Nimisha Priya: యెమెన్లో హత్య కేసులో మరణశిక్ష ఎదుర్కొంటున్న భారతీయురాలు నిమిషా ప్రియ కేసులో కీలక ట్విస్ట్ చోటు చేసుకుంది. మరణశిక్షను రద్దు చేస్తూ నిర్ణయం తీసుకున్నారు. ఈమేరకు కీలక ప్రకటన వెలువడింది. భారత గ్రాండ్ ముఫ్తీ, కాంతపురం AP అబూబక్కర్ ముస్లయ్యర్ కార్యాలయం నుంచి ప్రకటన వచ్చింది. ఆ ప్రకటన ప్రకార, "గతంలో సస్పెండ్ చేసిన నిమిషా ప్రియ మరణశిక్షను రద్దు చేశారు. సనాలో జరిగిన ఉన్నత స్థాయి సమావేశంలో ఈ నిర్ణయం తీసుకున్నారు. తాత్కాలికంగా గతంలో సస్పెండ్ చేసిన మరణశిక్షను పూర్తిగా రద్దు చేయాలని నిర్ణయించారు." అని ప్రకటించారు.
యెమెన్లో జైలులో ఉన్న భారతీయురాలు నిమిషా ప్రియ మరణశిక్షను రద్దు చేసినట్లు భారత గ్రాండ్ ముఫ్తీ కాంతపురం ఎ.పి. అబూబకర్ ముస్లియార్ కార్యాలయం విడుదల చేసిన ఒక ప్రకటనలో తెలిపింది. ఈ పరిణామం హై ప్రొఫైల్ కేసులో ఒక ముఖ్యమైన మలుపును సూచిస్తుంది. అయితే, విదేశాంగ మంత్రిత్వ శాఖ (MEA) శిక్ష రద్దును ఇంకా ధృవీకరించలేదు.
యెమెన్ రాజధాని సనాలో జరిగిన ఉన్నత స్థాయి సమావేశం తర్వాత ఈ నిర్ణయం తీసుకున్నట్లు గ్రాండ్ ముఫ్తీ కార్యాలయం తెలిపిందని మాతృభూమి తెలిపింది. గతంలో స్టే విధించిన శిక్షను ఇప్పుడు అధికారికంగా రద్దు చేశారు.
ఈ సమావేశంలో గ్రాండ్ ముఫ్తీ అభ్యర్థన మేరకు షేక్ ఉమర్ హఫీజ్ తంగల్ నియమించిన యెమెన్ స్కాలర్స్ ప్రతినిధి బృందం మధ్యవర్తిత్వం వహించే ప్రయత్నాలు కూడా జరిగాయని తెలుస్తోంది. ఈ చర్చల్లో ఉత్తర యెమెన్ అధికారులు, అంతర్జాతీయ దౌత్య కార్యకలాపాల ప్రతినిధులు కూడా పాల్గొన్నారని మాతృభూమి నివేదించింది.
నిమిషా ప్రియ హత్యకు గురైన యెమెన్ జాతీయుడు తలాల్ కుటుంబంతో చర్చలు కొనసాగుతాయని గ్రాండ్ ముఫ్తీ కార్యాలయం తెలిపింది. ఈ చర్చలు పూర్తి, తుది పరిష్కారాన్ని చేరుకోవడంలో కీలక పాత్ర పోషిస్తాయని భావిస్తున్నారు. నిమిషా ప్రియ ఉరిశిక్షను మొదట జులై 16న అమలు చేయాలని నిర్ణయించారు, కానీ కాంతపురం జోక్యం తర్వాత తాత్కాలికంగా నిలిపివేశారు. దేశ దౌత్యపరమైన సున్నితత్వం కారణంగా తాను చేయగలిగింది ఏమీ లేదని కేంద్ర ప్రభుత్వం సుప్రీంకోర్టుకు తెలిపింది.
నిమిషాకు ఎందుకు మరణశిక్ష పడటానికి కారణం ఏంటీ?
నిమిషా ప్రియ, ఒక 38 ఏళ్ల నర్స్, 2017లో యెమెన్లో ఓ యెమెన్ పౌరుడిని హత్య చేసినందుకు మరణ శిక్షకు గురైంది. ఇది ఆమె కుటుంబం, భారత ప్రభుత్వానికి ఒక పెద్ద సవాలుగా మారింది. నిమిషా ప్రియ కేరళలోని పాలక్కాడ్ జిల్లా, కొల్లెంగోడ్లో 1987లో జన్మించింది. ఆమె 2008లో యెమెన్కు వెళ్లి, సానా నగరంలోని ఒక ప్రభుత్వ ఆస్పత్రిలో నర్స్గా పని చేసింది. 2014లో, ఆమె తన సొంత క్లినిక్ను ప్రారంభించే ఆలోచనతో యెమెన్ వ్యాపార నియమాల ప్రకారం స్థానిక వ్యాపారి తలాల్తో భాగస్వామ్యం చేసుకుంది. అదే ఆమె ప్రాణాల మీదకు తెచ్చింది.
నిమిషా ప్రకారం, ఆమెను అతను చిత్రవధ చేశాడు. ఆమె పాస్పోర్ట్ను స్వాధీనం చేసుకుని, భారత్ వచ్చేదుకు అడ్డుకున్నాడు. 2017 జూలైలో, ఆమె తన పాస్పోర్ట్ను తిరిగి పొందేందుకు మహ్దీని కెటమైన్ ఇంజెక్షన్తో మత్తులో ఉంచేందుకు ప్రయత్నం చేసింది. ఈ డోస్ అతిగా ఇవ్వడంతో అతను మరణించాడు. ఆమె ఒక సహాయకురాలి సహాయంతో శవాన్ని నీటి ట్యాంక్లో పారేసింది, కానీ ఆమె సౌదీ అరేబియా సరిహద్దు దగ్గర అరెస్ట్ అయ్యింది.
2018లో యెమెన్ కోర్టు ఆమెను హత్య కేసులో నేరస్థురాలిగా తీర్పు ఇచ్చి, మరణ శిక్షను ప్రకటించింది. ఆమె కుటుంబం ఆ తీర్పును సవాలు చేశారు. 2023 నవంబరులో యెమెన్ సుప్రీం జుడీషియల్ కౌన్సిల్ ఆమె అప్పీల్ను తిరస్కరించింది. దీనితో 2024 డిసెంబరులో యెమెన్ అధ్యక్షుడు రషద్ అల్-అలిమి ఆమె మరణ శిక్షను ఆమోదించారు. 2025 జూలై 16న ఆమెను ఉరి తీయాలని నిర్ణయించారు.
భారత ప్రభుత్వం, కేరళ, ఇతర మత నాయకుల ఒత్తిడి కారణంగా జులై 15న, ఆమె శిక్షను అమలు చేసే ముందు రోజు, యెమెన్ అధికారులు మరణ శిక్షను తాత్కాలికంగా నిలిపివేశారు. కేరళలోని ప్రముఖ సున్నీ ముస్లిం నాయకుడు కాంతాపురం ఏపి అబూబక్కర్ ముస్లియార్, యెమెన్ మత నాయకులతో మాట్లాడి ఆమె శిక్షను వాయిదా వేయించేందుకు శ్రమించారు. ఇప్పుడు వారి ప్రయత్నాలు ఫలించి ఇప్పుడు శిక్ష రద్దు వరకు వచ్చింది.