యువ కథానాయకుడు కార్తికేయ గుమ్మకొండ (Kartikeya Gummakonda) పుట్టిన రోజు ఈ రోజు (సెప్టెంబర్ 21). ఈ సందర్భంగా ఆయన కొత్త సినిమా టైటిల్ ప్రకటించారు. కాన్సెప్ట్ పోస్టర్ కూడా విడుదల చేశారు. గోదావరి మధ్యలో ఒక లంక... ఎగసి పడుతున్న అలలు... పైన గద్ద... కాన్సెప్ట్ పోస్టర్ ఆసక్తికరంగా ఉంది. టైటిల్ అంత కంటే ఆసక్తికరంగా... కాన్సెప్ట్ పోస్టర్‌కు తగ్గట్టు ఉంది.
'బెదురులంక 2012'లో ఏం జరిగింది బాసూ!?
కార్తికేయ హీరోగా ఉత్తమ తెలుగు చిత్రంగా జాతీయ పురస్కారం అందుకున్న 'కలర్ ఫొటో' తీసిన నిర్మాత రవీంద్ర బెనర్జీ (బెన్నీ) ముప్పానేని ఒక సినిమా నిర్మిస్తున్న సంగతి తెలిసిందే. ఆ సినిమాకు 'బెదురులంక 2012' (Bedurulanka 2012) టైటిల్ ఖరారు చేశారు. లౌక్య ఎంట‌ర్‌టైన్‌మెంట్స్‌ పతాకంపై ప్రొడక్షన్ నంబర్ 3గా బెన్నీ నిర్మిస్తున్న చిత్రమిది. దీనికి సి. యువరాజ్ చిత్ర సమర్పకులు. క్లాక్స్ దర్శకత్వం వహిస్తున్నారు.
చిత్రనిర్మాత బెన్నీ ముప్పానేని (Benny Muppaneni) మాట్లాడుతూ "కార్తికేయకు పుట్టినరోజు శుభాకాంక్షలు. ఆయన పుట్టినరోజు సందర్భంగా టైటిల్ వెల్లడించడం సంతోషంగా ఉంది. త్వరలో ఫస్ట్ లుక్ ప్రేక్షకుల ముందుకు తీసుకు రావడానికి సన్నాహాలు చేస్తున్నాం. గోదావరి నేపథ్యంలో సాగే కథతో చిత్రాన్ని తెరకెక్కిస్తున్నాం. ఇదొక కామెడీ డ్రామా. యానాం, కాకినాడ, గోదావరి పరిసర ప్రాంతాల్లో అందమైన లొకేషన్లలో షూటింగ్ చేశాం. ఇప్పటికి మూడు షెడ్యూల్స్ చేశాం. త్వరలో ఆఖరి షెడ్యూల్ చేయడానికి సన్నాహాలు చేస్తున్నాం. దాంతో సినిమా మొత్తం పూర్తవుతుంది. మెలోడీ బ్రహ్మ మణిశర్మ ఐదు అద్భుతమైన బాణీలను అందించారు. 'స్వర్గీయ' సిరివెన్నెల గారు మా చిత్రంలో ఒక పాట రాశారు" అన్నారు.
చిత్ర దర్శకుడు క్లాక్స్ మాట్లాడుతూ "డ్రామెడీ (డ్రామా + కామెడీ) జానర్ చిత్రమిది. ఇందులో కొత్త కార్తికేయ కనిపిస్తారు. పల్లెటూరి నేపథ్యంలో వినోదం, మానవ భావోద్వేగాలతో కూడిన కథతో చిత్రాన్ని రూపొందిస్తున్నాం. కంటెంట్‌తో పాటు కడుపుబ్బా నవ్వించే వినోదం ఉంది. మనసుకు నచ్చినట్టు జీవించే పాత్రలో హీరో కార్తికేయ కనిపిస్తారు. సమాజానికి నచ్చినట్లు బతకడం సరైనదా? మనసుకు నచ్చినట్టు బతకడం సరైనదా? అనేది సినిమాలో చూడాలి" అని చెప్పారు.
కార్తికేయకు జంటగా 'డీజే టిల్లు' భామ
కార్తికేయకు జంటగా ఈ సినిమాలో 'డీజే టిల్లు' ఫేమ్, యంగ్ హీరోయిన్ నేహా శెట్టి (Neha Shetty) నటిస్తున్నారు. అజయ్ ఘోష్, రాజ్ కుమార్ కసిరెడ్డి, శ్రీకాంత్ అయ్యంగార్, 'ఆటో' రామ్ ప్రసాద్, గోపరాజు రమణ, ఎల్బీ శ్రీరామ్, సత్య, సురభి ప్రభావతి, కిట్టయ్య, అనితానాథ్, దివ్య నార్ని ప్రధాన తారాగణం.
Also Read : రాంగ్ రూట్‌లో ఆస్కార్స్‌కు 'ఛెల్లో షో'? - సోషల్ మీడియాలో షేక్ చేస్తున్న డౌట్స్ ఇవే!
ఈ చిత్రానికి యాక్షన్: అంజి, పృధ్వీ, సాహిత్యం: సిరివెన్నెల సీతారామశాస్త్రి, కిట్టూ విస్సాప్రగడ, కృష్ణ చైతన్య, ఎగ్జిక్యూటివ్ నిర్మాత: దుర్గారావు గుండా, ఛాయాగ్రహణం: సాయి ప్రకాష్ ఉమ్మడిసింగు, సన్నీ కూరపాటి, కొరియోగ్రాఫర్: బృంద, మోయిన్, సంగీతం: మణిశర్మ, సహ నిర్మాతలు: అవనీంద్ర ఉపద్రష్ట, వికాస్ గున్నల, సమర్పణ: సి. యువరాజ్, నిర్మాత: రవీంద్ర బెనర్జీ ముప్పానేని, రచన - దర్శకత్వం: క్లాక్స్.