Visakha Crime: విశాఖ జిల్లాలో విషాదం... పసికందును నీళ్ల డ్రమ్ములో పడేసిన తల్లి...

విశాఖ జిల్లాలో దారుణం జరిగింది. అన్యం పుణ్యం ఎరుగని పసికందును కన్న తల్లే నీళ్ల డ్రమ్ములో పడేసి హత్య చేసింది. ఆమెకు మానసిక పరిస్థితి సరిగాలేదని గుర్తించిన పోలీసులు వైద్యులను సంప్రదించారు.

విశాఖ జిల్లా కసింకోట మండలం ఏఎస్ పేటకు చెందిన అప్పలరాజుకు గొండుపాలెం గ్రామానికి చెందిన సంధ్య అనే యువతితో గతేడాది నవంబర్​లో వివాహమైంది. వీరికి మగ శిశువు జన్మించాడు. దంపతులిద్దరూ అచ్యుతాపురంలోని ఓ ప్రైవేట్ కంపెనీలో పని చేస్తున్నారు. శుక్రవారం విధులు ముగించుకుని ఇంటికి వచ్చారు. భోజనం చేసి నిద్రకు ఉపక్రమించారు. రాత్రి పది గంటల సమయంలో ఏడిస్తే సంధ్య పిల్లాడికి పాలు పట్టింది. అనంతరం అందరూ నిద్రపోతున్న సమయంలో శిశువును నీటి డ్రమ్ములో పడేసి హత్య చేసింది. అర్ధరాత్రి సమయంలో శిశువు కనిపించకపోవడంతో అప్పలరాజు బాబు కోసం వెతికాడు. సంధ్యను అడిగితే పొంతన లేని సమాధానం చెప్పడంతో ఇంటి చుట్టుపక్కలా వెతికాడు. ఫలితం లేకపోవడంలో 100 నంబర్​కు ఫోన్ చేశాడు. తండ్రి ఫిర్యాదుతో అప్రమత్తమైన పోలీసులు... సంఘటనా స్థలాన్ని పరిశీలించారు. ఇంటి సమీపంలో గాలింపు చేపట్టగా నీటి డ్రమ్ములో శిశువు మృతదేహం లభించింది. 

చిన్నారిని నీటి డ్రమ్ములో పడేసి...

ఈ ఘటనపై కేసు నమోదు చేసుకుని దర్యాప్తు చేపట్టిన పోలీసులు కన్నతల్లే తన శిశువును హతమార్చినట్లు గుర్తించారు. సంధ్యకు మానసిక పరిస్థితి సరిగా లేదని గుర్తించిన పోలీసులు...వైద్యులను సంప్రదించారు. చిన్నారికి పాలు పట్టే సమయంలో నొప్పి వస్తున్నట్లు సంధ్య తన కుటుంబసభ్యులకు చెప్పినట్లు తెలుసుకున్నారు. ఈ క్రమంలోనే శిశువును హతమార్చినట్లు పోలీసులు తెలిపారు. ఈ విషయమై నిందితురాలిని విచారించగా శిశువును తానే చంపినట్లు ఒప్పుకున్నట్లు తెలిపారు. అందరూ నిద్రపోతున్న సమయంలో చిన్నారిని నీటి డ్రమ్ములో వేసి చంపినట్లు ఒప్పుకుంది. నిందితురాలి వాంగ్మూలంతో పోలీసులు హత్య కేసు నమోదు చేసి, నిందితురాలిని అరెస్టు చేసినట్లు అనకాపల్లి రూరల్ సీఐ శ్రీనివాసరావు తెలిపారు. నిందితురాలి మానసిక స్థితిపై వైద్యులు ఇచ్చిన నివేదిక ఆధారంగా తదుపరి చర్యలు తీసుకుంటామని తెలిపారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి