YSR Telangana Party : షర్మిలకు తప్పిన 'పేరు' టెన్షన్ .. వైఎస్ఆర్‌టీపీకి 'ఈసీ' గ్రీన్ సిగ్నల్ !

వైఎస్ఆర్ తెలంగాణ పార్టీ పేరుకు ఈసీ అనుమతి ఇచ్చింది. ఇతరుల నుంచి వచ్చిన అభ్యంతరాలను ఈసీ తోసి పుచ్చింది.

వైఎస్ఆర్ తెలంగాణ పార్టీ ( YSR Telangana Party ) పేరుపై ఏర్పడిన సస్పెన్స్‌కు తెర పడింది. వైఎస్ షర్మిలకు ( YS Sharmila ) ఊరట లభించింది. వైఎస్ఆర్‌టీపీ పేరుపై వ్యక్తమయిన అభ్యంతరాలను ఈసీ ( Election Commision ) తోసి పుచ్చింది. దీంతో పేరు మార్చాల్సిన పరిస్థితుల నుంచి షర్మిల బయటపడ్డారు. తెలంగాణలో రాజకీయం చేయాలని నిర్ణయించుకున్న షర్మిల ( Sharmila ) వైఎస్ఆర్ తెలంగాణ పార్టీని ప్రకటించారు. ఈసీకి దరఖాస్తు చేశారు. ఈసీ నిబంధనల ప్రకారం ఎవరికైనా అభ్యంతరాలు ఉంటే చెప్పాలని పేపర్ ప్రకటన ఇచ్చింది. ఈసీ ప్రకటనతో కడప జిల్లాకు చెందిన కొంత మంది గతంలో అన్న వైఎస్ఆర్ పార్టీని ( Anna YSR Party ) ప్రారంభించారు. 

వైఎస్ఆర్ పేరును ఉపయోగించుకునే హక్కు తమకే ఉందని వారు వాదించారు. వైఎస్ఆర్ పేరును ఉపయోగించుకుటున్నారని తమ పార్టీకి అది ఎఫెక్ట్ అవుతుందని  గతంలో ఢిల్లీ హైకోర్టులో  వైఎస్ఆర్‌సీపీపై కేసు వేశారు.ఈ కారణంగా వైఎస్ఆర్ సీపీ నేతలు తమ పార్టీని యువజన శ్రామిక రైతు కాంగ్రెస్ పార్టీగా చెబుతున్నారు. లెటర్ ప్యాడ్లలోనూ మార్పులు చేశారు. కొత్తగా వైఎస్ఆర్ పేరుతో షర్మిల పార్టీ ప్రారంభించడంతో వారు అభ్యంతరాలు వ్యక్తం చేశారు. 

ఈ కారణంగా వేరే పేరును సూచించాలంటూ ఈసీ షర్మిల పార్టీ ప్రతినిధులకు మాచారం ఇచ్చారు. అయితే చివరికి అన్ని అభ్యంతరాలను షర్మిల పార్టీ ప్రతినిధులను పరిష్కరించడంతో పార్టీ పేరును ఖరారు చేస్తూ ఈసీ నిర్ణయం తీసుకుంది. ఆమోదముద్ర వేసినట్లుగా సమాచారం పంపింది. దీంతో వైఎస్ షర్మిలకు పేరు టెన్షన్ తప్పినట్లయింది. షర్మిల మళ్ళీ పాదయాత్రను మొదలుపెట్టేందుకు సిద్దమవుతున్నారు.  మార్చ్ 5 నుంచి పాదయాత్ర మొదలుపెట్టే అవకాశం ఉంది. గతంలో నల్లగొండ జిల్లాలో పాదయాత్ర ఆగిపోయింది. 

షర్మిల ఏపీలోనూ పార్టీ పెడతారన్న ప్రచారం జరిగింది. అయితే అలాంటిదేమీ లేదని తన రాజకీయ జీవితం తెలంగాణతోనే ముడిపడి ఉందని ఆమె ప్రకటించారు. తెలంగాణలో యాక్టివ్‌గా రాజకీయ కార్యక్రమాలు చేపడుతున్నారు.  పాదయాత్ర ప్రారంభించిన దగ్గర్నుంచి ఇక జనంలోనే ఉండాలని నిర్ణయించుకున్నారు.