Under19 Mens Cricket World Cup 2024 to be held in South Africa: శ్రీలంక క్రికెట్ బోర్డుకు వరుస షాకులు తగులుతున్నాయి. ఇదివరకే వన్డే వరల్డ్ కప్ 2023 (ODI World Cup 2023)లో దారుణ ప్రదర్శనతో మాజీ ఛాంపియన్ శ్రీలంక టీమ్ పై విమర్శలు వెల్లువెత్తాయి. ఈ క్రమంలో ఆ దేశ క్రికెట్ బోర్డు విషయంలో ప్రభుత్వం జోక్యం చేసుకోవడంతో ఇంటర్నేషనల్ క్రికెట్ కౌన్సిల్ సీరియస్ అయింది. ఏకంగా లంక క్రికెట్ బోర్డుపై సస్పెన్షన్ వేటు వేస్తూ ఐసీసీ కీలక నిర్ణయం తీసుకోవడం తెలిసిందే. తాజాగా లంక బోర్డు (Sri Lanka Cricket Board)కు మరో బిగ్ షాక్ ఇచ్చింది ఐసీసీ.
2024లో నిర్వహించనున్న ఐసీసీ మెన్స్ అండర్ 19 వరల్డ్ కప్ (Under19 Mens World Cup 2024) హోస్టింగ్ బాధ్యతల నుంచి లంకను తప్పించింది. ఐసీసీ బోర్డు నేడు సమావేశంలో ఈ నిర్ణయం తీసుకుంది. వచ్చే ఏడాది నిర్వహించాల్సిన పురుషుల అండర్ 19 వరల్డ్ కప్ నిర్వహణ బాధ్యతల నుంచి లంకను తప్పించారు. ఆ అవకాశాన్ని దక్షిణాఫ్రికాకు కల్పిస్తూ ఐసీసీ బోర్డు తాజాగా నిర్ణయం తీసుకుంది. దాంతో వచ్చే ఏడాది జనవరిలో జరగనున్న అండర్ 19 వరల్డ్ కప్ ను దక్షిణాఫ్రికా నిర్వహించనుందని బోర్డు స్పష్టం చేసింది.
ద్వైపాక్షిక సిరీస్ లతో పాటు, ICC ఈవెంట్‌లలో శ్రీలంక టీమ్ ఆడేందుకు అనుమతి ఇచ్చారు. మంగళవారం జరిగిన ఐసీసీ బోర్డు సమావేశం తర్వాత ఈ విషయాన్ని వెల్లడించారు. కానీ, లంక క్రికెట్ కి నిధులు ఐసీసీ తన ఆధీనంలోకి తీసుకుంది. ఈ కారణంగా వచ్చే జనవరిలో జరగాల్సిన మెన్స్ అండర్ 19 ప్రపంచ కప్ నిర్వహణ నుంచి లంకను తప్పించి దక్షిణాఫ్రికాకు బాధ్యతల్ని అప్పగించింది. ఈ ఏడాది మహిళల U19 T20 ప్రపంచ కప్ నిర్వహించిన దక్షిణాఫ్రికా పురుషుల అండర్ 19 అవకాశాన్ని దక్కించుకుంది.
వచ్చే జనవరిలో జరగనున్న U19 ప్రపంచ కప్ 15వ ఎడిషన్. చివరగా 2022లో వెస్టిండీస్‌లో జరిగిన మెగా టోర్నీలో భారత్ విజేతగా నిలిచింది. రికార్డు స్థాయిలో ఐదవసారి టైటిల్‌ను టీమిండియా సొంతం చేసుకుంది. 2024 జనవరిలో ప్రారంభమయ్యే ఈ మెగా టోర్నీలో 41 మ్యాచ్‌లు జరగనుండగా, ఫిబ్రవరిలో ఫైనల్ జరగనుంది.
ఈసారి గ్రూప్ స్టేజీ తరువాత సూపర్ సిక్స్ విధానాన్ని తీసుకొస్తుంది ఐసీసీ. సూపర్ సిక్స్ మ్యాచ్ ఫలితాలతో సెమీ ఫైనల్ టీమ్స్ ను నిర్ణయిస్తారు. అండర్ 19 వరల్డ్ కప్ లో పాల్గొనే 16 జట్లను 4 గ్రూపులుగా విభజించారు. గ్రూప్ Aలో డిఫెండింగ్ ఛాంపియన్ భారత్‌తో పాటు బంగ్లాదేశ్, ఐర్లాండ్, అమెరికాలు ఉన్నాయి. గ్రూప్ Bలో ఇంగ్లండ్, దక్షిణాఫ్రికా, వెస్టిండీస్, స్కాట్లాండ్ ఉన్నాయి. గ్రూప్ Cలో ఆస్ట్రేలియా, శ్రీలంక, జింబాబ్వే, నమీబియా ఉన్నాయి. ఇక గ్రూప్ Dలో ఆఫ్ఘనిస్తాన్, పాకిస్తాన్, న్యూజిలాండ్, నేపాల్ టీమ్స్ సూపర్ సిక్స్ కోసం పోటీ పడనున్నాయి.