US Open Tennis 2022: వరుస విజయాలతో ఫామ్ లో ఉన్న ఇగా స్వైటెక్ ప్రతిష్టాత్మక యూఎస్ ఓపెన్ 2022 టోర్నీ విజేతగా నిలిచింది. ఈ ట్రోఫీని అందుకున్న తొలి పోలెండ్ మహిళగా రికార్డుకెక్కింది. ప్రతిష్టాత్మక యూఎస్ ఓపెన్ 2022 టోర్నీ టైటిల్ పోరులో ఇగా స్వైటెక్ అదరగొట్టింది. అంచనాలకు తగ్గట్టుగా ఆడిన ఈ పోలెండ్ స్టార్ ప్లేయర్‌ ఫైనల్లో ప్రత్యర్థిని చిత్తు చేసి తన లక్ష్యాన్ని సాధించింది. 6-2,7-6(5) తేడాతో ట్యునీషియా అమ్మాయి ఐదో సీడ్‌ ఆన్స్ జాబెర్ను ఓడించింది.
తొలి పోలెండ్ క్రీడాకారిణి
యూఎస్ ఓపెన్లో ఇదే ఆమెకు తొలి టైటిల్. అలానే ఈ ట్రోఫీ అందుకున్న తొలి పోలెండ్ క్రీడాకారిణిగానూ స్వైటెక్ రికార్డు సృష్టించింది. ఇది తనకు మూడో గ్రాండ్‌స్లామ్‌ టైటిల్. 2020, 2022లో ఫ్రెంచ్‌ ఓపెన్ టైటిళ్లను గెలుచుకుంది. తాజా విజయంతో ఆమె ప్రపంచ నం.1 ర్యాంక్‌ను మరింత బలోపేతం చేసుకుంది.
అంతర్జాతీయ మ్యాచుల్లో గత కొన్ని నెలలుగా ఉక్రెయిన్‌కు మద్దతుగా స్వైటెక్ తన టోపీపై ప్రత్యేకమైన రిబ్బన్‌ ధరించి బరిలోకి దిగుతోంది. ఈ ఏడాది ఆమె 3 సార్లు గ్రాండ్‌ స్లామ్‌ సెమీస్‌కు చేరగా 2 సార్లు టైటిళ్లను సాధించింది. సెమీస్‌కు చేరిన వాటిల్లో ఆస్ట్రేలియన్‌ ఓపెన్, ఫ్రెంచ్‌ ఓపెన్, యూఎస్ ఓపెన్ టోర్నీలు ఉన్నాయి. ఒక టాప్‌ సీడెడ్‌ క్రీడాకారిణి యూఎస్ ఓపెన్ టైటిల్ గెలవడం 8 ఏళ్ల తర్వాత ఇదే తొలిసారి. 2014లో సెరెనా విలియమ్స్‌ టాప్‌సీడెడ్‌ క్రీడాకారిణిగా బరిలోకి దిగి ఈ టైటిల్‌ను అందుకొన్నారు.ఈ సీజన్‌లో ఆమె ఒక దశలో వరుసగా 37 మ్యాచ్‌ల్లో ఓటమిని చవిచూడలేదు. వింబుల్డన్‌ మూడో రౌండ్‌లో ఈ జైత్రయాత్రకు అడ్డుకట్ట పడింది.