నెల్లూరు జిల్లా కోవూరుకి చెందిన రఘురాం ఇటీవల తన కుమార్తె పుట్టినరోజు సందర్భంగా స్థానికంగా ఉన్న ఓ షాపులో చాక్లెట్ బాక్స్ కొన్నాడు. ఆ చాకెట్లను విప్పి చూస్తే అన్నీ పురుగులే ఉన్నాయి. అదేంటని షాపు యజమానిని ప్రశ్నిస్తే సమాధానం చెప్పలేదు. దీంతో ఆ వ్యక్తి తన పిల్లల్ని తీసుకుని నేరుగా తహశీల్దార్ ని కలసి ఫిర్యాదు చేశాడు. పిల్లల ఆరోగ్యంతో చెలగాటమాడుతున్న షాపుల యాజమాన్యాలపై కఠిన చర్యలు తీసుకోవాలని కోరాడు. అయితే తహశీల్దార్ పోలీసు స్టేషన్ లో ఫిర్యాదు చేయడంతో పాటు ఫుడ్ సేఫ్టీ అధికారులకు ఫిర్యాదు చేయాలని సూచించారు. దీంతో బాధితుడు రఘురాం పోలీసులు, ఫుడ్ సేఫ్టీ అధికారులకు ఫిర్యాదు చేశాడు. ఈ ఫిర్యాదుతో ఇవాళ నెల్లూరు జిల్లా కోవూరులో ఫుడ్ సేఫ్టీ అధికారులు దాడులు నిర్వహించారు. చాక్లెట్లు అమ్మిన షాపుతోపాటు, మిగతా షాపుల్లో తనిఖీలు చేపట్టారు. అయితే ఫుడ్ సేఫ్టీ అధికారులు వస్తున్నారని తెలిసే సరికి ఊరు ఊరంతా షాపులు మూతబడ్డాయి. కోవూరులో అన్ని షాపులు షట్టర్లు దించేసి వ్యాపారులు ఎక్కడివారక్కడ గప్ చుప్ అయిపోయారు. ఒక్కసారిగా కోవూరులో షాపులన్నీ మూతబడటంతో స్థానికులకు ఏం జరుగుతుందో అర్థం కాలేదు.
హైదరాబాద్ లో మరో ఘటన
హైదరాబాద్ కూకట్ పల్లి విజేత సూపర్ మార్కెట్ లో ఫుడ్ సేఫ్టీ అధికారుల దాడులు నిర్వహించారు. కాలం చెల్లిన వస్తువులు అమ్ముతున్నట్లు తనిఖీల్లో అధికారులు గుర్తించారు. 3 నెలల క్రితం డేట్ అయిపోయిన లస్సీని విజేత సూపర్ మార్కెట్ లో విక్రయించారు. డేట్ చూసుకోక లాస్సి తాగిన ఓంకేశ్ అనే వినియోగదారుడు అస్వస్థతకు గురయ్యారు. అనంతరం ఓంకేశ్ ఫుడ్ సేఫ్టీ అధికారులకు ఫిర్యాదు చేశారు. ఈ ఫిర్యాదుతో ఫుడ్ సేఫ్టీ అధికారులు సూపర్ మార్కెట్లో దాడులు చేశారు. మార్కెట్లో బొద్దింకలు, ఎలుకలు, కాలం చెల్లిన వస్తువులను గుర్తించారు. కూకట్ పల్లి పోలీసులకు బాధితుడి ఓంకేశ్ ఫిర్యాదు చేశారు.
Also Read: ఏపీ సర్కార్‌కు మరో ఝలక్.. ఇక ఆ ఉద్యోగులు కూడా రంగంలోకి.. ఈ నెల జీతాలు రానట్లే..!