వైవిధ్యమైన సినిమాలతో, విలక్షణమైన పాత్రలతో తనకంటూ ప్రత్యేకమైన గుర్తింపు తెచ్చుకున్న హీరో నందమూరి కళ్యాణ్ రామ్. 'బింబిసార' సినిమాతో బ్లాక్ బస్టర్ అందుకున్న ఆయన, రెట్టింపు ఉత్సాహంతో బ్యాక్ టూ బ్యాక్ సినిమాలు చేసుకుంటూ వెళ్తున్నారు. ఇప్పటికే 'డెవిల్' చిత్రాన్ని పూర్తి చేసిన కళ్యాణ్ రామ్.. ఈ మూవీ రిలీజ్ అవ్వకముందే మరో ప్రాజెక్ట్ ని పట్టాలెక్కించడానికి రెడీ అయ్యారు. తన కెరీర్ లో 21వ చిత్రాన్ని పూజా కార్యక్రమాలతో లాంఛనంగా ప్రారంభించారు.
#NKR21 అనే వర్కింగ్ టైటిల్ తో కళ్యాణ్ రామ్ తన కొత్త చిత్రాన్ని అనౌన్స్ చేసారు. ఈ మూవీకి 'రాజా చెయ్యి వేస్తే' ఫేమ్ ప్ర‌దీప్ చిలుకూరి ద‌ర్శ‌క‌త్వం వహించనున్నారు. అశోక క్రియేష‌న్స్‌, ఎన్టీఆర్ ఆర్ట్స్ బ్యానర్స్‌ పై భారీ బ‌డ్జెట్ తో ఈ చిత్రం రూపొందనుంది. శుక్ర‌వారం ఈ సినిమా పూజా కార్యక్రమాలు హైదరాబాద్ లో జరిగాయి. ఈ వేడుకకు చిత్ర ప‌రిశ్ర‌మ‌కు చెందిన ప‌లువురు సినీ ప్రముఖులు హాజ‌ర‌య్యారు. ముహూర్త‌పు స‌న్నివేశానికి విజయశాంతి క్లాప్ కొట్ట‌గా.. ముర‌ళీ మోహ‌న్ కెమెరా స్విచ్ ఆన్ చేశారు. ముప్పా వెంక‌య్య చౌద‌రి స్క్రిప్ట్ అందించారు. దీనికి సంబంధించిన వీడియో, ఫోటోలను చిత్ర బృందం సోషల్ మీడియాలో షేర్ చేసింది.
NKR21 అనేది ఒక యాక్షన్ ప్యాక్డ్ మూవీ అని మేకర్స్ పేర్కొన్నారు. ఇందులో కళ్యాణ్ రామ్ సరసన 'మేజర్' ఫేమ్ స‌యీ మంజ్రేక‌ర్ హీరోయిన్ గా నటించనుంది. సీనియర్ నటి విజయశాంతి కీలక పాత్ర పోషించనుంది. 'సరిలేరు నీకెవ్వరూ' సినిమాతో రీఎంట్రీ ఇచ్చిన ఆమె.. దాదాపు మూడేళ్ళ గ్యాప్ తర్వాత చేస్తున్న చిత్రమిది. ప్రారంభోత్స‌వ వేడుక‌లో కళ్యాణ్ రామ్ తో పాటుగా విజయ శాంతి, స‌యీ మంజ్రేక‌ర్ సందడి చేసారు.
Also Read: మరో రెండేళ్ల తర్వాత పెళ్లి చేసుకుంటా: రేణూ దేశాయ్‌
ముప్పా వెంక‌య్య స‌మ‌ర్ప‌ణ‌లో అశోక్ వ‌ర్ధ‌న్ ముప్పా, సునీల్ బ‌లుసు NKR21 చిత్రాన్ని నిర్మిస్తున్నారు. 'కాంతారా' ఫేమ్ బి. అజ‌నీష్ లోక్‌ నాథ్ సంగీతం సమకూర్చనున్నారు. సి. రామ్ ప్ర‌సాద్ సినిమాటోగ్ర‌ఫీ అందిస్తుండ‌గా.. హరి కృష్ణ బండారి స్క్రీన్ రైటర్ గా వర్క్ చేస్తున్నారు. ఈ చిత్రంలో కళ్యాణ్ రామ్ పాత్ర చాలా ప‌వ‌ర్‌ ఫుల్‌ గా ఉంటుందని, ఆయన కెరీర్ లో గుర్తుండిపోయే సినిమా అవుతుందని చిత్ర వర్గాలు చెబుతున్నాయి. త్వరలోనే రెగ్యులర్ షూటింగ్ ప్రారంభమవుతుందని, రానున్న రోజుల్లో ఎగ్జైటింగ్ అప్డేట్స్ ఇవ్వబోతున్నట్లు పేర్కొన్నారు. ఇతర ప్రధాన నటీనటులు, సాంకేతిక నిపుణుల వివ‌రాల‌ను వెల్లడించాల్సి ఉంది.
నందమూరి ఫ్యామిలీ మూడో తరం నట వారసుడిగా, 'తొలి చూపులోనే' సినిమాతో హీరోగా పరిచయమైన కళ్యాణ్ రామ్.. 'అతనొక్కడే' 'పటాస్' '118' వంటి మంచి విజయాలు సాధించారు. 'బింబిసార' చిత్రంతో బిగ్గెస్ట్ బ్లాక్ బస్టర్ అందుకున్నప్పటికీ, 'అమిగోస్' మూవీ నిరాశ పరిచింది. ప్రస్తుతం 'డెవిల్ - ది బ్రిటిష్ సీక్రెట్ ఏజెంట్' మూవీతో పాన్ ఇండియా స్థాయిలో సత్తా చాటడానికి సిద్ధమయ్యారు. 1945 బ్రిటీష్ ఇండియాలోని మద్రాస్ ప్రెసిడెన్సీ నేపథ్యంలో తెరకెక్కిన ఈ సినిమా నవంబర్ లో విడుదల కానుంది.
దిల్ రాజు నిర్మాణంలో '118' ఫేమ్ కేవీ గుహన్‌ దర్శకత్వంలో కళ్యాణ్ రామ్ ఆ మధ్య ఓ సినిమా అనౌన్స్ చేసారు. ఏమైందో తెలియదు కానీ, ఇంత వరకూ సెట్స్ మీదకు వెళ్ళలేదు. అసలు ఆ సినిమా ఊసే లేదు. ఇక మల్లిడి వశిష్ఠ డైరెక్షన్ లో 'బింబిసార 2' మూవీ చేయనున్నట్లు తెలిపారు. కానీ దర్శకుడు మాత్రం మెగాస్టార్ చిరంజీవితో సినిమా చేయడానికి రెడీ అయిపోయారు. ఈ నేపథ్యంలో నందమూరి హీరో ఇప్పుడు ఒక ప్లాప్ డైరెక్టర్ తో NKR21 మూవీని ప్రారంభించారు. మరోవైపు నిర్మాతగా సోదరుడు జూనియర్ ఎన్టీఆర్ తో 'దేవర' సినిమా చేస్తున్నారు. కొరటాల శివ దర్శత్వంలో తెరకెక్కుతున్న ఈ చిత్రం వచ్చే ఏడాది ఏప్రిల్ లో విడుదల కానుంది.
Also Read: 'భగవంత్ కేసరి'లో జరిగిన తప్పుకి క్షమాపణలు చెప్పిన అనిల్ రావిపూడి!
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial