Watch Video: సాధారణంగా ఓ వాచ్ విలువ ఎంత ఉంటుంది? వేలల్లో ఉంటుంది, మరీ రిచ్ అయితే లక్షల్లో ఉంటుంది. కానీ వాచ్ విలువ రూ.27 కోట్లు అంటే నమ్ముతారా? అవును దిల్లీ విమానాశ్రయంలో అక్రమంగా తరలిస్తోన్న ఓ వాచ్‌ను కస్టమ్స్ అధికారులు పట్టుకున్నారు. ఆ వాచ్ విలువ అక్షరాలా రూ.27 కోట్లు.
షాక్!
అత్యంత ఖరీదైన చేతి గడియారాన్ని అక్రమంగా తరలించేందుకు ప్రయత్నిస్తున్న ఓ వ్యక్తిని దిల్లీలోని ఇందిరా గాంధీ అంతర్జాతీయ విమానాశ్రయంలో కస్టమ్స్ అధికారులు అరెస్ట్ చేశారు. అతని నుంచి స్వాధీనం చేసుకున్న వాచీల్లో ఒకటి బంగారంతో వజ్రాలు పొదిగినదని, దాని విలువ రూ.27.09 కోట్లు అని అధికారులు గురువారం తెలిపారు.
- జుబైర్ రియాజ్ కమిలి, కస్టమ్స్ కమిషనర్
ఇలా దొరికాడు!
సదరు ప్రయాణికుడిని కస్టమ్స్ శాఖ అధికారులు తనిఖీ చేసినపుడు ఈ వాచీలు బయటపడ్డాయి. నిందితుడు భారత పౌరుడు. అతని వద్ద మొత్తం ఏడు చేతి గడియారాలు స్వాధీనం చేసుకున్నట్లు అధికారులు తెలిపారు. స్వాధీనం చేసుకున్న గడియారాల్లో జాకబ్ & కో (మోడల్: BL115.30A), పియాజెట్ లైమ్‌లైట్ స్టెల్లా (SI.No.1250352 P11179), రోలెక్స్ ఓస్టెర్ పెర్పెచ్యువల్ డేట్ జస్ట్ బ్రాండ్లకు చెందిన ఈ వాచీలు అత్యంత ఖరీదైనవి.
వాటిలో జాకబ్ అండ్ కంపెనీ(మోడల్ బిఎల్115.30ఎ) విలువ రూ. 27.09 కోట్లని తెలిపారు. ఏడు రిస్ట్ వాచీలతోపాటు వజ్రాలు పొదిగిన బంగారం బ్రేస్‌లెట్, ఒక ఐఫోన్ పిఆర్‌ఓ 256 జిబి కూడా ఆ వ్యక్తి నుంచి స్వాధీనం చేసుకున్నట్లు తెలిపారు. వీటి మొత్తం విలువ రూ.28.17 కోట్లని ఆయన చెప్పారు. వాచీలను స్వాధీనం చేసుకుని ప్రయాణికుడిని అరెస్టు చేశారు.
నిందితుడు ఓ ట్రావెలర్ కాగా, అతని మామకు దుబాయ్‌లో ఖరీదైన గడియారాల షోరూమ్ ఉందని, యునైటెడ్ అరబ్ ఎమిరేట్స్ (యుఎఇ)లోని ఇతర ప్రదేశాలలో దీనికి శాఖలు ఉన్నాయని కస్టమ్స్ డిపార్ట్‌మెంట్ సీనియర్ అధికారి తెలిపారు.
ప్రాణ భయం!
గుజరాత్‌కు చెందిన ఓ క్లయింట్ వీటిని అందచేయాల్సి ఉందని నిందితుడు చెప్పినట్లు సమాచారం. నిందితుడు ఇప్పటి వరకు కస్టమర్ పేరు వెల్లడించలేదని, తనకు ప్రాణ భయం ఉందని చెప్పాడని తెలిపారు.