Tarun Ghulati Meets Pawan Kalyan: హైదరాబాద్: టాలీవుడ్ పవర్ స్టార్, జనసేన అధినేత పవన్ కళ్యాణ్ (Pawan Kalyan) క్రేజ్ గురించి ప్రత్యేకంగా చెప్పనవసరం లేదు. ప్రత్యక్షంగా ఆయన రాజకీయాల్లో సంచలనాలు చేయకపోయినా, పరోక్షంగా ఆయన ప్రభావం మాత్రం గట్టిగానే ఉంటుందని తెలిసిందే. ఈ క్రమంలో లండర్ మేయర్ ఎన్నికల్లో తనకు మద్దతు తెలపాలని పవన్ కళ్యాణ్ ను పారిశ్రామికవేత్త తరుణ్ గులాటీ (Tarun Gulati) కోరారు.
లండన్ మేయర్ ఎన్నికలలో భారత సంతతికి చెందిన బహుముఖ ప్రజ్ఞాశాలి, పారిశ్రామికవేత్త తరుణ్ గులాటీ పోటీ చేస్తున్నారు. ఆయన బుధవారం హైదరాబాద్ లో జనసేన పార్టీ అధ్యక్షులు పవన్ కళ్యాణ్ ని కలిశారు. స్వతంత్ర అభ్యర్ధిగా పోటీ చేస్తున్న గులాటీ లండన్ మేయర్ ఎన్నికల్లో తనకు మద్దతు పలకాల్సిందిగా జనసేనాని పవన్ కళ్యాణ్ ని కోరారు. తాను పోటీ చేస్తున్న ప్రాంతంలో పవన్ కళ్యాణ్ అభిమానులు, జన సైనికులు భారీ సంఖ్యలులో ఉన్నారని ఈ సందర్భంగా ఆయన గుర్తుచేశారు. తరుణ్ గులాటీ అభ్యర్థనను అప్పటికప్పుడూ పవన్ కళ్యాణ్ స్వాగతించారు.
భారత సంతతికి చెందిన తరుణ్ గులాటి లండన్ మేయర్ ఎన్నికల్లో పోటీ చేయడం సంతోషదాయకం అన్నారు. తన అభిమానులు, జనసేన శ్రేణులతోపాటు తెలుగువారు, భారతీయులంతా ఆయన విజయానికి కృషి చేయాలని ఈ సందర్భంగా పవన్ కళ్యాణ్ కోరారు. తనను కలసిన గులాటీకి పవన్ ఆల్ ది బెస్ట్ చెప్పారు.
మే 2, 2024న లండన్ మేయర్ పదవికి ఎన్నికలు జరగనున్నాయి. బ్రిటన్‌లోని ప్రముఖ రాజకీయ పార్టీల అభ్యర్థులు తమ విజయం కోసం కసరత్తు మొదలుపెట్టేశారు. అందుకు సంబంధించి పలువురు కీలక వ్యక్తులను కలిసి తమకు ఎన్నికల్లో మద్దతు తెలపాలని కోరుతున్నారు. మేయర్ పదవికి 63 ఏళ్ల తరుణ్ గులాటీ పోటీ చేస్తున్నారని తెలిసిందే. తరుణ్ గులాటీ మూలాలు ఢిల్లీలో ఉన్నాయి. అయితే యూకే వెళ్లి ఆయన కుటుంబం లండన్ లో స్థిరపడింది. గులాటీ వ్యాపారవేత్త, సనాతన ధర్మాన్ని పాటిస్తారు. మెరుగైన పోలీసు వ్యవస్థ ఏర్పాటు చేయడం, పేదలకు తక్కువ ధరలో ఇళ్ల నిర్మాణం లాంటి కీలకాంశాలతో తరుణ్ గులాటీ మేయర్ రేసులో ముందంజలో ఉన్నారు. ప్రస్తుత మేయర్ సాదిక్ ఖాన్ తీసుకున్న ప్రజా వ్యతిరేక నిర్ణయాలను రద్దు చేయాలని భావిస్తున్నారు గులాటీ.