US Tornado: టోర్నడో ధాటికి అమెరికా కకావికలం.. 80 మంది వరకు మృతి

అమెరికాలో టోర్నడో ధాటికి 80 మంది వరకు ప్రాణాలు కోల్పోయారు. పలు ఇళ్లు దెబ్బతినగా, కర్మగారాలు కుప్పకూలిపోయాయి.

అమెరికాలో టోర్నడోలు బీభత్సం సృష్టిస్తున్నాయి. అమెరికాలోని ఐదు రాష్ట్రాల్లో టోర్నడో ధాటికి 80 మంది వరకు మృతి చెందారు. అమెరికా చరిత్రలో ఇదే అతి పెద్ద విపత్తని అధ్యక్షుడు జో బైెడెన్‌ అన్నారు.  

ఇది చాలా పెద్ద విపత్తు. ఈ టోర్నడో వల్ల ఎంత మంది ప్రాణాలు కోల్పోయారో, ఎంత నష్టం వాటిల్లిందో ఇంకా స్పష్టత లేదు. కానీ అన్ని సహాయక చర్యలు అందించేందుకు మేం సిద్ధంగా ఉన్నాం.                                                               - జో బైడెన్, అమెరికా అధ్యక్షుడు

కెంటకీలో..

అమెరికా ఈశాన్య రాష్ట్రం కెంటకీలో టోర్నడో విధ్వంసం సృష్టించింది. పెనుగాలులతో కూడిన ఈ తుపాను ధాటికి కెంటకీ రాష్ట్రంలోనే వేర్వేరు ఘటనల్లో సుమారు 70 మంది మరణించారని ఆ రాష్ట్ర గవర్నర్‌ ఆండీ బెషియర్‌ తెలిపారు. రాష్ట్రంలో సుమారు 200 మైళ్ల మేర పలు కౌంటీలను బలమైన టోర్నడో చుట్టేసిందని, కెంటకీ చరిత్రలోనే ఇది అత్యంత తీవ్రమైనదని పేర్కొన్నారు. మృతుల సంఖ్య 100 వరకు పెరిగే అవకాశం ఉన్నట్లు తెలిపారు.

కొవ్వొత్తుల తయారీ కర్మాగారం పైకప్పు కుప్పకూలటం వల్ల భారీగా ప్రాణ నష్టం జరిగిందని ఆయన అన్నారు. ఆ సమయంలో 110 మంది ఆ కర్మాగారంలో ఉన్నట్లు వెల్లడించారు. సహాయక చర్యల కోసం 180 మంది సిబ్బందిని రంగంలోకి దించినట్లు గవర్నల్ పేర్కొన్నారు. 

భారీగా ఆస్తి నష్టం..

కెంటకీలోని బౌలింగ్‌ గ్రీన్‌ ప్రాంతంలో అనేక అపార్ట్‌మెంట్లు భారీగా దెబ్బతిన్నాయి. కొన్ని కర్మాగారాలు కూలిపోయాయి. రహదారులపై శిథిలాలు పడి ఉండడంతో వాహనాల రాకపోకలకు అంతరాయం కలుగుతోంది. టోర్నడో ప్రభావం ఆరు రాష్ట్రాలపై పడింది. పలు ప్రాంతాల్లో భవనాలు కూలిపోయాయి. మిస్సౌరి, మిసిసిపి, ఆర్కాన్సాస్‌, టెన్నెసీలపైనా టోర్నడో విరుచుకుపడింది. విద్యుత్తు సరఫరా స్తంభించిపోయి దాదాపు 3 లక్షలమంది అంధకారంలో చిక్కుకుపోయారు. అత్యవసరమైతే తప్ప బయటకు రావద్దని పలుచోట్ల అధికారులు విజ్ఞప్తి చేశారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి