శ్రీకాకుళం నగరంలోని పొట్టి శ్రీరాములు మార్కెట్ పరిసరాలలో హెూల్ సేల్ వ్యాపారం సాగిస్తున్న వ్యాపారవేత్త కోరాడ గోవింద్ ఇంట్లోకి అర్ధరాత్రి రాత్రి గుర్తు తెలియని వ్యక్తులు చొరబడి హల్ చల్ చేశారు. కత్తులతో ఇంట్లోకి ప్రవేశించి ముగ్గురు వ్యక్తులు ఇంట్లో ఉండే వారిని భయబ్రాంతులకి గురిచేశారు. సమయంలో ఇంట్లో ఉన్న గోవింద్ సోదరుడు కుమారుడు గట్టిగా కేకలు వేస్తూ అడ్డుకునే ప్రయత్నం చేయడంతో వారంతా పరారయ్యారు.
కత్తులతో ఇంట్లోకి ప్రవేశించిన దుండగులు
కిన్నెర థియేటర్ జంక్షన్ సమీపంలోని కాకివీది ప్రధాన మార్గంలోనే కోరాడ గోవింద్ ఇళ్ళు ఉంది. ఆ ప్రాంతం నిత్యం రద్దీగానే ఉంటుంది. ఇరుగుపొరుగున షాపులు ఉన్నాయి. రద్దీగా ఉండే సమయంలోనే గోవింద్ ఇంట్లోకి ముందు ద్వారం నుంచి ఇద్దరూ, వెనుక వైపు నుంచి ఒక్కరు ప్రవేశించి కత్తులు చూపించినట్లుగా తెలుస్తోంది. ఇంట్లో మహిళలు మాత్రమే ఉండగా ఆ సమయంలో గోవింద్ సోదరుడు కుమారుడు వారితో మాట్లాడుతున్నారు. గుర్తు తెలియని వ్యక్తులు కత్తులతో ప్రవేశించడంతో.. ఇంట్లోని వస్తువులను చూపించి గట్టిగా కేకలు వేస్తూ ఆ యువకుడు వారిని ప్రతిఘటించేందుకు ప్రయత్నం చేశాడు. దాంతో అలికిడి అవడంతో దుండగులు పరారయ్యారు. ఈ సంఘటన స్థానికంగా కలకలం రేపింది.
పోలీసుల అదుపులో ఒక నిందితుడు
పోలీసులకి సమాచారం అందడంతో వారు వెంటనే రంగంలోకి దిగారు, కోరాడ, గోవింద్ ఇంటిని శ్రీకాకుళం సర్కిల్ ఇన్స్ పెక్టర్ సందర్శించారు. ఘటనపై ఆరా తీశారు. ఈ మేరకు పోలీసు బృందాలను రంగంలోకి దించి నిందితుల కోసం గాలింపు చర్యలు చేపట్టారు. పోలీసులు ఒక్కరిని అదుపులోకి తీసుకున్నట్లుగా తెలుస్తోంది. ఉద్దేశపూర్వకంగానే వారు గోవింద్ ఇంట్లోకి చొరబడ్డారా లేదా అన్న దానిపై అంతా మాట్లాడుకుంటున్నారు. అతడికి ఎవరితోనైనా విభేదాలు ఉన్నాయా, సుపారీ ఇచ్చారా అన్న అనుమానాలు కూడా వ్యక్తమవుతున్నాయి. పోలీసుల విచారణ పూర్తైతే పూర్తి వివరాలు వెలుగులోకి వస్తాయి. వ్యాపారం నిమిత్తం కొంతమంది వ్యాపారులు ఇతర ప్రాంతాలకు వెళుతూ ఉంటారు. ఇలా కత్తులతో బెదిరింపులు అనేది ఒక్కసారిగా ఉలిక్కిపడేలా చేసింది.
బిహార్ గ్యాంగ్ తిరుగుతుందని వ్యాపారుల్లో టెన్షన్ టెన్షన్
గత పది రోజులుగా జిల్లాలో బీహార్ గ్యాంగ్ తిరుగుతుందని సమాచారంతో భయంతో వ్యాపారస్తులు ఉన్నారు. నిన్న పోలీసులు బిహార్ నుంచి వచ్చి సుపారీ గ్యాంగ్‌ను అరెస్ట్ చేశారు. దీంతో నగరం ఒకసారిగా ఉలిక్కిపడింది. ఇలాంటి ఘటనలు చూస్తుంటే భయమేస్తుందని పోలీసులు మాత్రం ఎటువంటి భయపడాల్సిన అవసరం లేదని చెబుతున్నారు. కత్తులతో ఇలా దాడులకు పాల్పడడంపై పోలీసులు ప్రత్యేక నిఘా ఏర్పాటు చేశారు. వ్యాపారి సంబంధించి ఎలాంటి లావాదేవీలు జరిగాయి, ఎవరితోనైనా వివాదాలు ఉన్నాయా అని పోలీసులు విచారణ చేపట్టారు. అయితే ఎప్పుడు లేని విధంగా శ్రీకాకుళం పట్టణంలో కత్తులతో బెదిరింపు పాల్పడడంపై పోలీసులు కూడా దీని మీద ప్రతిష్టాత్మకంగా తీసుకున్నారు ఎట్టి పరిస్థితుల్లోనైనా సరే సరైన నివేదిక ఇవ్వాలని క్లూస్ టీం తో సహా రంగంలో దిగారు పోలీసులు.
మార్కెట్లో వ్యాపారం చేస్తూ అనంతరం ఇంటికి వెళ్లే మార్గమధ్యంలో కూడా ఇలాంటి ఘటనలు ఒక రెండు సార్లు జరిగిన దాఖలాలు ఉన్నాయి. దీంతో ఇప్పుడు వ్యాపారస్తుల్లో అందరిలో భయం మొదలైంది. ప్రధానంగా ప్రతి ఇంటి దగ్గర కూడా సీసీ కెమెరాలు పెడితే చాలా వరకు ఉపయోగంగా ఉంటుందని కూడా చెబుతున్నారు. భయపడాల్సిన అవసరం లేదని వ్యాపారస్తులందరికీ పోలీసులు హామీ ఇస్తున్నారు. కానీ దుండగులు ఏ టైంలో ఎక్కడి నుంచి దాడి చేస్తారో అంటూ ఆవేదన వ్యక్తం చేస్తున్నారు.