దక్షిణాఫ్రికాతో రెండో టెస్టులో టీమ్‌ఇండియాకు షాక్‌ తగిలింది! కెప్టెన్‌ విరాట్‌ కోహ్లీ అందుబాటులో ఉండటం లేదు. వెన్నునొప్పి కారణంగా అతడు జట్టుకు దూరమయ్యాడు. అతడి స్థానంలో కేఎల్‌ రాహుల్‌ భారత్‌కు సారథ్యం వహిస్తున్నాడు. కఠినమైన వాండరర్స్‌ పిచ్‌పై విరాట్‌ లేకపోవడం ఇబ్బందికరమే!
టాస్‌ సమయంలో విరాట్‌ కోహ్లీ బదులు కేఎల్‌ రాహుల్‌ మైదానంలోకి రావడం అందరినీ ఆశ్చర్యపరిచింది. విరాట్‌ ఎందుకు రావడం లేదో ఎవరికీ అర్థం కాలేదు. అయితే టాస్‌ గెలిచిన తర్వాత కేఎల్‌ రాహుల్‌ అసలు కారణం చెప్పాడు. విరాట్‌ వెన్నునొప్పితో బాధపడుతున్నాడని వివరించాడు. అతడిని ఫిజియోలు పర్యవేక్షిస్తున్నారని పేర్కొన్నాడు. బహుశా మూడో టెస్టు లోపు కోలుకుంటాడని ధీమా వ్యక్తం చేశాడు. అతడి స్థానాన్ని హనుమ విహారి భర్తీ చేస్తున్నాడని వెల్లడించాడు.
ప్రస్తుతం మ్యాచ్‌ జరుగుతున్న వాండరర్స్‌లో కోహ్లీకి మంచి రికార్డు ఉంది. ఇప్పటి వరకు అతనక్కడ 310 పరుగులు చేశాడు. అతడు మరో 7 పరుగులు చేస్తే జాన్‌ రీడ్‌ 316 రికార్డును బద్దలు కొట్టేస్తాడు. ఈ మైదానంలో అత్యంత విజయవంతమైన పర్యాటక బ్యాటర్‌గా అవతరిస్తాడు. 2013లో విరాట్‌ ఇక్కడ పరుగుల వరద పారించాడు. తొలి ఇన్నింగ్స్‌లో శతకం బాదేశాడు. రెండో ఇన్నింగ్స్‌లో 96 పరుగులు చేశాడు. కాగా ఈ మ్యాచ్‌ డ్రా అయింది. ఇక 2018లో వరుసగా 54, 41 పరుగులు సాధించాడు. ఈ మ్యాచ్‌ ఆడటం లేదు కాబట్టి రీడ్‌ రికార్డు బద్దలు చేయాలంటే కోహ్లీ మరికొంత కాలం ఆగాల్సిందే.
భారత జట్టు: కేఎల్‌ రాహుల్‌, మయాంక్‌ అగర్వాల్‌, చెతేశ్వర్‌ పుజారా, అజింక్య రహానె, హనుమ విహారి, రిషభ్ పంత్‌, రవిచంద్రన్‌ అశ్విన్‌, శార్దూల్‌ ఠాకూర్‌, మహ్మద్‌ షమి, జస్ప్రీత్‌ బుమ్రా, మహ్మద్‌ సిరాజ్‌