Rahul Gandhi To BJP: 'వీలైతే ప్రేమిద్దాం డ్యూడ్'- బీజేపీకి రాహుల్ గాంధీ కౌంటర్

Rahul Gandhi To BJP: తనపై విమర్శలు చేస్తోన్న భాజపా నేతలకు రాహుల్ గాంధీ కౌంటర్ ఇచ్చారు. విద్వేషాలు ఆపి వీలైతే ప్రేమించడం నేర్చుకోవాలని రాహుల్ అన్నారు.

Rahul Gandhi To BJP: భారత్ జోడో యాత్రలో భాగంగా రాజస్థాన్ అల్వార్‌కు చేరుకున్నారు కాంగ్రెస్ నేత రాహుల్ గాంధీ. ఈ సందర్భంగా ఏర్పాటు చేసిన ఓ బహిరంగ సభలో రాహుల్ గాంధీ మాట్లాడారు. తనపై విమర్శలు చేస్తోన్న భాజపా నేతలకు గట్టి కౌంటర్ ఇచ్చారు. 

నేను విద్వేషాల మార్కెట్‌లో ప్రేమ దుకాణాన్ని తెరుస్తున్నాను. నేను ఈ యాత్ర ఎందుకు చేస్తున్నాను అని అడిగే భాజపా నాయకులకు ఇదే నా సమాధానం. మీరు నన్ను ద్వేషిస్తున్నారు. మీరు నన్ను దుర్భాషలాడుతున్నారు.. ఇది మీ హృదయం. మీ హృదయం ద్వేషంతో నిండిపోయింది. మీది విద్వేషాల మార్కెట్. కానీ నా దుకాణం ప్రేమతో కూడుకున్నది.                                       -     రాహుల్ గాంధీ, కాంగ్రెస్ అగ్రనేత

పార్టీ నేతలకు

రాజస్థాన్ కేబినెట్‌ మంత్రులకు రాహుల్ గాంధీ ఓ సలహా ఇచ్చారు. సాధారణ ప్రజలను చేరుకోవడానికి, వారి ఫిర్యాదులను పరిష్కరించడానికి రాష్ట్రవ్యాప్తంగా నెలకు ఒకసారి యాత్ర చేపట్టాలని రాహుల్ గాంధీ కోరారు.

కాంగ్రెస్ కార్యకర్తలు నాకు ఫ్లయింగ్ కిస్‌లు ఇవ్వడం చూసి చాలా ఆనందం వేసింది. అయితే భాజపా కార్యాలయాల మీదుగా యాత్ర సాగినప్పుడు వారు కూడా మొదట సంకోచించి.న తర్వాత నావైపు చేతులు ఊపేవారు.ఎందుకంటే మనది దేశం ప్రేమ దేశం. నన్ను ఎంత తిట్టినా నేను భాజపా వారిని ద్వేషించను. కానీ నేను నా భావజాలానికి కట్టుబడి ఉన్నాను.                 -    రాహుల్ గాంధీ, కాంగ్రెస్ అగ్రనేత

కాంగ్రెస్ జోడో యాత్ర ఇటీవలే 100 రోజులు పూర్తి చేసుకుంది. ఈ సమావేశంలో కాంగ్రెస్ అధ్యక్షుడు మల్లికార్జున్ ఖర్గే, రాజస్థాన్ ముఖ్యమంత్రి అశోక్ గహ్లోత్ కూడా పాల్గొన్నారు. రాష్ట్ర ప్రభుత్వం ప్రతిష్టాత్మకంగా చేపట్టిన చిరంజీవి ఆరోగ్య బీమా పథకం, మహాత్మాగాంధీ ఇంగ్లీషు పాఠశాల పథకాన్ని రాహుల్ గాంధీ కొనియాడారు.