అనుష్క శర్మ, విరాట్ కోహ్లీ అత్యంత అన్యోన్యమైన సెలబ్రిటీ జంటలలో ముందు వరుసలో ఉంటారు. అయితే వారు తమ లగ్జరీ కార్లను వదిలేసి ప్రేమ జంట తరహాలో స్కూటీపై తిరుగుతున్న వీడియో ఇప్పుడు ఇంటర్నెట్‌లో వైరల్ అవుతుంది. అయితే వీరు నలుపు రంగు హెల్మెట్ ధరించి జనం గుర్తు పట్టకుండా ఎన్ని జాగ్రత్తలు తీసుకున్నా కొందరు గుర్తుపట్టి రోడ్డుపై వెళ్తుండగా వీడియోలు తీశారు.
ఈ వీడియోలో అనుష్క శర్మ పూర్తిగా నలుపు రంగు దుస్తులు ధరించగా, విరాట్ ముదురు ఆకుపచ్చ రంగు చొక్కా, నలుపు ప్యాంటుతో కనిపించాడు. ఈ వీడియోలో విరాట్ స్కూటర్ నడుపుతుండగా, అనుష్క అతని నడుము చుట్టూ చేయి వేసి కూర్చుంది.
అనుష్క శర్మ, విరాట్ కోహ్లీ ఒకరిపై ఒకరు ప్రేమను చూపించుకుంటున్న ఈ వీడియోపై నెటిజన్లు ప్రేమను కురిపించారు. వీరిని అందమైన జంట అంటూ, సింపుల్‌గా ఉన్నారంటూ, క్యూట్‌గా ఉన్నారంటూ రకరకాల కాంప్లిమెంట్స్‌తో కామెంట్ బాక్స్‌ను నింపేశారు.
విరాట్ కోహ్లీ ఆసియా కప్‌కు సిద్ధం అవుతుండగా మరోవైపు అనుష్క శర్మ కూడా తన ప్రాజెక్టులతో రెడీ అవుతోంది. కుమార్తె వామిక పుట్టిన అనంతరం అనుష్క శర్మ కెరీర్‌లో కొంచెం గ్యాప్ తీసుకుంది. తను ఇప్పుడు ‘చక్దా ఎక్స్‌ప్రెస్’ షూటింగ్‌లో ఉంది. ఇందులో ఆమె భారత మాజీ క్రికెటర్ ఝులన్ గోస్వామి పాత్రను పోషించనుంది.
అనుష్క తన కెరీర్‌లో మొదటిసారిగా క్రికెటర్ పాత్రలో కనిపించనుంది. 2022 ప్రారంభంలోనే ఒక ప్రత్యేక ప్రకటన వీడియోతో ఈ చిత్రాన్ని ప్రకటించింది. అనుష్క చివరిసారిగా షారుక్ ఖాన్ సరసన ‘జీరో’ సినిమాలో కనిపించింది. అప్పటినుంచి షారుక్ కూడా ఇంకో సినిమా చేయలేదు.