భారత్, పాకిస్తాన్‌ల మధ్య జరిగిన వరల్డ్ కప్ క్రికెట్ మ్యాచ్‌లో పాకిస్తాన్ కెప్టెన్ బిస్మా మరూఫ్ ఆరు నెలల కూతురితో కనిపించిన ఫొటో ఇప్పుడు నెట్టింట వైరల్ అవుతోంది. ఈ ఫొటోకు ఫ్యాన్స్ నుంచే కాకుండా క్రికెట్ ప్రేమికుల నుంచి కూడా మంచి రెస్పాన్స్ వస్తుంది. భారత క్రికెటర్లు ఈ పాపతో తీసుకున్న ఫొటోలు, వీడియోలు ఇప్పుడు హాట్ టాపిక్‌గా మారాయి. దేశాలతో సంబంధం లేకుండా క్రికెట్ అభిమానులందరూ ఈ ఫొటోలకు కామెంట్లు చేస్తున్నారు.
ఇక మ్యాచ్ విషయానికి వస్తే... మొదట బ్యాటింగ్ చేసిన టీమిండియా 50 ఓవర్లలో ఏడు వికెట్ల నష్టానికి 244 పరుగులు చేసింది. పూజా వస్త్రాకర్ (67: 59 బంతుల్లో, ఎనిమిది ఫోర్లు) టాప్ స్కోరర్ కాగా... స్నేహ్ రాణా (53 నాటౌట్: 48 బంతుల్లో, నాలుగు ఫోర్లు), స్మృతి మంథన (52: 75 బంతుల్లో, మూడు ఫోర్లు, ఒక సిక్సర్) అర్థ సెంచరీలు సాధించారు. అనంతరం పాకిస్తాన్ 43 ఓవర్లలో 137 పరుగులకు ఆలౌట్ అయింది. పూజా వస్త్రాకర్‌కు ప్లేయర్ ఆఫ్ ది మ్యాచ్ అవార్డు దక్కింది.