ఎవరైనా ప్రియురాలి బైకు వెనుక లేదా కారు పక్కన కూర్చుబెట్టుకుని లాంగ్ డ్రైవ్‌కు వెళ్తారు. కానీ, ఇతడు మాత్రం ఆ టైపు కాదు.. ప్రియురాలిని కారు టాప్కు కట్టేసి.. సంకెళ్లు వేసి మరీ షికారుకు తీసుకెళ్లాడు. రోడ్డుపై వెళ్లేవారు ఆమెను అలా చూసి నోరెళ్లబెట్టారు. వార్నీ.. ఎందుకలా చేస్తున్నావని ప్రశ్నిస్తే.. ఇది కూడా ఒకరకమైన ప్రేమ పరీక్షే అని సమాధానం ఇచ్చాడు.
రష్యాకు చెందిన ఇన్‌ఫ్లుయెన్సర్ సెర్గే కొసెన్కో తన ప్రియురాలితో కలిసి వీడియోలు చేస్తూ బాగా పాపులర్ అయ్యాడు. ఇన్‌స్టాగ్రామ్‌లు 5.1 మిలియన్‌కు పైగా ఫాలోవర్లను సంపాదించుకున్నాడు. అతడు ఏం చేసినా సరే చాలా కొత్తగా ఉంటుంది. అయితే, ఈ సారి చేసిన పని మాత్రం చాలా పిచ్చిగా ఉండటంతో నెటిజనులకు బాగా నచ్చేసింది. ప్రియురాలికి తన మీద ఎంత నమ్మకం ఉందో పరీక్షిస్తానంటూ.. ఆమెను కారు టాపుకు కట్టేశాడు. ఆ తర్వాత ఆమె చేతికి, తన చేతికి సంకెళ్లు వేసుకున్నాడు.
అంతటితో ఆగకుండా.. ఒంటిచేత్తో కారు స్టీరింగ్ అందుకుని మాస్కోలోని బెంట్లే వీధుల్లో షికారు చేశాడు. చిత్రం ఏమిటంటే.. కారు ముందుకు కదులుతున్నా ఆమె ఏ మాత్రం భయపడలేదు. దాన్ని ఆమె ఓ సరికొత్త అనుభూతిలా ఫీలైంది. అయితే, రోడ్డు మీద వెళ్లే జనాలకు మాత్రం.. వారు కాసేపు వింత జీవుల్లా కనిపించారు. రోడ్డుపై పిచ్చి వేషాలు ఏమిటనట్లుగా వారిని చూశారు. వారు అలాంటి చిందులేస్తుంటే పోలీసులు ఊరుకుంటారా? వెంటనే ఆ జంటను అదుపులోకి తీసుకుని రూ.760 జరిమానా విధించారు. అయితే, వారు చాలా ప్రమాదకరమైన స్టంట్ చేశారని, ఆ జరిమానా సరిపోదని కొంతమంది నెటిజనులు అంటున్నారు. దీంతో మాస్కో స్టేట్ ట్రాఫిక్ ఇన్స్‌పెక్టర్ ఓ ప్రకటన విడుదల చేశారు.
‘‘ఓ యువకుడు కారు టాపుకు ఓ అమ్మాయిని కట్టేసిన డ్రైవింగ్ చేస్తున్న వీడియోపై విచారణ జరుపుతున్నాం. పూర్తి వివరాలు తెలిసిన తర్వాత తగిన చర్యలు తీసుకుంటాం’’ అని తెలిపారు. ఈ నేపథ్యంలో అతడిపై క్రిమినల్ కేసు నమోదు చేసే అవకాశాలున్నట్లు తెలుస్తోంది. ఆమెను అలా కారు కట్టేసి డ్రైవింగ్ చేయడమంటే.. హత్యాయత్నంతో సమానమని ఓ న్యాయవాది తెలిపారు. అతడికి జరిమానాతోపాటు జైలు శిక్ష విధించే అవకాశాలున్నాయన్నారు.
నెటిజనులు కూడా కొసెన్కోపై ఆగ్రహం వ్యక్తం చేశారు. ఇది చిన్నపిల్లల ఆట కాదని, ఆమె ప్రాణాలకు ఏమైనా జరిగితే ఎవరిది బాధ్యత అని ప్రశ్నిస్తున్నారు. ఇలాంటి స్టంట్లు పిల్లలు, యువకులు చూస్తే అనుకరించేందుకు ప్రయత్నిస్తారని మరికొందరు అంటున్నారు. ఈ ఘటనపై స్థానిక పత్రికలు సైతం కొసెన్కోపై విమర్శలు గుప్పించాయి. దీంతో అతడు అందరికీ క్షమపణలు చెప్పాడు. రూ.759 జరిమానా కట్టినందుకు సిగ్గుగా ఉందన్నాడు. మీ ప్రియురాలిపై కోపం ఉన్నా లేదా ఆమె ప్రేమను పరీక్షించాలన్నా.. ఇలాంటి మార్గాలను మాత్రం ఎంచుకోకండి. తర్వాత మీరే చిక్కుల్లో పడతారు.
వీడియో: