Indian 2 Audio Launch: 'ఇండియన్ 2' ఆడియో లాంచ్‌లో హైలైట్స్ - శంకర్ కోసం ఆ కథ పక్కన పెట్టేసిన కమల్
యూనివర్సల్ స్టార్ కమల్ హాసన్, లెజెండరీ ఫిల్మ్ మేకర్ శంకర్ కలయికలో లైకా ప్రొడక్షన్స్, రెడ్ జెయింట్ బ్యానర్స్ మీద తెరకెక్కిన సినిమా 'ఇండియన్ 2'. దీనిని తెలుగులో 'భారతీయుడు 2'గా ప్రేక్షకుల ముందుకు తీసుకు వస్తున్నారు. జూలై 12న ప్రపంచ వ్యాప్తంగా తెలుగు, తమిళ, హిందీ భాషల్లో భారీ ఎత్తున విడుదల కానుంది. 'భారతీయుడు 2' తెలుగు వెర్షన్ (తెలంగాణ ప్లస్ ఆంధ్ర) థియేట్రికల్ హక్కులను ఏషియ‌న్ సురేష్ ఎంట‌ర్‌టైన్మెంట్స్ ఎల్ఎల్‌పి, సీడెడ్ హక్కులను శ్రీల‌క్ష్మి మూవీస్ సంస్థ‌లు సొంతం చేసుకున్నాయి. శనివారం (జూన్ 1న) చెన్నైలో ఘనంగా ఆడియో వేడుక నిర్వ‌హించారు. హీరో శింబు, దర్శకులు లోకేష్ కనకరాజ్, నెల్సన్, నిర్మాత ఏ ఎం రత్నం, ఏసియన్ సినిమాస్ సునీల్ నారంగ్, భరత్ నారంగ్ ముఖ్య అతిథులుగా హాజరయ్యారు. అందులో హైలైట్స్ చూడండి.
Download ABP Live App and Watch All Latest Videos
View In Appకమల్ హాసన్ మాట్లాడుతూ... ''నేను 28 ఏళ్ల క్రితం శివాజీ గణేశన్ గారితో ఓ సినిమా చేయాలి. ఆ సమయంలోనే శంకర్ 'ఇండియన్' కథతో వచ్చారు. ఆ రెండు కథలు మధ్య కొంచెం దగ్గర పోలికలు ఉన్నాయి. ఆ విషయాన్ని శివాజీ గణేశన్ గారితో చెప్పా. 'శంకర్‌తో సినిమా చెయ్యండి. ఆల్రెడీ ఆయనో సినిమా తీశారు. మనం ఎన్నో సినిమాలు చేశాం’ అన్నారు. ఆయన మాట, నమ్మకంతో 'ఇండియన్' చేశా. మా మధ్య అప్పుడు రెమ్యూనరేషన్స్ డిస్కషన్ జరగలేదు. ఏఎం రత్నం గారు చిత్రాన్ని అద్భుతంగా నిర్మించారు. అప్పుడే సీక్వెల్ గురించి అడిగా. శంకర్ కథ రెడీగా లేదన్నారు. 28 ఏళ్ల తర్వాత మేం మళ్లీ 'ఇండియన్ 2' చేశాం. ఈ సినిమా ఇక్కడి వరకు వచ్చిందంటే లైకా ప్రొడక్షన్స్ అధినేత సుభాస్కరన్ గారే కారణం. ఎన్ని సవాళ్లు ఎదురైనా సరే మాకు అండగా నిలిచారు. అనిరుధ్ అద్భుతమైన పాటలు ఇచ్చారు. ఆయన సంగీతంలో ఒక ఎనర్జీ ఉంటుంది. 'ఇండియన్'కు మేకప్ ఆర్టిస్టుగా పని చేసిన హాలీవుడ్ సాంకేతిక నిపుణులతో మళ్లీ పని చేయడం హ్యాపీగా ఉంది'' అని చెప్పారు.
దర్శకుడు శంకర్ మాట్లాడుతూ... ''ఇవాళ ఫైనల్ మిక్సింగ్ విన్నా. అనిరుధ్ సంగీతంతో సరికొత్త ఎనర్జీ వచ్చింది. ప్రేక్షకులకూ సినిమా చూశాక అదే ఎనర్జీ వస్తుంది. కమల్ గారు అడిగినప్పుడు నా దగ్గర కథ లేదు. ఆ తర్వాత చాలా ఏళ్లకు వార్తా పత్రికల్లో లంచం వల్ల జరిగే ఘోరాలు, అన్యాయాలు చూసి కథ రాద్దామని అనుకున్నా. కానీ, మేం వేర్వేరు సినిమాలతో బిజీగా ఉండటంతో కుదరలేదు. '2.ఓ' తర్వాత ఈ కథ రాశా. అలా ఈ సినిమా మొదలైంది. షూటింగ్ ఫస్ట్ డే 'ఇండియన్ 2' గెటప్‌లో కమల్ గారిని చూసి మేమంతా షాకయ్యాం. నాకు 28 ఏళ్ల క్రితం ఎలా అనిపించిందో... ఆ రోజు సెట్ లో కూడా సేమ్ ఫీలింగ్ కలిగింది. 'ఇండియన్' తాత మంచివాళ్లకు మంచోడు... చెడ్డవాళ్లకు చెడ్డోడు'' అని అన్నారు.
