టీమ్‌ఇండియాలో మరో క్రికెటర్‌ తన బ్యాచిలర్ లైఫ్‌కు గుడ్‌బై చెప్పేస్తున్నాడు. కోరుకున్న ప్రియురాలితో సరికొత్త జీవితం ఆరంభించబోతున్నాడు. తన పుట్టినరోజునే ప్రేయసితో నిశ్చితార్థం చేసుకున్నాడు. ఈ ఆనందకర విషయాన్ని అభిమానులతో పంచుకున్నాడు.
అరంగేట్రం సిరీసులోనే ఐదు వికెట్ల ఘనతలు అందుకున్న ఆటగాడు అక్షర్‌ పటేల్‌. గురువారం అతడి 28వ పుట్టినరోజు. ఆ రోజును అతడు మరింత ప్రత్యేకంగా మార్చుకున్నాడు. ఎన్నాళ్ల నుంచో ప్రేమిస్తున్న మెహాతో నిశ్చితార్థం చేసుకున్నాడు.
ఈ వేడుకకు అక్షర్‌ పటేల్‌ సన్నిహితులు, బంధువులు, గుజరాత్‌ క్రికెటర్లు హాజరయ్యారు. ఫంక్షన్‌ ముగిశాక 'ఈ రోజు నా జీవితానికి సరికొత్త ఆరంభం. ఎప్పటికే కలిసే ఉంటాం. బతికున్నంత వరకు ప్రేమిస్తూనే ఉంటా' అని సోషల్‌ మీడియాలో కొన్ని చిత్రాలను పోస్ట్‌ చేశాడు.
భారత్‌ తరఫున అక్షర్‌ పటేల్‌ అన్ని ఫార్మాట్లలో ఆడుతున్నాడు. 2014లో వన్డేల్లో, 2015లో టీ20ల్లో అరంగేట్రం చేశాడు. సీనియర్లు ఉండటం, జట్టు కూర్పు వల్ల పరిమిత ఓవర్ల క్రికెట్లో ఎక్కువ అవకాశాలు రాలేదు. 2021లో టెస్టుల్లో అరంగేట్రం చేసి సత్తా చాటాడు. ఆడింది ఐదు టెస్టులే కానీ ఎవరికీ సాధ్యంకాని రీతిలో ఐదుసార్లు ఐదు వికెట్ల ఘనత అందుకున్నాడు. ఒక్కోసారి నాలుగు, పది వికెట్ల ఘనత సాధించాడు. ఇప్పటి వరకు 36 వికెట్లు తీశాడు.
ఇక 38 వన్డేల్లో 45, 15 టీ20ల్లో 13 వికెట్లు పడగొట్టాడు. బ్యాటుతోనూ అక్షర్‌ పరుగులు రాబట్టగలడు. ఇండియన్‌ ప్రీమియర్‌ లీగులో దిల్లీ క్యాపిటల్స్‌ రూ.9 కోట్లతో అతడిని రీటెయిన్‌ చేసుకుంది.
Also Read: IND vs SA 2nd ODI: టీమ్‌ఇండియాలో మార్పులకు రాహుల్‌ సై..! లేదంటే ఓటమి బాటే!!
Also Read: IND vs WI Reschedule: విండీస్‌ షెడ్యూల్లో మార్పు! అహ్మదాబాద్‌, కోల్‌కతాల్లోనే మ్యాచులు!
Also Read: Virat Kohli Record: సాహో.. కోహ్లీ! ఇక ఈ రికార్డును బద్దలు కొట్టడం ఇప్పట్లో సాధ్యం కానట్టే!