SC on Political Parties Freebies: 'ఉచిత హామీలు ఇవ్వడం సీరియస్ అంశం- కేంద్రం ఎందుకు మాట్లాడట్లేదు?'

SC on Political Parties Freebies: ఎన్నికల్లో రాజకీయ పార్టీలు ఉచిత హామీలు ఇవ్వడం తీవ్రమైన అంశమని సుప్రీం కోర్టు వ్యాఖ్యానించింది.

SC on Political Parties Freebies: ఎన్నికల వేళ రాజకీయ పార్టీలు ఉచిత హామీలు, అసంబద్ధమైన వాగ్దానాలు ఇవ్వడంపై సుప్రీం కోర్టు కీలక వ్యాఖ్యలు చేసింది. ఇది తీవ్రమైన అంశమని, దీనిపై ఓ వైఖరి తీసుకునేందుకు కేంద్రం ఎందుకు సంకోచిస్తుందని భారత ప్రధాన న్యాయమూర్తి జస్టిస్ ఎన్‌వీ రమణ నేతృత్వంలోని ధర్మాసనం వ్యాఖ్యానించింది. ఈ అంశంపై కేంద్రానికి పలు ప్రశ్నలు సంధించింది.

ఎన్నికల సమయంలో రాజకీయ పార్టీలు ఇచ్చే ఫ్రీ హామీలపై కేంద్రం ఎందుకు మౌనం వహిస్తోంది? మీరు ఎందుకు ఓ స్టాండ్ తీసుకోవట్లేదు? ఈ విషయంలో మీరు చేసేదేమీ లేదనీ, ఈసీ ఒక నిర్ణయం తీసుకోవాలని ఎందుకు చెప్పరు? అసలు కేంద్ర ప్రభుత్వం దీనిని తీవ్రమైన విషయంగా పరిగణిస్తోందా, లేదా అనేది నేను తెలుసుకోవాలనుకుంటున్నాను. మీరొక నిర్ణయం తీసుకోండి. అప్పుడు ఈ ఉచితాలు కొనసాగాలా, వద్దా అనేది మేం నిర్ణయిస్తాం. దీనిపై సవివరంగా ప్రమాణపత్రం దాఖలు చేయండి.                                                            - సీజేఐ జస్టిస్ ఎన్‌వీ రమణ

ఈ మేరకు కేంద్రం తరఫున హాజరైన అదనపు సొలిసిటర్‌ జనరల్‌ కె.ఎం.నటరాజ్‌ను సీజేఐ ధర్మాసనం ఆదేశించింది. ఎన్నికల సమయంలో ఉచిత హామీలు ఇస్తుండడానికి వ్యతిరేకంగా న్యాయవాది అశ్వినీ ఉపాధ్యాయ దాఖలు చేసిన ప్రజా ప్రయోజన వ్యాజ్యంపై ధర్మాసనం విచారణ జరిపింది. ఇలాంటి హామీలు ఇచ్చే పార్టీల చిహ్నాలను స్తంభింపజేసి, నమోదును రద్దు చేసేందుకు ఉన్న అధికారాలను ఈసీ వాడేలా చూడాలని పిటిషనర్‌ కోరారు. ఈ పిటిషన్‌పై విచారణ చేపట్టిన సుప్రీం కోర్టు దీనిపై కేంద్రం అఫిడవిట్ దాఖలు చేయాలని ఆదేశించింది.