India GDP Growth: దటీజ్‌ ఇండియా! జీడీపీ వృద్ధిరేటు 6.3% - నెమ్మదించినా ప్రపంచంలోనే బెస్ట్‌!

India GDP Growth: భారత ఆర్థిక వ్యవస్థ వృద్ధిరేటు కాస్త నెమ్మదించింది. జులై-సెప్టెంబర్‌ త్రైమాసికంలో 6.3 శాతం వృద్ధిరేటు నమోదు చేసింది. అంతర్జాతీయంగా అత్యధిక జీడీపీ వృద్ధిరేటు భారత్‌కే సొంతం!

India GDP Growth: భారత ఆర్థిక వ్యవస్థ వృద్ధిరేటు కాస్త నెమ్మదించింది. జులై-సెప్టెంబర్‌ త్రైమాసికంలో 6.3 శాతం వృద్ధిరేటు నమోదు చేసింది. తయారీ రంగంలో బలహీనత, కంపెనీల మార్జిన్లు తగ్గడంతో వేగం మందగించింది. అంతర్జాతీయంగా అత్యధిక జీడీపీ వృద్ధిరేటు భారత్‌కే సొంతం!

* కేంద్ర ప్రభుత్వం బుధవారం సాయంత్రం రెండో త్రైమాసికం జీడీపీ గణాంకాలు విడుదల చేసింది. '2022-23 రెండో త్రైమాసికంలో వాస్తవ జీడీపీని 38.17 లక్షల కోట్లుగా అంచనా వేసింది. 2021-22 రెండో త్రైమాసికంలోని రూ.35.89 లక్షలతో పోలిస్తే 6.3 శాతం వృద్ధి చెందినట్టు చెప్పింది. గతంలో ఇది 8.4 శాతం అని ఆర్థిక శాఖ వెల్లడించింది.

* సెప్టెంబర్‌తో ముగిసిన త్రైమాసికంలో జీడీపీ వృద్ధిరేటు మందగించింది. ఏప్రిల్‌-జూన్‌లో ఇది 13.5 శాతంగా ఉండేది. అప్పటికి కొవిడ్‌ నిబంధనలు ఎత్తేస్తుండటం, ఎకనామిక్‌ యాక్టివిటీ పుంజుకోవడం కారణాలు.

*  ఈ త్రైమాసికంలో తయారీ రంగం వృద్ధిరేటు 5.6 శాతం నుంచి 4.3 శాతానికి తగ్గింది. వ్యవసాయ రంగం 4.6 శాతం వృద్ధిరేటు నమోదు చేసింది. గతంలో ఇది 4.5 శాతం కావడం గమనార్హం.

* ముడి వనరుల ధరలు పెరగడం, కంపెనీల మార్జిన్లు తగ్గడంతో తయారీ రంగం వృద్ధిరేటు బలహీన పడిందని ఎస్‌బీఐ రీసెర్చ్‌ రిపోర్టు పేర్కొంది. గతంతో పోలిస్తే ట్రేడ్‌, హాస్పిటాలిటీ, టూరిజం వృద్ధిరేటు 9.6 నుంచి 14.7 శాతానికి పెరిగింది.

* గతంలోని 14.5 శాతం పోలిస్తే మైనింగ్‌ రంగం వృద్ధిరేటు 2.8 శాతానికి కుంచించుకుపోయింది. అయితే నిర్మాణ రంగం మాత్రం 6.6 శాతం వృద్ధిరేటు నమోదు చేసింది.

* రెండో త్రైమాసికంలో వృద్ధిరేటు 6.1-6.3 శాతంగా ఉంటుందని ఆర్బీఐ అంచనా వేసింది. చాలామంది విశ్లేషకులు, ఇండస్ట్రీ నిపుణులు జీడీపీ వృద్ధిరేటు 5.8 నుంచి 7.2 శాతం మధ్య ఉంటుందని అంచనా వేయడం గమనార్హం.

* జులై-సెప్టెంబర్‌ త్రైమాసికం వృద్ధిలో డొమస్టిక్‌ డిమాండ్‌ కీలక పాత్ర పోషించిందని, ఎగుమతుల జోరు తగ్గిందని డీబీఎస్‌ గ్రూప్‌ రీసెర్చ్‌ ఎగ్జిక్యూటివ్‌ డైరెక్టర్‌ రాధికా రావ్‌ తెలిపారు.

* స్థూల విలువ ఆధారంగా ఈ త్రైమాసికంలో జీడీపీ వృద్ధిరేటు 12.7 నుంచి 5.6 శాతానికి తగ్గింది. అంతకు ముందు ఏడాది ఇది 8.3 శాతంగా ఉంది. ఈ ఏడాది తొలి ఆరు నెలల్లో గ్రోత్‌రేట్‌ 13.7 శాతం నుంచి 9.7 శాతానికి నెమ్మదించింది.

* రష్యా-ఉక్రెయిన్‌ యుద్ధం కొనసాగుతున్నా, ద్రవ్యోల్బణం పెరిగినా చైనాతో పోలిస్తే భారత్‌ మెరుగ్గా ఉంది. జులై-సెప్టెంబర్లో చైనా 3.9 శాతం వృద్ధిరేటు నమోదు చేసింది.

* కొవిడ్‌ అవాంతరాలు తొలగిపోవడం, పండుగల సీజన్‌ కావడంతో ప్రభుత్వం క్యాపిటల్‌ స్పెండింగ్‌ పెంచింది. ఈ ఏడాది 40 శాతం అధికంగా అంటే రూ.1.67 ట్రిలియన్లు ఖర్చు చేసింది. సెప్టెంబర్‌తో మొదలైన పండగల సీజన్‌ క్రిస్మస్‌తో ముగియనుంది. గ్రోత్‌ ఇలాగే కొనసాగనుంది.