అంటున్నారు దగ్గుపాటి అభిమానులు.