న్యూజిలాండ్‌తో జరిగిన మూడు వన్డేల సిరీస్‌ను బంగ్లాదేశ్‌ 2-1 తేడాతో కోల్పోయింది. కానీ, నేపియర్‌ వేదికగా జరిగిన నామమాత్రపు మూడో వన్డేలో బంగ్లా సంచలన విజయం నమోదు చేసింది. దాదాపు 33 ఏళ్ల తర్వాత న్యూజిలాండ్‌ గడ్డపై బంగ్లాదేశ్‌ వన్డేలో తొలి విజయం సాధించింది. న్యూజిలాండ్‌పై ఇప్పటివరకూ 18 వన్డేలు ఆడిన బంగ్లాదేశ్‌.. అన్నింటిలోనూ పరాజయం పాలైంది. కానీ ఈ మ్యాచ్‌లో ఘన విజయం సాధించి చరిత్ర సృష్టించింది. మూడో వన్డేల సిరీస్‌ను 2-1తో కోల్పోయినా ఈ విజయం బంగ్లాకు ఉపశమనం కలిగించింది. మూడో వన్డేలో బంగ్లా పేసర్లు చెలరేగి పది వికెట్లను తమ ఖాతాలో వేసుకున్నారు. దీంతో క్లీన్‌ స్వీప్‌ నుంచి బంగ్లాదేశ్‌ బయటపడింది.
మూడో వన్డేలోనూ జోరును కొనసాగిస్తూ వైట్‌వాష్‌ చేయాలని భావించిన న్యూజిలాండ్‌ ఆశలపై పర్యాటక బంగ్లా జట్టు నీళ్లు చల్లింది.
ఈ మ్యాచ్‌లో టాస్‌ గెలిచిన బంగ్లాదేశ్‌ తొలుత బౌలింగ్‌ ఎంచుకుంది. తొలుత బౌలింగ్‌ చేసిన బంగ్లాదేశ్‌ ఆతిథ్య న్యూజిలాండ్‌ను 31.4 ఓవర్లలో కేవలం 98 పరుగులకే ఆలౌట్‌ చేసింది. ఆరంభం నుంచే బంగ్లా బౌలర్లు కివీస్ బ్యాటర్లను ముప్పుతిప్పలు పెట్టారు. పేసర్లు షోరిఫుల్‌ ఇస్లాం మూడు, తాంజిం హసన్‌ సకీబ్‌ మూడు, సౌమ్యా సర్కార్‌ మూడు వికెట్లతో చెలరేగగా.. ముస్తాఫిజుర్‌ ఒక వికెట్ పడగొట్టాడు. బంగ్లా ఫాస్ట్‌బౌలర్ల ధాటికి కివీస్ బ్యాటింగ్‌ ఆర్డర్‌ కుదేలైంది. ఓపెనర్‌ విల్‌ యంగ్‌ 26 పరుగులతో కివీస్ ఇన్నింగ్స్‌లో టాప్‌ స్కోరర్‌గా నిలవగా.. మరో ఓపెనర్‌, వరల్డ్‌కప్‌ సెంచరీల వీరుడు రచిన్‌ రవీంద్ర ఎనిమిది పరుగులకే పరిమితం అయ్యాడు. రచిన్‌ రవీంద్ర (8), హెన్రీ నికోల్స్‌ (1)లను స్వల్వ స్కోరుకే ఔట్‌ చేశారు. ఆ తర్వాత లాథమ్‌ (21), విల్‌ యంగ్‌ (26), చాప్‌మన్‌ (2)లు సైతం స్వల్ప స్కోరుకే వెనుదిరిగారు. కెప్టెన్ టామ్‌ లాథం 21 పరుగులతో పర్వాలేదనిపించగా.. మిగిలిన వాళ్లంతా పూర్తిగా విఫలమయ్యారు. బంగ్లా బౌలర్లు విజృంభించడంతో కివీస్ బ్యాటర్లు వచ్చినవారు వచ్చినట్లే పెవిలియన్‌ చేరారు. దీంతో 31.4 ఓవర్లలో కేవలం 98 పరుగులు మాత్రమే చేసి న్యూజిలాండ్‌ ఆలౌట్‌ అయింది.
అనంతరం లక్ష్య ఛేదనలో బంగ్లా కేవలం ఒక్క వికెట్‌ను మాత్రమే కోల్పోయి 15.1 ఓవర్లలో 99 పరుగులు చేసింది. కెప్టెన్ నజ్ముల్ షాంటో 51 పరుగులతో అజేయంగా నిలిచాడు. అనముల్ హక్ 37 పరుగులు చేశాడు. బంగ్లాదేశ్‌ ఒక్క వికెట్ మాత్రమే కోల్పోయి 15.1 ఓవర్లలో లక్ష్యాన్ని ఛేదించింది. కివీస్ బౌలర్లలో విలియం రోర్క్‌కు ఒక వికెట్ దక్కింది. న్యూజిలాండ్‌ గడ్డపై బంగ్లాదేశ్‌కు ఇదే తొల వన్డే విజయం. తొలి రెండు వన్డేల్లో గెలిచిన న్యూజిలాండ్‌ 2-1తో సిరీస్‌ను సొంతం చేసుకుంది. ఇరు జట్ల మధ్య 3 మ్యాచ్‌ల టీ20 సిరీస్‌ డిసెంబర్‌ 27 నుంచి ప్రారంభం కానుంది.
మూడు వన్డే, మూడు టీ20 మ్యాచ్‌ల సిరీస్‌ ఆడేందుకు బంగ్లాదేశ్‌ న్యూజిలాండ్‌ పర్యటనకు వెళ్లింది. ఈ క్రమంలో ఇరు జట్ల మధ్య డిసెంబరు 17 నుంచి వన్డే సిరీస్‌ మొదలైంది. తొలి మ్యాచ్‌కు వర్షం ఆటంకం కలిగించిన నేపథ్యంలో డక్‌వర్త్‌ లూయీస్‌ పద్ధతి ప్రకారం.. కివీస్ బంగ్లాను 44 పరుగుల తేడాతో ఓడించింది. ఇక రెండో వన్డేలోనూ ఏడు వికెట్ల తేడాతో ఓడించి సిరీస్‌ను కైవసం చేసుకుంది. మూడో వన్డేలో బంగ్లాదేశ్‌ ఘన విజయం సాధించింది. ఈ చారిత్రాత్మక విజయంతో బంగ్లా ఆటగాళ్ల సంబరాలు అంబరాన్నంటాయి.