యువ హీరో శింబు మాట్లాడుతూ... ''నాకు 'ఇండియన్' చాలా ఇష్టం. ఆ మాట శంకర్ గారితో ఎన్నోసార్లు చెప్పా. నేను ఆ చిత్రాన్ని ఎన్నిసార్లు చూశానో లెక్కలేదు. ఒక కమర్షియల్ సినిమా ఎలా ఉండాలనే దానికి అదొక బెస్ట్ ఎగ్జాంపుల్. 'ఇండియన్ 2' ప్రకటన చూసి అభిమానిగా ఎగ్జైటయ్యా. కమల్ గారు నాకు గురువు లాంటి వ్యక్తి. ఆయనతో 'థగ్స్ లైఫ్'లో నటిస్తున్నా. 'ఇండియన్' టైటిల్‌కు తగ్గ నటుడు కేవలం కమల్ హాసన్ గారే. ఈ సినిమా భారీ సక్సెస్ సాధించాలి'' అని అన్నారు.
సంగీత దర్శకుడు అనిరుధ్ రవిచందర్ మాట్లాడుతూ... ''నాకు ఈ 'ఇండియన్ 2' చేసే అవకాశం ఇచ్చిన లైకా ప్రొడక్షన్స్ అధినేత సుభాస్కరన్ గారికి ముందుగా థాంక్స్. నా అభిమాన దర్శకుడు శంకర్ గారు. నేను సంగీతం అందించిన తొలి సినిమా '3' అయితే... ఈ సినిమా నాకు 33వది. కమల్ హాసన్ గారితో 'విక్రమ్' తర్వాత మళ్ళీ 'ఇండియన్ 2' చేశా. 'ఇండియన్' సినిమాకు ఏఆర్ రెహమాన్ సార్ అద్భుతమైన సంగీతాన్ని ఇచ్చారు. ఈ సినిమాకు శంకర్ గారు నా మీద పెట్టిన నమ్మకాన్ని నిలబెట్టుకున్నాననే అనుకుంటున్నా. వచ్చే నెల 12న ఇండియన్ తాత బాక్సాఫీస్ రికార్డులు బద్దలు కొడుతున్నాడు'' అని చెప్పారు.
హీరోయిన్ కాజల్ అగర్వాల్ మాట్లాడుతూ... ''కమల్ హాసన్ గారు, శంకర్ గారితో 'ఇండియన్ 2' చేయడం కల నిజమైనట్టు ఉంది. ఇదొక బెస్ట్ ఎక్స్‌పీరియెన్స్. కమల్ హాసన్ గారు యాక్టింగ్ ఇన్‌స్టిట్యూషన్'' అని చెప్పారు. మరొక హీరోయిన్ రకుల్ ప్రీత్ సింగ్ మాట్లాడుతూ... ''కమల్ గారి సినిమాలు చూస్తూ పెరిగా. ఆయన చిత్రంలో నటించడం హ్యాపీగా ఉంది. ఆయన సినిమా కోసం ఎంతో కష్టపడ్డారు'' అని చెప్పారు.
'ఇండియన్ 2' ఆడియో ఆవిష్కరణ కార్యక్రమంలో కమల్ కుమార్తె, స్టార్ హీరోయిన్ శృతి హాసన్, బాలీవుడ్ బ్యూటీ మౌనీ రాయ్, దర్శకుడు శంకర్ కూతరు అదితీ శంకర్, కొడుకు అర్జిత్ శంకర్ లైవ్ పర్ఫామెన్స్‌ ఇచ్చారు.
'ఇండియన్ 2' ఆడియో వేడుకలో నిర్మాత, లైకా ప్రొడక్షన్స్ అధినేత సుభాస్కరన్ తో ముచ్చటిస్తున్న కమల్ హాసన్
సంగీత దర్శకుడు అనిరుధ్ రవిచందర్, లైకా ప్రొడక్షన్స్ అధినేత సుభాస్కరన్, ఆయన సతీమణి జ్ఞానాంబిక ముచ్చట్లు