నదీస్నానం ఉత్తమం మకర సంక్రాంతి రోజున గలగలపారే నీటిలో స్నానం చేయడం చాలామంచిదంటారు. దేశంలో వివిధ ప్రాంతాల ప్రజలు ఈరోజు గంగా నదిలో కానీ, తమకు సమీపంలో ఉన్న నదిలో కానీ స్నానం చేస్తారు.
ఈ అవకాశం లేనివారు... గతంలో నదీస్నానానికి వెళ్లినప్పుడు బాటిల్స్ లో తీసుకొచ్చిన నీటిని ట్యాంక్ లో మిక్స్ చేసి చేసినా కొంత ఫలితం ఉంటుంది.
సూర్యుడికి నమస్కారం చేయండి ఈ మూడు రోజులైనా తెల్లవారుజామునే లేచి స్నానమాచరించి..సూర్యుడికి అర్ఘ్యం( దోసిలితో నీరు) అర్పించండి.
మకర రాశిలోకి ప్రవేశించిన సూర్య భగవానుని ఆరాధించడం వల్ల ఇప్పటి వరకూ జీవితంలో ముసురుకున్న చీకట్లు మాయమై వెలుగులు విరజిమ్ముతాయని విశ్వాసం.
మీ శక్తి మేరకు దానం చేయండి పండుగ అంటేనే అంతా సంతోషంగా ఉండడం. అందుకే ఈ రోజున పేదలకు అన్నదానం చేయండి. వస్త్రదానం మరీ మంచిది. ఇంటింటా సందడి చేసే డూడూ బసవన్నకి ఆహారం అందించండి.
పిండి వంటలు పంచుకోండి సంక్రాంతికి దాదాపు పది రోజుల ముందు నుంచీ పిండివంటలు ఘుమఘుమలాడిపోతుంటాయి. ఏ ఇంట చూసినా పిండి వంటలు తయారీనే...సరదాగా చుట్టుపక్కల వారితో మీరు చేసిన వంటకాలు పంచుకోండి.
ఆకలితో ఉన్నవారు కనిపించకూడదు పండుగ రోజుల్లో మధ్యాహ్నం భోజనం తర్వాత భుక్తాయాసం తీర్చుకునేందుకు మీ చుట్టుపక్కల ప్రాంతాన్ని అలా చుట్టేసి రండి. ఎక్కడైనా ఎవరైనా ఆకలితో ఉంటే ఆ రోజు వారికి మీకు తోచిన సాయం చేయండి.
పండుగ రోజు మనం పది రకాల వంటకాలతో భోజనం చేయడం కాదు.. పస్తులున్న వారికి గుప్పెడు మెతుకులు ఇవ్వడం కన్నా పెద్ద పండుగ ఏముంది.