Telangana News: జన్వాడ ఫామ్‌ హౌస్‌లో జరిగిన మందుపార్టీ కేసులో విచారణ వేగవంతమైంది. ఈ కేసులో విచారణకు కేటీఆర్ బావమరిది రాజ్‌పాకాల హాజరయ్యారు. తన అడ్వకేట్‌తో కలిసి మోకిల పోలీస్‌స్టేషన్‌లో విచారణకు హాజరయ్యారు. ప్రస్తుతం అక్కడే విచారణ కొసాగుతోంది.
జన్వాడ ఫామ్‌ హౌస్‌ కేసు సంచలనంగా మారింది. రాజకీయంగా కూడా పెను దుమారం రేగింది. అధికార, ప్రతిపక్షాల మధ్య విమర్శలు ప్రతివిమర్శలు చేసుకున్నారు. అందుకే ఈ కేసుపై అందరి దృష్టి నెలకొంది. ఇందులో కేటీఆర్ బావమరిది రాజ్ పాకాల ఉండటంతో ఈ కేసు రాజకీయాలను షేక్ చేసింది.
ఈ కేసులో రాజ్‌పాకాలను పోలీసులు రెండు రోజుల క్రితమే నోటీసులు ఇచ్చారు. మంగళవారం సాయంత్రం లోపు విచారణకు రావాలని ఆదేశించారు. బుధవారం విచారణకు వస్తానంటూ పోలీసులకు రాజ్‌పాకాస సమాచారం ఇవ్వడంతో ఓకే చెప్పారు.
మరోవైపు ఈ కేసులోనే విజయ్ మద్దూరి కోసం పోలీసులు గాలిస్తున్నారు. తొలిరోజు విచారణకు హాజరైన ఆయన ఇప్పుడు పోలీసుల విచారణకు అందుబాటులో లేరని తెలుస్తోంది. ఫోన్‌ అడిగినా ఇచ్చేందుకు నిరాకరించినట్టు సమాచారం. మంగళవారం అర్థరాత్రి విజయ్ మద్దూరి నివాసంలో పోలీసులు తనిఖీలు చేశారు. అక్కడ ఏం దొరికింది. ఎందుకు సోదాలు చేశారనే విషయంపై పోలీసులు ఏం చెప్పడం లేదు.
ఇదే కేసులో వీళ్లిద్దరితోపాటు మరికొందరికి కూడా మోకిల పోలీసులు నోటీసులు ఇచ్చారు. అందులో కొందరి వాంగ్మూలం రికార్డు చేశారు. ప్రస్తుతం రాజ్‌పాకాలను విచారిస్తున్నారు. తర్వాత పోలీసులు ఏం చేయబోతున్నారనే ఆసక్తి నెలకొంది.